ନୂଆଦିଲ୍ଲୀ: ରାଜସ୍ଥାନର ଜୈସଲମେରରେ ଏକ ଯାତ୍ରୀବାହୀ ବସ୍ରେ ନିଆଁ ଲାଗିଯିବା କାରଣରୁ ପ୍ରାୟ ୨୦ ଜଣଙ୍କର ଦୁଃଖଦ ମୃତ୍ୟୁ ଘଟିଛି। ଏହି ବସ୍ଟି ଜୈସଲମେରରୁ ଯୋଧପୁର ଯାଉଥିଲା । ଏଥିରେ ୫୦ ରୁ ଅଧିକ ଯାତ୍ରୀ ଯାତ୍ରା କରୁଥିଲେ। ବସ୍ରୁ ୧୯ ଜଣ ଯାତ୍ରୀଙ୍କ ମୃତଦେହ ଉଦ୍ଧାର କରାଯାଇଛି। ଏହା ସହିତ, ଯୋଧପୁରକୁ ସ୍ଥାନାନ୍ତରିତ ହୋଇଥିବା ଜଣେ ଯାତ୍ରୀଙ୍କ ମୃତ୍ୟୁ ହୋଇଛି। ଏନେଇ ଜଣେ ଅଧିକାରୀ କହିଛନ୍ତି ଯେ, ସମସ୍ତ ମୃତଦେହ ଗୁରୁତର ଭାବରେ ପୋଡ଼ିଯାଇଛି, ଯାହା ଦ୍ୱାରା ଚିହ୍ନଟ କଷ୍ଟକର ହେଉଛି। ସମସ୍ତ ମୃତଦେହରୁ ଡିଏନଏ ନମୁନା ନିଆଯାଇଛି। ପରିବାର ସଦସ୍ୟଙ୍କ ସହିତ ଡିଏନଏ ମେଳ କରାଯିବ। ମୃତଦେହ ଚିହ୍ନଟ କରିବାରେ ଅସମର୍ଥ ହେତୁ, ମୃତକଙ୍କ ତାଲିକା ଏପର୍ଯ୍ୟନ୍ତ ପ୍ରକାଶ କରାଯାଇ ନାହିଁ।
ବିଧାୟକ ମହନ୍ତ ପ୍ରତାପ ପୁରୀ କହିଛନ୍ତି ଯେ, ପ୍ରାଥମିକ ସୂଚନା ଅନୁଯାୟୀ ସର୍ଟସର୍କିଟ୍ ଯୋଗୁଁ ଅଗ୍ନିକାଣ୍ଡ ଘଟିଥାଇପାରେ। ପୁରୀଙ୍କ ଅନୁଯାୟୀ, ଯଦି ନିୟମ ଅନୁଯାୟୀ ବସ୍ର ପଛ ଦ୍ୱାର ଥାଆନ୍ତା, ତେବେ ଅନେକ ଜୀବନ ବଞ୍ଚାଯାଇ ପାରିଥାନ୍ତା। ବସ୍ର ଡିଜାଇନ୍ ମାନକ ଅନୁଯାୟୀ ନଥିଲା, ଯାହା ଫଳରେ ଅନେକ ଲୋକଙ୍କ ମୃତ୍ୟୁ ଘଟିଛି।
ମୁଖ୍ୟମନ୍ତ୍ରୀ ଭଜନଲାଲ ଶର୍ମା ଜୈସଲମେର ବସ୍ ଦୁର୍ଘଟଣାରେ ଦୁଃଖ ପ୍ରକାଶ କରିଛନ୍ତି। ସେ ଫୋନ୍ ମାଧ୍ୟମରେ କଲେକ୍ଟର ଏବଂ ଏସପିଙ୍କ ସହ କଥା ହୋଇଛନ୍ତି ଏବଂ ପୀଡିତ ମାନଙ୍କୁ ସମସ୍ତ ପ୍ରକାରର ସହାୟତା ପ୍ରଦାନ କରିବାକୁ ନିର୍ଦ୍ଦେଶ ଦେଇଛନ୍ତି। ଦୁର୍ଘଟଣାରେ ପୋଡ଼ି ଯାଇଥିବା ଅନେକ ଯାତ୍ରୀଙ୍କ ଅବସ୍ଥା ଗୁରୁତର ଥିବା ଜଣାପଡିଛି ଏବଂ ସେମାନଙ୍କୁ ଯୋଧପୁରକୁ ପଠାଯାଇଛି। ଅଗ୍ନିଶମ ଅଧିକାରୀଙ୍କ ଅନୁଯାୟୀ, ଅନେକ ଲୋକଙ୍କୁ ଅକ୍ସିଜେନ୍ ସପୋର୍ଟରେ ରଖାଯାଇଛି। ଏହି ସମୟରେ, ମୁଖ୍ୟମନ୍ତ୍ରୀ ଭଜନଲାଲ ଶର୍ମା ନିରନ୍ତର ଅଧିକାରୀ ମାନଙ୍କୁ ମାର୍ଗଦର୍ଶନ କରୁଛନ୍ତି। ମୁଖ୍ୟମନ୍ତ୍ରୀ ଆଜି ରାତି କିମ୍ବା ଆସନ୍ତାକାଲି ସକାଳେ ଜୈସଲମେର ଯାତ୍ରା କରିପାରନ୍ତି।
ସୂଚନା ମୁତାବକ ଜୈସଲମେର ଛାଡିବାର କିଛି ଦୂରରେ ହଠାତ୍ ବସ୍ ର ପଛ ଭାଗରେ ନିଆଁ ଲାଗିଗଲା। କିଛି ମୁହୂର୍ତ୍ତ ମଧ୍ୟରେ ସମ୍ପୂର୍ଣ୍ଣ ବସ୍ ନିଆଁରେ ପୋଡ଼ିଗଲା। ରିପୋର୍ଟ ଅନୁସାରେ, ଆଗ ଭାଗରେ ବସିଥିବା ଯାତ୍ରୀମାନେ କୌଣସି ପ୍ରକାରେ ଖସି ପଳାଇବାରେ ସଫଳ ହୋଇଥିଲେ, କିନ୍ତୁ ପଛ ଭାଗରେ ଥିବା ଯାତ୍ରୀମାନେ ଜଳି ଯାଇଛନ୍ତି।
