ଭୁବନେଶ୍ଵର, ୦୩/୧୧ : ଭୁବନେଶ୍ଵର କଳିଙ୍ଗ ଷ୍ଟାଡିୟମ୍ ପରିସରରେ ଥିବା ଟେନିସ୍ ସେଣ୍ଟରରେ ଆଜିଠାରୁ ଆରମ୍ଭ ହୋଇଛି ଆଇଟିଏଫ୍ ବିଶ୍ଵ ଟେନିସ୍ ଟୁର୍। ଏହି ପ୍ରତିଯୋଗିତାରେ ୧୧ଟି ଦେଶର ୮୮ଜଣ ଖେଳାଳି ଭାଗ ନେଇଛନ୍ତି। ଆୟୋଜକ ଭାରତ ସମେତ ଜାପାନ, ଆମେରିକା, ଋଷିଆ, ଚେକ୍ ରିପବ୍ଲିକ, ଜର୍ମାନୀ, ୟୁକ୍ରେନ, ମୋଲ୍ଡୋଭା,ନେପାଳ, ଇଣ୍ଡୋନେସିଆ, ଅଷ୍ଟ୍ରେଲିଆ ଭାଗ ନେଇଛନ୍ତି। ପ୍ରଥମ ଥର ପାଇଁ ୨୫ହଜାର USA ଡଲାର ପ୍ରତିଯୋଗିତା ଓଡ଼ିଶା ଆୟୋଜନ କରୁଛି। ଯୋଗ୍ୟତା ପର୍ଯ୍ୟାୟ ମ୍ୟାଚ୍ ସବୁ  ୭ଟା କୋର୍ଟରେ ଖେଳାଯିବ। ମୁଖ୍ୟ ଡ୍ରର ମ୍ୟାଚ୍ ସବୁ ୬ଟି କୋର୍ଟରେ ଖେଳାଯିବ । କ୍ରୀଡା ବିଭାଗ ଏବଂ ଓଡ଼ିଶା ଟେନିସ ଆସୋସିଏସନ୍ ମିଳିତ ସହଭାଗୀତାରେ ଆୟୋଜନ ହେଉଛି। 

ସୂଚନାନୁଯାୟୀ, ଓଡ଼ିଶାରୁ ୫ଜଣ ଖେଳାଳି ଭାରତ ପାଇଁ ଖେଳୁଛନ୍ତି । ସେମାନଙ୍କ ମଧ୍ୟରେ ୩ଜଣ ଖେଳାଳି କବୀର୍ ହଂସ, ଅମୃତଜୟ ମହାନ୍ତି ଏବଂ ପ୍ରତ୍ୟୁଷ ମହାନ୍ତି ମୁଖ୍ୟ ଡ୍ରରେ ଖେଳୁଥିବା ବେଳେ ଦେବାଶିଷ ସାହୁ ଆଦିତ୍ୟ ଶତପଥୀ ଯୋଗ୍ୟତା ପର୍ଯ୍ୟାୟରେ ଖେଲୁଛନ୍ତି। ଓଡ଼ିଆ ଖେଳାଳିଙ୍କୁ ଆନ୍ତର୍ଜାତିକ ପ୍ଲାଟଫର୍ମ ଯୋଗାଇ ଦେବା ଲକ୍ଷ୍ୟରେ ଏହି ଟେନିସ୍ ଟୁର୍ ଆୟୋଜନ ହୋଇଛି। ଦର୍ଶକଙ୍କ ଲାଗି ନିଶୁଳ୍କ ପ୍ରବେଶ ରହିଛି। ଏନେଇ ଆଜି ଏକ ସାମ୍ବାଦିକ ସମ୍ମିଳନୀ କରି ଓଡ଼ିଶା ଟେନିସ୍ ଆସୋସିଏସନ ପକ୍ଷରୁ ସୂଚନା ଦିଆଯାଇଛି।