ସାନା: ମଧ୍ୟପ୍ରାଚ୍ୟରେ ଆଉ ଥରେ ଯୁଦ୍ଧର ଆଶଙ୍କା ଉପୁଜିଛି। ଇସ୍ରାଏଲ ବାୟୁସେନା ୟେମେନର ରାଜଧାନୀ ସାନାରେ ହୁତି ବିଦ୍ରୋହୀଙ୍କ ଗଡ଼କୁ ଟାର୍ଗେଟ କରି ଏକ ଶକ୍ତିଶାଳୀ ଆକ୍ରମଣ ଘଟାଇଛି। ଖବର ମୁତାବକ, ରବିବାର ସଂଧ୍ୟ୍ୟାରେ ସାନାର ଆକାଶରେ ଇସ୍ରାଏଲୀ ଯୁଦ୍ଧବିମାନର ଗର୍ଜନ ଓ ବିସ୍ଫୋରଣର ଝଟକା ସ୍ଥାନୀୟ ବାସିନ୍ଦାଙ୍କୁ ଭୟଭୀତ କରିଦେଇଛି। ଏହି ଆକ୍ରମଣରେ ହୁତି ନିୟନ୍ତ୍ରିତ ହଜିଜ ଓ ଆସାର ଶକ୍ତି କେନ୍ଦ୍ର, ଇନ୍ଧନ ଭଣ୍ଡାର ଏବଂ ରାଷ୍ଟ୍ରପତି ଭବନ ନିକଟରେ ଥିବା ସାମରିକ ସ୍ଥାନଗୁଡ଼ିକ ଧୂଳିସାତ୍ ହୋଇଥିବା ସୂଚନା ମିଳିଛି। 

ତେବେ ଏହି ଆକ୍ରମଣ ଆକସ୍ମିକ ଘଟଣା ନୁହେଁ। ଇରାନ ସମର୍ଥିତ ହୁତି ବିଦ୍ରୋହୀମାନେ ୨୦୨୩ ଅକ୍ଟୋବରରେ ଇସ୍ରାଏଲ-ହମାସ ଯୁଦ୍ଧ ଆରମ୍ଭ ହେବା ପରେ ପାଲେଷ୍ଟାଇନୀୟମାନଙ୍କ ସହ ଐକ୍ୟବଦ୍ଧତା ପ୍ରକାଶ କରି ଇସ୍ରାଏଲ ଉପରେ ବାରମ୍ବାର ମିସାଇଲ ଓ ଡ୍ରୋନ ଆକ୍ରମଣ ଜାରି ରଖିଛନ୍ତି। ଶୁକ୍ରବାର ରାତିରେ ହୁତିମାନେ ଇସ୍ରାଏଲର ବେନ ଗୁରିଅନ ବିମାନବନ୍ଦରକୁ ଲକ୍ଷ୍ୟ କରି ଏକ କ୍ଲଷ୍ଟର ବୋମା ମିସାଇଲ ମାଡ କରିଥିଲେ। ଯାହା ଇସ୍ରାଏଲର ପ୍ରତିରକ୍ଷା ବ୍ୟବସ୍ଥା ଅଟକାଇ ଦେଇଥିଲା। କିନ୍ତୁ ଏହି ଆକ୍ରମଣ ଇସ୍ରାଏଲକୁ ଏକ ବଡ଼ ଚେତାବନୀ ଥିଲା, ଏବଂ ଏହାର ଜବାବରେ ଇସ୍ରାଏଲ ଏକ ଦୃଢ଼ତାର ସହ ପ୍ରତିଶୋଧ ନେବାକୁ ନିଷ୍ପତ୍ତି ନେଇଛି। 

ଇସ୍ରାଏଲର ଏଫ-୧୬ଆଇ ଯୁଦ୍ଧବିମାନ, ରିଫ୍ୟୁଏଲର ଓ ଗୁପ୍ତଚର ବିମାନ ସମେତ ପ୍ରାୟ ୨୦ଟି ବିମାନ ଏକ ରାତିଅଧିଆ ଅଭିଯାନରେ ସାନାର ଆକାଶକୁ କମ୍ପାଇ ଦେଇଥିଲେ। ୨,୦୦୦ କିଲୋମିଟରରୁ ଅଧିକ ଦୂରତା ଅତିକ୍ରମ କରି ଏହି ବିମାନଗୁଡ଼ିକ ହୁତିଙ୍କ ଶକ୍ତି କେନ୍ଦ୍ର ଓ ସାମରିକ ସ୍ଥାନଗୁଡ଼ିକୁ ଟାର୍ଗେଟ କରିଥିଲେ। ହୁତି-ନିୟନ୍ତ୍ରିତ ଆଲ-ମାସିରା ଟିଭି ରିପୋର୍ଟ ଅନୁଯାୟୀ, ଏହି ଆକ୍ରମଣରେ ହଜିଜ ଶକ୍ତି କେନ୍ଦ୍ରରେ ଥିବା ଜେନେରେଟରଗୁଡ଼ିକ ଧୂଳିସାତ୍ ହୋଇଛି, ଯାହା ସାନାର ବିଦ୍ୟୁତ ଯୋଗାଣକୁ ସମ୍ପୂର୍ଣ୍ଣ ଅଚଳ କରି ଦେଇଛି। ସ୍ଥାନୀୟ ଲୋକେ ରାଷ୍ଟ୍ରପତି ଭବନ ନିକଟରେ ବିସ୍ଫୋରଣର ଭୟଙ୍କର ଶବ୍ଦ ଶୁଣିଥିବା କହିଛନ୍ତି। ସାନାର ଆକାଶରେ ଧୂଳି ଓ ଧୂଆଁର ବାଦଲ ଛାଇ ଯାଇଥିଲା, ଯାହା ଏକ ଯୁଦ୍ଧ ଚଳଚ୍ଚିତ୍ରର ଦୃଶ୍ୟକୁ ମନେ ପକାଇ ଦେଇଥିଲା।

