ନୂଆଦିଲ୍ଲୀ: ଇସ୍ରାଏଲୀ ବାୟୁସେନା (IAF) ଗତକାଲି ରାତିରୁ ଇରାନର ମାନବ ରହିତ ବାୟୁଯାନ (UAV)କୁ ଖସାଇ ଦେଇଥିବା ଦାବି କରିଛି । ଇସ୍ରାଏଲର ବାୟୁସେନା ଏହାର ଏକ ଭିଡିଓ ମଧ୍ୟ ଜାରି କରିଛି । ଇସ୍ରାଏଲୀ ବାୟୁସେନା ଅନୁସାରେ, ସାରା ରାତି ଇରାନ ଡ୍ରୋନ୍ ମାଡ କରିଥିଲା । ସେଥିମଧ୍ୟରୁ ୪୦ଟିକୁ ନଷ୍ଟ କରିଦିଆ ଯାଇଛି । ଅପରେସନ୍ ରାଇଜିଂ ଲାୟନ୍ ଆରମ୍ଭ ହେବା ପରଠାରୁ ୪୭୦ ରୁ ଅଧିକ ୟୁଏଭିକୁ ନଷ୍ଟ କରାଯାଇଛି । ପ୍ରାୟ ୯୯% ସଫଳତା ପାଇଛି ଇସ୍ରାଏଲ ବାୟୁସେନା ।
ୟୁଏଭି ବା ମାନବ ରହିତ ବାୟୁଯାନ । ସାଧାରଣ ଭାଷାରେ ଏହାକୁ "ଡ୍ରୋନ୍" କୁହାଯାଏ। ଏଗୁଡ଼ିକ ଏପରି ବିମାନ ଯାହାକୁ ଉଡ଼ାଇବା ପାଇଁ ପାଇଲଟଙ୍କ ଆବଶ୍ୟକତା ନାହିଁ । ଏଗୁଡ଼ିକ ରିମୋଟ୍ କଣ୍ଟ୍ରୋଲ୍ କିମ୍ବା ସାଟେଲାଇଟ୍ ସିଷ୍ଟମ୍ ମାଧ୍ୟମରେ ଦୂରରୁ ପରିଚାଳିତ ହୁଏ । ଆଜିକାଲି ଏହା ମୁଖ୍ୟତଃ ସାମରିକ ଯୁଦ୍ଧରେ ବ୍ୟବହୃତ ହେଉଛି । ଏହା ଦ୍ବାରା ଶତ୍ରୁର ଠିକଣା ଉପରେ ଆକ୍ରମଣ କରାଯାଉଛି । ଏପରିକି ଏହା ସାହାଯ୍ୟରେ, ଅସ୍ତ୍ରଶସ୍ତ୍ର କିମ୍ବା ଗୁଳିଗୋଳା ସଠିକ୍ ଠିକଣାରେ ପକାଇ ହେବ । ତେବେ ଏଭଳି ଡ୍ରୋନ୍କୁ ମଧ୍ୟ ଅନ୍ୟ କ୍ଷେତ୍ରରେ ବ୍ୟବହାର କରାଯାଉଛି । ଏହାକୁ ଫସଲ ତଦାରଖ ଏବଂ କୃଷିରେ ସହାୟତା, ବିପର୍ଯ୍ୟୟ ପରିଚାଳନା, ଫିଲ୍ମ ଏବଂ ଗଣମାଧ୍ୟମରେ ଭିଡିଓ ସୁଟିଂ ଆଦି କାର୍ଯ୍ୟରେ ବ୍ୟବହାର କରାଯାଉଛି ।
ଡ୍ରୋନଗୁଡ଼ିକ କ୍ୟାମେରା, ସେନ୍ସର, GPS, ମୋଟର ଏବଂ ନିୟନ୍ତ୍ରକ ସହିତ ସଜ୍ଜିତ । ଏହାକୁ ଭୂମିରୁ କମ୍ପ୍ୟୁଟର କିମ୍ବା ନିୟନ୍ତ୍ରଣ ରିମୋଟ୍ ମାଧ୍ୟମରେ ଉଡ଼ାଯାଏ । କିଛି ଡ୍ରୋନ ସମ୍ପୂର୍ଣ୍ଣ ସ୍ୱୟଂଚାଳିତ। ପୂର୍ବ-ନିର୍ଦ୍ଧାରିତ ଗନ୍ତବ୍ୟସ୍ଥଳ ଅଭିମୁଖେ ଗତି କରିପାରେ । ଏହା ଶତ୍ରୁ ସ୍ଥାନ ଉପରେ ଆକ୍ରମଣ କରିବା ପାଇଁ ସର୍ବୋତ୍ତମ ବିକଳ୍ପ ବୋଲି କୁହାଯାଉଛି । ଏହା ସହିତ ଅନେକ ଆତ୍ମଘାତୀ ଡ୍ରୋନ ଅଛି, ଯାହା ଲକ୍ଷ୍ୟସ୍ଥଳକୁ ଯାଇ ବୋମା ଭଳି ବିସ୍ଫୋରଣ ହୁଏ ।
