ନୂଆଦିଲ୍ଲୀ: ଜୟପୁର ସିରିଏଲ ବିସ୍ଫୋରଣର ଜୀବନ୍ତ ବୋମା ମାମଲାରେ ଚାରି ଜଣ ଆତଙ୍କବାଦୀଙ୍କୁ ଆଜୀବନ କାରାଦଣ୍ଡ ମିଳିଛି । ଜୟପୁରର ସ୍ୱତନ୍ତ୍ର କୋର୍ଟ ସୈଫୁରରହମାନ, ମହମ୍ମଦ ସୈଫ, ମହମ୍ମଦ ସରୱାର ଆଜମୀ ଏବଂ ଶାହବାଜ ଅହମ୍ମଦଙ୍କୁ ଦୋଷୀ ସାବ୍ୟସ୍ତ କରି ଆଜି (ମଙ୍ଗଳବାର) ଦଣ୍ଡ ଘୋଷଣା କରିଛନ୍ତି। କୋର୍ଟ ୬ଶହ ପୃଷ୍ଠାରେ ତାଙ୍କର ବିସ୍ତୃତ ନିଷ୍ପତ୍ତି ଦେଇଛନ୍ତି।
୨୦୦୮ ମସିହା ମେ ୧୩ରେ ଜୟପୁରରେ ଏକ ସିରିୟଲ ବିସ୍ଫୋରଣ ଘଟଣା ଘଟିଥିଲା। ଜୟପୁରରେ ଗୋଟିଏ ପରେ ଗୋଟିଏ ଆଠଟି ବୋମା ବିସ୍ଫୋରଣ ଘଟିଥିଲା। ଚାନ୍ଦପୋଲ ବଜାରର ଏକ ମନ୍ଦିର ନିକଟରେ ଏକ ବୋମା ମିଳିଥିଲା ଯାହାକୁ ପରେ ନିଷ୍କ୍ରିୟ କରାଯାଇଥିଲା। ସମଗ୍ର ଦେଶକୁ ଥରାଇ ଦେଇଥିବା ଏହି ସିରିଏଲ ବିସ୍ଫୋରଣରେ ୭୧ ଜଣ ପ୍ରାଣ ହରାଇଥିଲେ।
ଜୟପୁର ବୋମା ବିସ୍ଫୋରଣ ସହିତ ଜଡିତ ଆଠଟି ଭିନ୍ନ ଭିନ୍ନ ମାମଲାରେ ଏହି ଚାରି ଜଣଙ୍କୁ ମୃତ୍ୟୁଦଣ୍ଡ ଦିଆଯାଇଥିଲା। ପରେ, ରାଜସ୍ଥାନ ହାଇକୋର୍ଟ ମାର୍ଚ୍ଚ ୨୦୨୩ ରେ ସମସ୍ତଙ୍କୁ ନିର୍ଦ୍ଦୋଷରେ ଖଲାସ କରିଥିଲେ। ୧୭ ବର୍ଷ ପୁରୁଣା ଏହି ମାମଲାରେ, ସରକାରୀ ଓକିଲ ୧୧୨ ଜଣ ସାକ୍ଷୀଙ୍କ ବୟାନ ରେକର୍ଡ କରିଥିଲେ ଏବଂ କୋର୍ଟରେ ପ୍ରାୟ ୧୨ ଶହ ପୃଷ୍ଠାର ଦସ୍ତାବିଜ ଉପସ୍ଥାପନ କରିଥିଲେ।
ଚାନ୍ଦପୋଲରେ ମିଳିଥିବା ନବମ ଜୀବନ୍ତ ବୋମା ମାମଲାରେ କୋର୍ଟରେ ଏକ ଅଲଗା ଶୁଣାଣି ହୋଇଥିଲା। ୪ ଏପ୍ରିଲ ୨୦୨୫ରେ, ଜୟପୁରର ସ୍ୱତନ୍ତ୍ର କୋର୍ଟ ଚାରି ଜଣ ଅଭିଯୁକ୍ତଙ୍କୁ ଦୋଷୀ ସାବ୍ୟସ୍ତ କରିଥିଲେ। ସୂଚନାଥାଉକି,ଯେ ୨୦୦୮ ମେ ୧୩ ସନ୍ଧ୍ୟାରେ ରାଜଧାନୀ ଜୟପୁରର ଜନଗହଳିପୂର୍ଣ୍ଣ ଅଞ୍ଚଳରେ ସନ୍ଧ୍ୟା ପ୍ରାୟ ସାଢେ ୭ଟା ସମୟରେ ଆଠଟି ବିସ୍ଫୋରଣ ଘଟିଥିଲା। ଏହି ବିସ୍ଫୋରଣରେ ୧୮୫ ରୁ ଅଧିକ ଲୋକ ଆହତ ମଧ୍ୟ ହୋଇଥିଲେ। ଜୋହରି ବଜାର, ସାଙ୍ଗାନେରୀ ଗେଟ୍, ଚାନ୍ଦପୋଲ ବଜାର ଏବଂ ତ୍ରିପୋଲିଆ ବଜାର ଭଳି ବ୍ୟସ୍ତବହୁଳ ସ୍ଥାନରେ ବିସ୍ଫୋରଣ ଘଟିଥିଲା।
ଏହି ମାମଲାରେ ପୋଲିସ ମୋଟ ୧୩ ଜଣଙ୍କୁ ଅଭିଯୁକ୍ତ କରିଥିଲା। ତିନି ଜଣ ଅଭିଯୁକ୍ତ ଏବେ ବି ଫେରାର୍ ଅଛନ୍ତି, ଯେତେବେଳେ କି ଦୁଇଜଣ ହାଇଦ୍ରାବାଦ ଏବଂ ଦିଲ୍ଲୀ ଜେଲରେ ବନ୍ଦୀ ଅଛନ୍ତି। ବାକି ଦୁଇ ଜଣ ଦିଲ୍ଲୀର ବାଟଲା ହାଉସ୍ ଏନକାଉଣ୍ଟରରେ ନିହତ ହୋଇଥିଲେ।
