ନୂଆଦିଲ୍ଲୀ,୨୬/୧୦: ଶନିବାର ବଡ଼ି ଭୋର୍ରୁ ଇସ୍ରାଏଲ ଇରାନ ଉପରେ ଏକ ବଡ଼ ଆକ୍ରମଣ କରିଛି। ଏହି ଆକ୍ରମଣରେ ଇସ୍ରାଏଲ ଇରାନର ସାମରିକ ଶିବିରରେ କ୍ଷେପଣାସ୍ତ୍ର ମାଡ଼ କରିଛି। ଏହି କ୍ଷେପଣାସ୍ତ୍ର ଆକ୍ରମଣ ଦ୍ବାରା ହୋଇଥିବା ବିସ୍ଫୋରଣର ଶବ୍ଦ ଇରାନରେ ଦୀର୍ଘ ସମୟ ଧରି ଶୁଣିବାକୁ ମିଳିଥିଲା। କୁହାଯାଉଛି ଯେ ଇରାନର ରାଜଧାନୀ ତେହେରାନରେ ମଧ୍ୟ ଏପରି ବିସ୍ଫୋରଣ ଶୁଣାଯାଇଛି। ଇରାନ ଉପରେ ହୋଇଥିବା ଆକ୍ରମଣ ସମ୍ପର୍କରେ ଇସ୍ରାଏଲ୍ ଆର୍ମି ଆଇଡିଏଫ୍ ମଧ୍ୟ ଏକ ବିବୃତ୍ତି ଜାରି କରିଛି। ଆଇଡିଏଫ୍ ଏହାର ବିବୃତ୍ତିରେ କହିଛି ଯେ ଅତୀତରେ ଇରାନ ଏବଂ ସେମାନଙ୍କ ପ୍ରକ୍ସିମାନେ ଆମ ଉପରେ ଅନେକ ଆକ୍ରମଣ କରିଛନ୍ତି। ଏହା ହେଉଛି ଆମର ପ୍ରତିଆକ୍ରମଣ। ଆମ ଦେଶକୁ ବଞ୍ଚାଇବା ପାଇଁ ଆମେ କିଛି କରିବୁ। ଇରାନ ଉପରେ ଗୋଟିଏ ପରେ ଗୋଟିଏ ଅନେକ ବାଲିଷ୍ଟିକ୍ କ୍ଷେପଣାସ୍ତ୍ର ନିକ୍ଷେପ କରିଛି ଇସ୍ରାଏଲ।
ଇସ୍ରାଏଲ ଇରାନର ସେହି ସ୍ଥାନ ଗୁଡ଼ିକ ଉପରେ ଆକ୍ରମଣ କରିଛି, ଯେଉଁଠାରୁ ଇରାନ୍ ଇସ୍ରାଏଲ ଉପରେ ଆକ୍ରମଣ କରିଛି। ବିଶେଷଜ୍ଞ ମାନଙ୍କର କହିବା କଥା ହେଲା, ଏହି ଆକ୍ରମଣ ପଛରେ ଇସ୍ରାଏଲର ଉଦ୍ଦେଶ୍ୟ ହେଉଛି ଇରାନର ବାୟୁ ପ୍ରତିରକ୍ଷା ପ୍ରଣାଳୀକୁ ସମ୍ପୁର୍ଣ୍ଣ ଧ୍ୱଂସ କରିବା। ଏଥି ସହିତ ଭବିଷ୍ୟତରେ ମଧ୍ୟ ଏଭଳି ଆକ୍ରମଣ ଜାରି ରହିବ ବୋଲି ଆଇଡିଏଫ୍ ନିଜର ବିବୃତ୍ତିରେ କହିଛି। ସୂଚନାନୁସାରେ, ଇରାନ ଉପରେ ଆକ୍ରମଣ ପାଇଁ ଇସ୍ରାଏଲ ୧୦୦ ରୁ ଅଧିକ ଯୁଦ୍ଧ ବିମାନ ମଧ୍ୟ ବ୍ୟବହାର କରିଛି। ଇସ୍ରାଏଲ୍ ସେହି ଇରାନର ଶିବିରକୁ ମଧ୍ୟ ଟାର୍ଗେଟ କରିଛି ଯେଉଁଠାରେ ଇରାନ ନିଜର କ୍ଷେପଣାସ୍ତ୍ର ରଖେ। ପ୍ରାରମ୍ଭିକ ସୂଚନା ଅନୁଯାୟୀ, ଇସ୍ରାଏଲ ଭବିଷ୍ୟତରେ ଏକ ବଡ଼ ଆକ୍ରମଣ ପାଇଁ ପ୍ରସ୍ତୁତି ଚଳାଇଛି। ଶନିବାର ହୋଇଥିବା ଆକ୍ରମଣରେ ଇସ୍ରାଏଲ ମଧ୍ୟ ତେହେରାନ ଉପରେ ବୋମା ପକାଇଥିଲା।
କିଛି ଦିନ ପୂର୍ବରୁ ଇସ୍ରାଏଲର ପ୍ରଧାନମନ୍ତ୍ରୀ ବେଞ୍ଜାମିନ୍ ନେତାନ୍ୟାହୁଙ୍କ ଘରେ ଡ୍ରୋନ୍ ଆକ୍ରମଣ ମଧ୍ୟ କରାଯାଇଥିଲା। ଏହି ଆକ୍ରମଣରେ ଇସ୍ରାଏଲ୍ ପ୍ରଧାନମନ୍ତ୍ରୀଙ୍କର କୌଣସି କ୍ଷତି ହୋଇନଥିଲା। ପରେ ଏହି ଆକ୍ରମଣ ପାଇଁ ହିଜବୁଲ୍ଲାହ ନିଜକୁ ଦାୟି କରିଥିଲା। ଏହି ଆକ୍ରମଣ ପରେ ଇସ୍ରାଏଲ୍ ପ୍ରଧାନମନ୍ତ୍ରୀ ଏକ ବିବୃତ୍ତି ଜାରି କରି କହିଥିଲେ ଯେ, ଯିଏ ଏହି ଆକ୍ରମଣ କରିଛି, ଆମେ ତାଙ୍କୁ ଛାଡ଼ିବୁ ନାହିଁ ଏବଂ ଯେଉଁମାନେ ଏହିପରି ଲୋକଙ୍କୁ ସମର୍ଥନ କରିଥିଲେ ସେମାନଙ୍କୁ ଭାରି ମୂଲ୍ୟ ଦେବାକୁ ପଡ଼ିବ। କହିରଖୁଛୁ ଯେ, ହିଜବୁଲ୍ଲାହ, ହୁତି ଏବଂ ହମାସ ଭଳି ଆତଙ୍କବାଦୀ ସଂଗଠନ ଇରାନର ସମର୍ଥନ ରହିଛି। ଇରାନ ଇସ୍ରାଏଲ ବିରୋଧରେ ଏହି ଆତଙ୍କବାଦୀ ସଂଗଠନଗୁଡ଼ିକୁ ନିରନ୍ତର ସମର୍ଥନ କରିଆସୁଛି।