ହୁତି ମିଡ଼ିଆ ଅଧିକାରୀ ନାସରୁଦ୍ଦିନ ଆମେର ଏହି ଆକ୍ରମଣକୁ ଏକ ମାନବୀୟ ଅପରାଧ ବୋଲି ଅଭିହିତ କରି କହିଛନ୍ତି, "ଇସ୍ରାଏଲ ଆମ ଇଚ୍ଛାଶକ୍ତିକୁ ଭାଙ୍ଗି ପାରିବ ନାହିଁ। ଗାଜାରେ ଇସ୍ରାଏଲର ଆଗ୍ରାସନ ବନ୍ଦ ନ ହେବା ପର୍ଯ୍ୟନ୍ତ ଆମେ ଆକ୍ରମଣ ଜାରି ରଖିବୁ।" ଅନ୍ୟପଟେ ହୁତି ମୁଖପାତ୍ର ୟାହ୍ୟା ସାରୀ ମଧ୍ୟ ପ୍ରତିଶୋଧର ଚେତାବନୀ ଦେଇ କହିଛନ୍ତି, "ଇସ୍ରାଏଲ ଏହାର ମୂଲ୍ୟ ଦେବ। ଆମେ ଆହୁରି ଶକ୍ତିଶାଳୀ ଜବାବ ଦେବୁ।" ହୁତିମାନେ ଲାଲ ସାଗରରେ ଜାହାଜ ଆକ୍ରମଣ ଜାରି ରଖିବା ସହ ଇସ୍ରାଏଲକୁ ଲକ୍ଷ୍ୟ କରି ଆହୁରି ଅଧିକ ମିସାଇଲ ପ୍ରୟୋଗ କରିବାକୁ ପ୍ରସ୍ତୁତ ବୋଲି ଦାବି କରିଛନ୍ତି।

ଇସ୍ରାଏଲର ପ୍ରଧାନମନ୍ତ୍ରୀ ବେଞ୍ଜାମିନ ନେତାନ୍ୟାହୁ ଏହି ଆକ୍ରମଣକୁ ଏକ "ସଫଳ ଅଭିଯାନ" ବୋଲି ଅଭିହିତ କରି କହିଛନ୍ତି, "ହୁତିମାନେ ଇରାନର ଏକ ଅସ୍ତ୍ର, ଏବଂ ଯେଉଁମାନେ ଆମ ଉପରେ ଆକ୍ରମଣ କରନ୍ତି, ସେମାନେ ଏହାର ଭାରୀ ମୂଲ୍ୟ ଦେବେ।" ପ୍ରତିରକ୍ଷା ମନ୍ତ୍ରୀ ଇସ୍ରାଏଲ କାଟ୍ଜ ହୁତି ନେତାମାନଙ୍କୁ ଚେତାବନୀ ଦେଇ କହିଛନ୍ତି, "ଇସ୍ରାଏଲର ଲମ୍ବା ହାତ ତୁମ ପାଖରେ ପହଞ୍ଚିବ। ଆମେ କୌଣସି ଆକ୍ରମଣକୁ ବରଦାସ୍ତ କରିବୁ ନାହିଁ।" ଇସ୍ରାଏଲ ଦାବି କରିଛି ଯେ ହୁତିମାନେ ଇରାନର ଆର୍ଥିକ ସହାୟତା ଓ ନିର୍ଦ୍ଦେଶରେ ଏହି ଆକ୍ରମଣ କରୁଛନ୍ତି, ଯାହା ମଧ୍ୟପ୍ରାଚ୍ୟରେ ଅସ୍ଥିରତାର ମୂଳ କାରଣ।

