ନୂଆଦିଲ୍ଲୀ,୧୮/୧୦: ଆଇପିଏଲ୍ର ୨୦୨୫ ସିଜନ ପାଇଁ ନଭେମ୍ବର ଶେଷ ସପ୍ତାହରେ ମେଗା ଖେଳାଳି ନିଲାମ ହେବ ବୋଲି ଜଣା ପଡ଼ିଛି । ଯଦିଓ ଏ ବିଷୟରେ ବିସିସିଆଇ ପକ୍ଷରୁ କିଛି ସୂଚନା ଦିଆଯାଇ ନାହିଁ, ତଥାପି ନଭେମ୍ବର ୩୦ କିମ୍ବା ତା’ ପୂର୍ବରୁ ମଧ୍ୟ ନିଲାମୀ ହୋଇପାରେ । ଏଥର ନିଲାମୀ ବିସିସିଆଇ ଦୁବାଇରେ ଆୟୋଜନ କରିପାରେ । ୧୦ଟି ଯାକ ଦଳ ନିଲାମୀ ପାଇଁ ପ୍ରସ୍ତୁତ ହେଉଛନ୍ତି । ଦଳରେ କେଉଁ ଖେଳାଳିଙ୍କୁ ରଖିବେ ଏବଂ କାହାକୁ ଛାଡ଼ିବେ ସେନେଇ ତାଲିକା ପ୍ରସ୍ତୁତ କରୁଛନ୍ତି ।
ଏ ପର୍ଯ୍ୟନ୍ତ ଯାହା ସୂଚନା ରହିଛି, ସନ୍ରାଇଜର୍ସ ହାଇଦ୍ରାବାଦ ହେନରିଚ କ୍ଲାସେନ ଓ ଅଭିଷେକ ଶର୍ମାଙ୍କୁ ରଖିବା ନେଇ ଯୋଜନା କରିଛି । ସେମିତି ଦିଲ୍ଲୀ କ୍ୟାପିଟାଲ୍ସ ରିଷଭ ପନ୍ତ, ଅକ୍ଷର ପଟେଲ ଓ କୁଲଦୀପ ଯାଦବଙ୍କୁ ରଖିପାରେ । ମୁମ୍ବାଇ ଇଣ୍ଡିଆନ୍ସ ହାର୍ଦ୍ଦିକ ପାଣ୍ଡ୍ୟା, ରୋହିତ ଶର୍ମା, ସୂର୍ଯ୍ୟ କୁମାର ଯାଦବ ଓ ଯଶପ୍ରୀତ ବୁମରାଙ୍କୁ ରଖିବା ପାଇଁ ଯୋଜନା କରୁଛି । ଖୁବ୍ ଶୀଘ୍ର କେଉଁ ଦଳ କେଉଁ ଖେଳାଳିମାନଙ୍କୁ ରଖିବେ ତାହାର ସ୍ପଷ୍ଟ ହୋଇଯିବ ।
