ଭୁବନେଶ୍ୱର: ଏବେ ଅଧିକାଂଶ ଲୋକଙ୍କ କୋଲେଷ୍ଟରଲ ବୃଦ୍ଧି ଜନିତ ସମସ୍ୟା ଦେଖାଦେଉଛି । ତେଣୁ କୋଲେଷ୍ଟରଲ ସ୍ତରକୁ ନିୟନ୍ତ୍ରଣରେ ରଖିବା ଜରୁରି। ଆମ ଶରୀରରେ ଦୁଇ ପ୍ରକାର କୋଲେଷ୍ଟରଲ୍ ରହିଥାଏ । ଏଲ୍ଡିଏଲ୍(ବ୍ୟାଡ୍ କୋଲେଷ୍ଟରଲ୍) ଓ ଏଚ୍ଡିଏଲ(ଗୁଡ୍ କୋଲେଷ୍ଟେରଲ୍) । ଏଲ୍ଡିଏଲ୍ ହେଉଛି ଏକପ୍ରକାର ଲିପୋ-ପ୍ରୋଟିନ୍, ଯାହା କୋଲେଷ୍ଟରଲ୍କୁ ଲିଭର୍(ଯକୃତ)ରୁ ଜୀବକୋଷ ପର୍ଯ୍ୟନ୍ତ ନେଇଥାଏ । ଯଦି ଶରୀରରେ ଏଲ୍ଡିଏଲ୍ କୋଲେଷ୍ଟରଲ୍ ମାତ୍ରା ବଢ଼ିଯାଏ, ତେବେ ଧମନୀର ବିଭିନ୍ନ ରକ୍ତବାହୀ ନଳୀରେ ଜମାହୋଇ ରହେ । ଫଳରେ ହୃଦ୍ଘାତ ଆଶଙ୍କା ବଢ଼ିଚାଲେ । ଏହି ଏଲ୍ଡିଏଲ୍କୁ ନିୟନ୍ତ୍ରଣ ସ୍ତରରେ ରଖିବା ପାଇଁ ପ୍ରଥମେ କେତେକ ଖାଦ୍ୟ ଉପରେ ନିୟନ୍ତ୍ରଣ ରଖିବା ଆବଶ୍ୟକ।
- ଯଦି ଏଲ୍ଡିଏଲ୍ ବଢ଼ିଥାଏ, ନିୟମିତ ଅଧାଘଣ୍ଟାଏ ବ୍ୟାୟାମ, ଯୋଗ, ଏରୋବିକ୍, ଜଗିଂ କିମ୍ବା ରନିଂ କରିବା ଜରୁରି ।
- ଅଧିକ ଖାଦ୍ୟ ଖାଇବା ପରିବର୍ତ୍ତେ ପ୍ରତି ୩ରୁ ସାଢ଼େ ତିନି ଘଣ୍ଟା ଅନ୍ତରରେ ଅଳ୍ପ ଅଳ୍ପ ଖାଦ୍ୟ ଖାଇବେ । ନିୟମିତ ଖାଦ୍ୟ ଫାଇବରଯୁକ୍ତ ହେବା ଦରକାର । ତଟକା ସବୁଜ ପନିପରିବା, ସଜନା, କୋଶଳା ଓ ପାଳଙ୍ଗ ଶାଗ ପରି ଶାଗଜାତୀୟ ଖାଦ୍ୟ ଖାଇବେ । ଏହା ସହିତ ଫଳ, ଓଟ୍ସ, କିନୁଆ, ନାଲି ବୋର ଚାଉଳ, ଗହମ ଅଟା, ମାଣ୍ଡିଆ, ସୁଆଁ ଓ ବାଜରାକୁ ଖାଦ୍ୟରେ ସାମିଲ କରିପାରିବେ ।
- ସେହିପରି ପ୍ରୋଟିନ୍ଯୁକ୍ତ ଖାଦ୍ୟରେ ରାଜ୍ମା, ଟୋଫୁ, ସୋୟାବିନ୍, ତଡ଼କା, ଗଜାମୁଗ, ବୁଟ ଓ ବିଭିନ୍ନ ପ୍ରକାରର ଡାଲିଜାତୀୟ ଖାଦ୍ୟ ଖାଇପାରିବେ ।
- ଆମିଷରେ ଅଣ୍ଡାର ଧଳା ଅଂଶ, ମାଛ ସପ୍ତାହରେ ୨ରୁ ୩ ଥର ଖାଇପାରିବେ । - ଆଲମଣ୍ଡ, ୱାଲନଟ୍, ଚିଆ ସିଡ୍ ଓ ଫ୍ଲାକ୍ସିଡ୍ ଆଦି ଖାଇବେ । ରୋଷେଇରେ ରାଇସ୍ ବ୍ରାନ୍, କ୍ୟାନୋଲା ଅଏଲ୍ ଓ ଅଲିଭ୍ ଅଏଲ୍ର ବ୍ୟବହାର ସ୍ୱାସ୍ଥ୍ୟ ପାଇଁ ଭଲ । କିନ୍ତୁ ଏହାର ମାତ୍ରା ମାସକୁ ଅଧ ଲିଟର ଭିତରେ ରହିବା ଆବଶ୍ୟକ ।
- ଏହାଛଡ଼ା ନିୟମିତ ୩ରୁ ୪ ଲିଟର ପାଣି ପିଇବେ । ଫଳରେ ଶରୀର ଜଳଶୁଷ୍କତାର ଶିକାର ହେବନାହିଁ ।
କ’ଣ ଖାଇବେ ନାହିଁ
ବିଭିନ୍ନ ପ୍ରକାରର ଛଣା ଖାଦ୍ୟ ଯେପରିକି ବରା, ସିଙ୍ଗଡ଼ା, ମୁଡ଼୍କି, ଚିପ୍ସ୍ ଏବଂ ପିଜା, ବର୍ଗର୍, ରୋଲ୍ ସାଙ୍ଗକୁ ଚାଓମିନ୍ ଓ ବାହାର ଖାଦ୍ୟଠାରୁ ଦୂରେଇ ରହିବା ଜରୁରି । ସେହିପରି ଆମିଷରେ ମାଂସ, ଚିଙ୍ଗୁଡ଼ିକୁ ବାଦ୍ ଦେବାକୁ ପଡ଼ିଥାଏ । ଏହାବ୍ୟତୀତ ଡାଏରୀ ଉତ୍ପାଦ ମଧ୍ୟରୁ କ୍ରିମ୍, ବଟର୍, ଚିଜ୍, ପେଷ୍ଟ୍ରି, କେକ୍ ଓ ଅତ୍ୟଧିକ ଶର୍କରାଯୁକ୍ତ ଖାଦ୍ୟକୁ ବାଦ୍ ଦେବା ଉଚିତ । ପନିର ପରିବର୍ତ୍ତେ ଲୋ- ଫ୍ୟାଟ୍ ପନିର୍ ଓ ଟୋଫୁ ଖାଇପାରିବେ । ଲୋ-ଫ୍ୟାଟ୍ ପନିର୍ ଦିନକୁ ୪/୫ ଖଣ୍ଡ ଲେଖାଏଁ ସପ୍ତାହକୁ ୨/୩ ଥର ଖାଇପାରିବେ । ଯଦି ଘରେ ଲୋ ଫ୍ୟାଟ୍ କ୍ଷୀର ଆଣି ପନିର ନିଜେ ତିଆରି କରିପାରିବେ,ତେବେ ଆହୁରି ଭଲ ହେବ ।