ଏହି ଆକ୍ରମଣ ସାନାରେ ବିଦ୍ୟୁତ ଯୋଗାଣକୁ ସମ୍ପୂର୍ଣ୍ଣ ଅଚଳ କରି ଦେଇଛି। ବର୍ତ୍ତମାନ ହଜାର ହଜାର ପରିବାର ଅନ୍ଧକାର ମଧ୍ୟରେ ଡୁବି ରହିଛନ୍ତି, ଏବଂ ସ୍ଥାନୀୟ ହସ୍ପିଟାଲ ଓ ଅତ୍ୟାବଶ୍ୟକ ସେବାଗୁଡ଼ିକ ବିଦ୍ୟୁତ ଅଭାବରେ ଅସୁବିଧାରେ ପଡ଼ିଛନ୍ତି। ହୁତି-ନିୟନ୍ତ୍ରିତ ହୋଦେଇଦା ବନ୍ଦର, ଯାହା ଇୟେମେନରେ ଖାଦ୍ୟ ଓ ମାନବୀୟ ସାହାଯ୍ୟର ମୁଖ୍ୟ ପ୍ରବେଶ ପଥ, ମଧ୍ୟ ପୂର୍ବରୁ ଇସ୍ରାଏଲର ଆକ୍ରମଣରେ କ୍ଷତିଗ୍ରସ୍ତ ହୋଇଛି। ଏହା ଇୟେମେନର ଚଳିତ ମାନବୀୟ ସଙ୍କଟକୁ ଆହୁରି ଜଟିଳ କରିପାରେ ବୋଲି ବିଶେଷଜ୍ଞନମାନେ ମତ୍ତ ପ୍ରକାଶ କରିଛନ୍ତି। 

ହୁତିମାନେ ଲାଲ ସାଗର ଓ ଏଡେନ ଉପସାଗରରେ ଜାହାଜ ଆକ୍ରମଣ ଜାରି ରଖିଛନ୍ତି, ଯାହା ବିଶ୍ୱ ବାଣିଜ୍ୟକୁ ପ୍ରଭାବିତ କରୁଛି। ୨୦୨୪ ମସିହା ଜାନୁୟାରୀ ମାସରେ ଯୁକ୍ତରାଷ୍ଟ୍ର ଓ ଯୁକ୍ତରାଜ୍ୟ ହୁତି ଲକ୍ଷ୍ୟସ୍ଥଳ ଉପରେ ବାୟୁ ଆକ୍ରମଣ ଆରମ୍ଭ କରିଥିଲେ। କିନ୍ତୁ ମେ’ ମାସରେ ଯୁକ୍ତରାଷ୍ଟ୍ର ହୁତିମାନଙ୍କ ସହ ଏକ ଯୁଦ୍ଧବିରାମ ଚୁକ୍ତି କରିଥିଲା। ଏହି ଚୁକ୍ତିରେ ଇସ୍ରାଏଲ ବିରୁଦ୍ଧରେ ଆକ୍ରମଣ ବନ୍ଦ କରିବା ଅନ୍ତର୍ଭୁକ୍ତ ନଥିଲା, ଯାହା ଇସ୍ରାଏଲକୁ ଏକାକୀ ଲଢ଼ିବାକୁ ବାଧ୍ୟ କରିଛି। ହୁତିମାନେ ଦୁଇଟି ଜାହାଜ ଡୁବାଇବା ସହ ଗୋଟିଏ ଜାହାଜ ଜବତ କରିଛନ୍ତି ଓ ଚାରିଜଣ କ୍ରୁ ସଦସ୍ୟଙ୍କୁ ହତ୍ୟା କରିଛନ୍ତି, ଯାହା ଏହି ସଂଘର୍ଷର ଗମ୍ଭୀରତାକୁ ଦର୍ଶାଉଛି।

ଏହି ଆକ୍ରମଣ ମଧ୍ୟପ୍ରାଚ୍ୟରେ ଇରାନ ଓ ଇସ୍ରାଏଲ ମଧ୍ୟରେ ଚାଲିଥିବା ପରୋକ୍ଷ ଯୁଦ୍ଧକୁ ଆହୁରି ତୀବ୍ର କରିଛି। ହୁତିମାନେ ପ୍ରତିଶୋଧ ନେବାକୁ ଘୋଷଣା କରିଥିବାରୁ, ଆଗାମୀ ଦିନରେ ଏହି ସଂଘର୍ଷ ଆହୁରି ଜଟିଳ ହେବାର ଆଶଙ୍କା ରହିଛି। ସାନାରେ ଅନ୍ଧକାର ଓ ଅଶାନ୍ତି ମଧ୍ୟରେ ୟେମେନର ସାଧାରଣ ଜନତା ଏହି ଭୌଗୋଳିକ ରାଜନୀତିର ସବୁଠାରୁ ବଡ଼ କ୍ଷତି ସହୁଛନ୍ତି।