ନୂଆଦିଲ୍ଲୀ,୨୧/୦୭: ୨୧ ମାସ ଧରି ଚାଲୁଥିବା ଯୁଦ୍ଧ ଗାଜାରେ ଧ୍ୱଂସ ଲୀଳା ରଚିଛି । ଧନ-ଜୀବନ ନଷ୍ଟ ହୋଇଛି । ଭୋକରେ ଡ଼ହଳ ବିକଳ ହେଉଛନ୍ତି ଲୋକ । ରିଲିଫ୍ ସାମଗ୍ରୀକୁ ଅପେକ୍ଷା କରି ରହିଥିବା ବେଳେ ଇସ୍ରାଏଲ ହମଲାରେ ୬୭ ପାଲେଷ୍ଟୀନିୟଙ୍କର ମୃତ୍ୟୁ ହୋଇଛି ।
କତରରେ ଇସ୍ରାଏଲ ଓ ହମାସ ମଧ୍ୟରେ ଚାଲିଥିବା ଅସ୍ତ୍ରବିରତି ଆଲୋଚନା ଭିତରେ ଗାଜାରେ ହିଂସା ଥମିବାର ନାମ ନେଉନାହିଁ । ରବିବାର ଉତ୍ତର ଗାଜାରେ ଇସ୍ରାଏଲ ସେନାରେ ଫୟାରିଂରେ ରିଲିଫ୍ ସାମଗ୍ରୀ ପାଇଁ ଅପେକ୍ଷା କରି ରହିଥିବା ୬୭ ପାଲେଷ୍ଟୀନିୟଙ୍କର ମୃତ୍ୟୁ ହୋଇଛି । ମୃତକଙ୍କ ମଧ୍ୟରେ ମହିଳା ଓ ଶିଶୁ ମଧ୍ୟ ରହିଛନ୍ତି । ଗାଜା ସ୍ୱାସ୍ଥ୍ୟ ମନ୍ତ୍ରଣାଳୟ ଏହି ଘଟଣାର ପୃଷ୍ଟି କରି କହିଛି ।
କ୍ଷୁଧା ଆଶଙ୍କା ବୃଦ୍ଧି- ସଂଯୁକ୍ତ ରାଷ୍ଟ୍ର ଏଜେନ୍ସିଂ ଡବ୍ଲ୍ୟୁଏଫପି କହିଛି ଯେ, ରିଲିଫ୍ ସାମଗ୍ରୀ ଧରି ସେମାନଙ୍କର ୨୫ ଟ୍ରକ ଗାଜାରେ ପ୍ରବେଶ କରିବା ମାତ୍ରେ ଲୋକଙ୍କ ଭିଡ଼ ଜମା ହୋଇଥିଲା। ଏହି ସମୟରେ ଗୁଳିଚାଳନା ହୋଇଥିଲା । ସେହି ସମୟରେ, ଗାଜାରେ ରହୁଥିବା ଲୋକମାନେ କହିଥିଲେ ଯେ, ବର୍ତ୍ତମାନ ଅଟା ଭଳି ମୌଳିକ ଜିନିଷ ପାଇବା ଅସମ୍ଭବ ହୋଇଗଲାଣି । ନୋପ୍ ଲିଓ ଗାଜାରେ କ୍ୟାଥୋଲିକ ଚର୍ଚ୍ଚ ଉପରେ ଆକ୍ରମଣକୁ ନିନ୍ଦା କରିଛନ୍ତି, ଯେଉଁଥିରେ ତିନି ଜଣ ଲୋକ ପ୍ରାଣ ହରାଇଥିଲେ। ସେ 'ଯୁଦ୍ଧର ବର୍ବରତା' ଶେଷ କରିବାକୁ ଅନୁରୋଧ କରିଛନ୍ତି ।
ସଂଯୁକ୍ତ ରାଷ୍ଟ୍ର ଏବଂ ଗାଜାର ସ୍ୱାସ୍ଥ୍ୟ ମନ୍ତ୍ରଣାଳୟ ଚେତାବନୀ ଦେଇଛନ୍ତି ଯେ, ଗାଜା ଅନାହାର ଦ୍ୱାରରେ ପହଞ୍ଚିଛି । ଏଯାବତ୍ ୭୧ ଜଣ ଶିଶୁ କୁପୋଷଣ ଯୋଗୁଁ ଅଖି ବୁଜିଛନ୍ତି । ୬୦ ହଜାର ଶିଶୁ କୁପୋଷଣର ଲକ୍ଷଣରେ ପୀଡିତ ଅଛନ୍ତି । ଗତ ୨୪ ଘଣ୍ଟାରେ, ୧୯ ଜଣ ଲୋକ ଭୋକ ପାଇଁ ଆଖି ବୁଜିଛନ୍ତି । ଇସ୍ରାଏଲ୍ ସେନା ଗାଜାର ଦିର ଅଲ-ବାଲାହରେ ଲିଫଲେଟ୍ ପକାଇ ଲୋକଙ୍କୁ ଅଞ୍ଚଳ ଖାଲି କରିବାକୁ ଚେତାବନୀ ଦେଇଥିଲା ।
ଗଲାଣି ୫୮ ହଜାରରୁ ଅଧିକ ଜୀବନ- ଗାଜା ସ୍ୱାସ୍ଥ୍ୟ ମନ୍ତ୍ରଣାଳୟ ଅନୁଯାୟୀ, ଏହି ସଂଘର୍ଷରେ ଏପର୍ଯ୍ୟନ୍ତ ୫୮,୦୦୦ରୁ ଅଧିକ ପାଲେଷ୍ଟାଇନୀ ପ୍ରାଣ ହରାଇଛନ୍ତି । ଲକ୍ଷ ଲକ୍ଷ ସାଧାରଣ ନାଗରିକ ବିସ୍ତାପିତ ହୋଇଛନ୍ତି । ଗାଜା ଏବେ ମାନବୀୟ ସଂଙ୍କଟର ସମ୍ମୁଖୀନ ହୋଇଛି ।
ଯୁଦ୍ଧବିରତି ଚୁକ୍ତିନାମା ଉପରେ ଆଲୋଚନା ଅଟକିଛି- କତରରେ ଇସ୍ରାଏଲ ଏବଂ ହମାସ ମଧ୍ୟରେ ୬୦ ଦିନିଆ ଯୁଦ୍ଧବିରତି ଏବଂ ବନ୍ଧକ ଚୁକ୍ତିନାମା ଉପରେ ଆଲୋଚନା ଚାଲିଛି । ହେଲେ କିଛି ନିଷ୍କର୍ଷ ବାହାରୁନାହିଁ । ରବିବାର ଗାଜା ସୀମା ନିକଟରେ ଅନେକ ବିସ୍ଫୋରଣର ଶବ୍ଦ ଶୁଣାଯାଇଥିଲା । ଇସ୍ରାଏଲୀ ସେନା ତାର ସାମରିକ ଅଭିଯାନ ଜାରି ରଖିବ ବୋଲି କହିଛି ।
