ଗାଜା ସିଟି,୦୪/୦୧: ଇସ୍ରାଏଲ ଶୁକ୍ରବାର ଗାଜାରେ ଘନଘନ ଏୟାରଷ୍ଟ୍ରାଇକ୍ କରିଛି । ଏଥିରେ ଅନ୍ୟୁନ ୩୫ ଜଣଙ୍କ ମୃତ୍ୟୁ ଘଟିଛି । ଏହାକୁ ମିଶାଇ ଗତ ୨୪ ଘଣ୍ଟାରେ ଇସ୍ରାଏଲ ୩୪ ଏୟାରଷ୍ଟ୍ରାଇକ୍ କଲାଣି । ଏଥିରେ ୭୧ ସାଧାରଣ ନାଗରିକଙ୍କ ଜୀବନ ଯାଇଥିବା ଗାଜା ସରକାରୀ ମିଡିଆ ଅଫିସ୍ ପକ୍ଷରୁ କୁହାଯାଇଛି । ଆକ୍ରମଣରେ ହସ୍ପିଟାଲଗୁଡ଼ିକୁ ଟାର୍ଗେଟ କରାଯାଇଥିବା ଅଭିଯୋଗ ହୋଇଛି । ଜାତିସଂଘ ମଧ୍ୟ ଇସ୍ରାଏଲର ଏହି ଆକ୍ରମଣକୁ ନିନ୍ଦା କରିଛି ।
୨୦୨୩ ଅକ୍ଟୋବର ୭ ପରଠାରୁ ଇସ୍ରାଏଲ ଆକ୍ରମଣରେ ଅଦ୍ୟାବଧି ଅନ୍ୟୁନ ୪୫,୫୮୧ ପାଲେଷ୍ଟିନୀୟଙ୍କ ମୃତ୍ୟୁ ଘଟିଥିବା ଜଣାଯାଇଛି । ଗୁରୁବାର ଇସ୍ରାଏଲ କରିଥିବା ଆକ୍ରମଣରେ ଜଣେ ସାମ୍ବାଦିକ ଓମାର ଅଲ୍-ଡେରାୱିଙ୍କ ମୃତ୍ୟୁ ଘଟିଛି । ଅନ୍ୟପକ୍ଷରେ ଶୁକ୍ରବାର ସକାଳୁ ଇସ୍ରାଏଲରେ ମଧ୍ୟ ଆକ୍ରମଣ ହୋଇଛି । ୟେମେନରୁ ଇସ୍ରାଏଲକୁ ମିସାଇଲ ଛଡ଼ାଯାଇଥିଲା ବୋଲି ଇସ୍ରାଏଲ କହିଛି । ତେବେ ଏଥିଯୋଗୁ ବିଶେଷ କ୍ଷୟକ୍ଷତି ଘଟିନାହିଁ । ମିସାଇଲଗୁଡ଼ିକୁ ଇସ୍ରାଏଲ ଆକାଶରେ ହିଁ ଖସାଇଦେଇଥିଲା । ସେପଟେ ଗାଜାରେ ଯୁଦ୍ଧବିରତିକୁ ନେଇ କାତାରରେ ଆଲୋଚନା ହେବାକୁ ଯାଉଛି । କାତାର ମଧ୍ୟସ୍ଥତାରେ ହେବାକୁ ଥିବା ଏହି ବୈଠକରେ ହମାସ୍ ଏବଂ ଇସ୍ରାଏଲ ପ୍ରତିନିଧି ଶୁକ୍ରବାର ଦୋହା ଅଭିମୁଖେ ବାହାରିଛନ୍ତି ।
