ଚନ୍ଦନେଶ୍ୱର,୧୨/୧୨: ପଶ୍ଚିମବଙ୍ଗ ସରକାରଙ୍କ ପକ୍ଷରୁ ଦୀଘାରେ ନିର୍ମାଣ ହୋଇଥିବା ଶ୍ରୀଜଗନ୍ନାଥ ଧାମ(ମନ୍ଦିର) ଆସନ୍ତା ଏପ୍ରିଲ ୩୦ ତାରିଖ ପବିତ୍ର ଅକ୍ଷୟ ତୃତୀୟାରେ ପ୍ରତିଷ୍ଠା ହେବ ବୋଲି ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ମମତା ବାନାର୍ଜୀ କହିଛନ୍ତି ।
ବୁଧବାର ଦୀଘା ଜଗନ୍ନାଥ ଧାମ ପରିସରରେ ଅନୁଷ୍ଠିତ ସାମ୍ବାଦିକ ସମ୍ମିଳନୀରେ ମମତା କହିଛନ୍ତି, ପୁରୀ ଶ୍ରୀମନ୍ଦିର ଉଚ୍ଚତା ସହ ଏହି ମନ୍ଦିର ଉଚ୍ଚତା ପ୍ରାୟ ସମାନ । ପୁରୀ ଜଗନ୍ନାଥ ସଂସ୍କୃତିକୁ ଗୁରୁତ୍ୱ ଦେଇ ଏଠାରେ ସମସ୍ତ ରୀତିନୀତି ହେବ । ଦୀଘାକୁ ଏକ ଧାର୍ମିକ ପର୍ଯ୍ୟଟନସ୍ଥଳୀ ଭାବେ ବିକଶିତ କରାଯିବ । ଏଥିସହ ରଥଯାତ୍ରା ଦିନ ଛେରା ପହଁରା ନିମନ୍ତେ ସୁନା ଝାଡୁ ପାଇଁ ତାଙ୍କ ବ୍ୟକ୍ତିଗତ ପାଣ୍ଠିରୁ ୫ଲକ୍ଷ ଟଙ୍କା ଦେବେ ବୋଲି ଘୋଷଣା କରିଛନ୍ତି ମମତା ।
ପଶ୍ଚିମବଙ୍ଗ ପୂର୍ବ ମେଦିନୀପୁର ଜିଲ୍ଲାର ଦୀଘାକୁ ୩ଦିନିଆ ଗସ୍ତରେ ଆସି ମମତା ବୁଧବାର ଦ୍ୱିତୀୟ ଦିନରେ ପ୍ରାଶାସନିକ ସ୍ତରୀୟ ବୈଠକ କରିଥିଲେ । ପରେ ମଧ୍ୟାହ୍ନ ୧ଟା ୩୫ରେ ଦୀଘା ଜଗନ୍ନାଥ ଧାମରେ ପହଞ୍ଚିଥିଲେ । ଏକଦା ଦୀଘା ବେଳାଭୂମିରେ ବୁଲୁଥିବା ବେଳେ ଏକ ଜଗନ୍ନାଥ ମନ୍ଦିର ନିର୍ମାଣର ପରିକଳ୍ପନା କରିଥିବା କଥା ଉଲ୍ଲେଖ କରିଥିଲେ । ଏଥିପାଇଁ ବଙ୍ଗ ସରକାର ଟଙ୍କା ଖର୍ଚ୍ଚ କରୁଥିବା ସୂଚନା ଦେଇଥିଲେ । ପ୍ରାୟ ୨୦ ଏକର ଜାଗାରେ ୨୫୦ କୋଟି ବ୍ୟୟରେ ନିର୍ମାଣ ହୋଇଥିବା ଏହି ମନ୍ଦିର ପରିସରରେ ପୂଜା ମଣ୍ଡପ, ଭୋଗ ମଣ୍ଡପ, ଗୋଦାମ ଗୃହ, ଅତିଥି ଭବନ ଆଦି ନିର୍ମାଣ ହୋଇଛି । ମାର୍ବଲରେ ୩ ଦିଅଁଙ୍କ ମୂର୍ତ୍ତି ନିର୍ମାଣ ସରିଥିବା ବେଳେ ନିମ୍ବ କାଠରେ ଆଉ ୩ ମୂର୍ତ୍ତି ନିର୍ମାଣ ଚାଲିଛି । ଏହାଛଡ଼ା ମନ୍ଦିର ପରିସରରେ ମା’ ବିମଳା ଓ ରାଧାକୃଷ୍ଣଙ୍କ ମନ୍ଦିର ରହିବ । ପୁରୀରେ ଖଜା ମିଳୁଥିବା ବେଳେ ଏଠାରେ ବାଂଲା କ୍ଷୀର ଗଜା, କାଲିଘାଟ ପେଡ଼ା ବିକ୍ରି ହେବ । ଏଠାରେ ସ୍ୱର୍ଗଦ୍ୱାର ମଧ୍ୟ ରହିଛି । ପୁରୀ ଭଳି ପ୍ରତିଦିନ ଏଠାରେ ନେତ ପରିବର୍ତ୍ତନ ହେବ । ପୁରୀରେ ବଂଶାନୁକ୍ରମିକ ଭାବେ କାର୍ଯ୍ୟ କରୁଥିବା ବ୍ୟକ୍ତିଙ୍କୁ ଅଣାଯାଇ ଏହି କାର୍ଯ୍ୟ ସମ୍ପାଦନ ହେବ । ପୁରୀ ସହିତ ଏଠାକୁ ତୁଳନା କରାଯିବ ନାହିଁ ବୋଲି ମମତା କହିଛନ୍ତି । ଅନ୍ୟପଟେ ମନ୍ଦିର ପରିଚାଳନା ପାଇଁ ମୁଖ୍ୟ ଶାସନ ସଚିବଙ୍କ ନେତୃତ୍ୱରେ ଏକ ଟ୍ରଷ୍ଟ୍ ଗଠନ ହୋଇଛି । ପ୍ରତିବର୍ଷ କୋଲକାତା ଇସ୍କନ ରଥଯାତ୍ରାକୁ ମମତା ଉଦ୍ଘାଟନ କରୁଥିବା ବେଳେ ଆସନ୍ତା ବର୍ଷ ଦୀଘାରେ ରଥଯାତ୍ରାକୁ ଉଦ୍ଘାଟନ କରିବେ ବୋଲି ଜଣାପଡ଼ିଛି ।
