ନୂଆଦିଲ୍ଲୀ : ଆକ୍ସନ ମୁଡ୍ରେ ଇରାନର ସର୍ବୋଚ୍ଚ ନେତା। ଶନିବାର ଇରାନ ଓ ଏହାର ସହଯୋଗୀଙ୍କ ଉପରେ ହମଲାକୁ ନେଇ ଇସ୍ରାଏଲ ତଥା ଆମେରିକାକୁ କଡ଼ା ଜବାବ ଦେବାକୁ ଧମକ ଦେଇଛନ୍ତି ଅୟାତୁଲ୍ଲା ଅଲୀ ଖାମେନେଇ। ଏହି ଧମକ ଏମିତି ସମୟରେ ଦେଇଛନ୍ତି, ଯେତେବେଳେ ୨୬ ଅକ୍ଟୋବରରେ ଇସଲାମିକ ଗଣରାଜ୍ୟ ଉପରେ ହୋଇଥିବା ହମଲା ପରେ ଇରାନୀ ଅଧିକାରୀ ଇସ୍ରାଏଲ ବିରୋଧରେ ଆଉ ଏକ ହମଲା କରିବା କଥା କହୁଛନ୍ତି।
ଏହି ହମଲାରେ ଇସ୍ରାଏଲ ଇରାନର ସେନା ଠିକଣା ଓ ଅନ୍ୟ ସ୍ଥାନ ଗୁଡ଼ିକୁ ଟାର୍ଗେଟ୍ କରିଥିଲା, ଯେଉଁଥିରେ ପାଖାପାଖି ୫ଜଣଙ୍କ ଜୀବନ ଚାଲି ଯାଇଥିଲା। ଉଭୟ ପକ୍ଷରୁ ଆଉ କୌଣସି ହମଲା ଏହି ମଙ୍ଗଳବାର ହେବାକୁ ଥିବା ଆମେରିକାର ରାଷ୍ଟ୍ରପତି ନିର୍ବାଚନର ଠିକ୍ ପୂର୍ବରୁ ପଶ୍ଚିମ ଏସିଆକୁ ବ୍ୟାପକ କ୍ଷେତ୍ରୀୟ ସଂଘର୍ଷରେ ପକାଇପାରେ , ଯେମିତି ପୂର୍ବରୁ ହିଁ ଗାଜା ପଟ୍ଟିରେ ଇସ୍ରାଏଲ-ହମାସ ଯୁଦ୍ଧ ଓ ଲେବାନନରେ ହିଜବୁଲ୍ଲା ବିରୋଧରେ ଇସ୍ରାଏଲର ଭୂମିଗତ ଅଭିଯାନ ଲାଗି ରହିଛି।
ଖାମନେଇ ଇରାନର ସରକାରୀ ମିଡ଼ିଆ ଦ୍ୱାରା ଜାରି ଭିଡ଼ିଓରେ କହିଛନ୍ତି ,ଶତ୍ରୁ ଇହୁଦୀ ଶାସନ ହେଉ ବା ଆମେରିକା , ସେ ଯାହା କରୁଛନ୍ତି ଏହାର କଡ଼ା ଜବାବ ନିଶ୍ଚିତ ରୂପେ ମିଳିବ। ସେ ଜବାବୀ କାର୍ଯ୍ୟାନୁଷ୍ଠାନର ସମୟ ବା ପରିସର ବିଷୟରେ ବିସ୍ତୃତ ଭାବେ କହି ନାହାନ୍ତି। ଆମେରିକାର ସେନା ପୂରା ପଶ୍ଚିମ ଏସିଆରେ ସକ୍ରିୟ ଅଛନ୍ତି। ଏହାର କିଛି ସୈନିକ ଏବେ ଇସ୍ରାଏଲରେ ଟର୍ମିନଲ ହାଇ ଅଲ୍ଟିଟ୍ୟୁଡ୍ ଏରିଆ ଡିଫେନ୍ସ (ଥାଡ) ବାୟୁ ପ୍ରତିରକ୍ଷା ପ୍ରଣାଳୀକୁ ପରିଚାଳନା କରୁଛନ୍ତି।
ଖାମେନେଇ ( ୮୫) ପୂର୍ବର କିଛି ଟିପ୍ପଣୀରେ ଅଧିକ ସତର୍କତାର ଆଭିମୁଖ୍ୟ ଆପଣାଇ ଥିଲେ ଏବଂ କହିଥିଲେ କି ଅଧିକାରୀ ଇରାନର କାର୍ଯ୍ୟାନୁଷ୍ଠାନର ମୂଲ୍ୟାଙ୍କନ କରିବେ। ଇସ୍ରାଏଲର ହମଲାକୁ ବଢାଇ ଚଢାଇ ଦର୍ଶାଇବା ଉଚିତ ନୁହେଁ କି କମ୍ କରି କହିବା ଉଚିତ୍ ନୁହେଁ।
ହେଲେ ହମଲାର ପ୍ରଭାବକୁ ଲୁଚାଇବାର ଇରାନର ଚେଷ୍ଟା ବିଫଳ ହୋଇ ଯାଇଛି। ଆସୋସିଏଟେଡ୍ ପ୍ରେସ ଦ୍ୱାରା ବିଶ୍ଳେଷଣର ଉପଗ୍ରହର ଫଟୋରୁ ଜଣାପଡ଼ିଛି ଯେ, ହମଲାରେ ଦେଶର ବାଲେଷ୍ଟିକ ମିସାଇଲ କାର୍ଯ୍ୟକ୍ରମ ସହ ଜଡ଼ିତ ଏବଂ ତେହରାନ ପାଖରେ ଥିବା ସୈନ୍ୟ ଠିକଣାକୁ କ୍ଷତି କରିବା ତଥା ରିଭଲ୍ୟୁସନାରୀ ଗାର୍ଡର ଉପଗ୍ରହ ପ୍ରକ୍ଷେପଣ ସମ୍ୱନ୍ଧୀୟ ପ୍ରତିଷ୍ଠାନର ମଧ୍ୟ କ୍ଷତି ହୋଇଛି। ଇସ୍ରାଏଲର ହମଲାରେ ଇରାନର ହମାସ ଓ ହିଜବୁଲ୍ଲା ଭଳି ସହଯୋଗୀଙ୍କୁ ମଧ୍ୟ ଖୁବ୍ କ୍ଷତି ପହଞ୍ଚିଛି। ସେମାନଙ୍କ ଅନେକ ବରିଷ୍ଠ କମାଣ୍ଡରମାନଙ୍କ ମୃତ୍ୟୁ ହୋଇଛି।
