ଦାରିଙ୍ଗବାଡି,୧୦/୨ : କେନ୍ଦ୍ର ସରକାର ପ୍ରତ୍ୟେକ ଗରିବ ପରିବାର ତଥା ଗୃହହୀନ ପରିବାରଙ୍କ ପାଇଁ ପ୍ରଧାନମନ୍ତ୍ରୀ ଆବାସ ଯୋଜନା କରିଥିବାବେଳେ ଚଳିତ ବର୍ଷ ହିତାଧିକାରୀ ସର୍ଭେ କରିବା ନିମନ୍ତେ ଆବାସ ଯୋଜନା-୨୦୨୪ ନେଇ ଏକ ଆପ ଲଞ୍ଚ କରିଛନ୍ତି ସରକାର । ଏହି ଆପ ମାଧ୍ୟମରେ ହିତାଧିକାରୀ ନିଜର ଆଣ୍ଡ୍ରଏଡ ଫୋନ ମାଧ୍ୟମରେ ସର୍ଭେ କରିପାରିବେ । ଯଦି କୌଣସି ହିତାଧିକାରୀ ଫୋନ ନ ଥାଏ କିମ୍ବା ସର୍ଭେ କରିବା ଜାଣନ୍ତି ନାହିଁ ତାହାଲେ ଅଧିକାରୀ ଏହି ଆପ ଜରିଆରେ ତାଙ୍କ ଆଇଡି ମାଧ୍ୟମରେ ସର୍ଭେ କରିବାର ବ୍ୟବସ୍ଥା ରହିଛି । ଆବେଦନ କରିବାକୁ ହେଲେ ଆଧାର ଅଥେଣ୍ଟିକେସନ ଆପ୍ ମାଧ୍ୟମରେ ଆବାସ ଯୋଜନାରେ ସାମିଲ ହେବା ପାଇଁ ଯୋଗ୍ୟ ହିତାଧିକାରୀ ଆବେଦନ କରିବାର ପ୍ରାବଧାନ ରହିଛି ।
ଏହାକୁ ଆବେଦନ କରିବା ପାଇଁ ହେଲେ ଇଣ୍ଟରନେଟ ସେବାର ଆବଶ୍ୟକତା ରହିଛି । ବିନା ଇଣ୍ଟରନେଟରେ ଏହି ଆପ ଖୋଲିବା ସମ୍ଭବ ନୁହେଁ । ତଥ୍ୟ ଅପଲୋଡ଼ବେଳେ ଇଣ୍ଟରନେଟ ଧିମା ହୋଇଗଲେ ଅପଲୋଡ଼ ହେଉ ନାହିଁ । ହେଲେ ଦାରିଙ୍ଗବାଡି ବ୍ଲକର ଅନେକ ପଞ୍ଚାୟତରେ ନେଟଓ୍ବାର୍କ ସେବା ନ ଥିବାବେଳେ ଆଉ କିଛି ଅଞ୍ଚଳରେ ନେଟଓ୍ବାର୍କ ଥିଲେ ସୁଦ୍ଧା ଇଣ୍ଟରନେଟ ସେବା ଉପଲବ୍ଧ ନାହିଁ ।
ଫଳରେ ଆବେଦନ କରିବା ସମ୍ଭବ ହେଉ ନାହିଁ । ଦାରିଙ୍ଗବାଡ଼ି ବ୍ଲକରେ ୨୫ଟି ପଞ୍ଚାୟତ ରହିଥିବାବେଳେ ଅନେକ ଉପାନ୍ତ ପଞ୍ଚାୟତରେ ଆଜି ପର୍ଯ୍ୟନ୍ତ ନେଟଓ୍ବାର୍କ ସେବା ଉପଲବ୍ଧ ନାହିଁ । ଏପରିକି ଅନେକ ପଞ୍ଚାୟତରେ ନେଟଓ୍ବାର୍କ ଥିବାବେଳେ ଇଣ୍ଟରନେଟ ସୁବିଧା ନାହିଁ । ଆଉ କିଛି ସ୍ଥାନରେ ନେଟଓ୍ବାର୍କ ସେବା ବାଧାପ୍ରାପ୍ତ ରହିଛି । ଏଭଳି ଭାବେ ଦାରିଙ୍ଗବାଡ଼ି ବ୍ଲକର ଉପାନ୍ତ ଅଞ୍ଚଳ ଗୁଡ଼ିକରେ ରହିଛି ଅନେକ ସମସ୍ୟା । ଲୋକେ ଆବେଦନ କରିବା ପାଇଁ ହେଲେ ହିତାଧିକାରୀଙ୍କୁ ପ୍ରଥମେ ଇଣ୍ଟରନେଟ ଥିବା ସ୍ଥାନକୁ ଆଣି ଆଧାର ଅଥେନ୍ଟିକେସନ କରି ତଥ୍ୟ ଦେବା ପରେ ପୁଣି ଗାଁ କୁ ଫେରି ରହୁଥିବା ଘରେ ଓ ଘର କରିବାକୁ ଚାହୁଁଥିବା ସ୍ଥାନର ଅକ୍ଷାଂଶ ଓ ଦ୍ରାଘିମା ଆଧାରରେ ଫଟୋ ଦେବାକୁ ପଡୁଛି ।
ଏହାପରେ ପୁଣି ଅପଲୋଡ଼ କରିବା ପାଇଁ ଇଣ୍ଟରନେଟ ସ୍ଥାନକୁ ଯିବାକୁ ପଡୁଛି। ଏଭଳି ଭାବେ ନେଟୱର୍କ ଉପଲବ୍ଧ ନଥିବା ସ୍ଥାନ ହେଉ ଅବା ଇଣ୍ଟରନେଟ ନଥିବା ସ୍ଥାନରେ ସର୍ଭେ କରିବା ସମ୍ଭବ ହେଉ ନାହିଁ । ଫଳରେ ମାର୍ଚ୍ଚ ମାସ ମଧ୍ୟରେ ସର୍ଭେ କାମ ସମ୍ପୂର୍ଣ୍ଣ ହେଲା ଭଳି ମନେ ହେଉନଥିବାବେଳେ ଉପାନ୍ତ ଅଞ୍ଚଳର ଅନେକ ଯୋଗ୍ୟ ହିତାଧିକାରୀ ଉକ୍ତ ଆବାସ ଯୋଜନାରୁ ବାଦ ହେବାର ଆଶଙ୍କା ରହିଛି । ଏଣୁ ରାଜ୍ୟ ସରକାର ଉଭୟ ଆବାସ ଆପ ଓ ଆବେଦନ ଫର୍ମ ଜରିଆରେ ସର୍ଭେ କରିବା ପାଇଁ ଅଞ୍ଚଳବାସୀ ଦାବି କରିଛନ୍ତି ।
