ନୂଆଦିଲ୍ଲୀ,୨୬।୪: ଜମ୍ମୁ-କଶ୍ମୀରର କୁପଓ୍ବାଡା ଜିଲ୍ଲାରେ ସୁରକ୍ଷାକର୍ମୀ ଶନିବାର ଆତଙ୍କୀ ଆଡ୍ଡାକୁ କରିଛନ୍ତି ଧ୍ବଂସ। ଏହା ସହ ବହୁ ପରିମାଣରେ ହତିଆର ଓ ଗୋଳା-ବାରୁଦ ଜବତ କରିଛନ୍ତି। ପହଲଗାମ୍ରେ ୨୬ ଜଣଙ୍କୁ ହତ୍ୟା କରିବାର କିଛି ଦିନ ପରେ ଏହି ପଦକ୍ଷେପ ନିଆଯାଇଛି। ପୋଲିସ ଅଧିକାରୀ କହିଛନ୍ତି, ଗୁଇନ୍ଦା ଏଜେନ୍ସିର ସୂଚନା ଆଧାରରେ ଏହି କାର୍ଯ୍ୟାନୁଷ୍ଠାନ ଗ୍ରହଣ କରାଯାଇଛି।
ଉତ୍ତର କାଶ୍ମୀର ଜିଲ୍ଲାର ସୈନ୍ଦୋରି ନାଲା, ମୁସ୍ତକାବାଦ ମାଛିଲର ଜଙ୍ଗଲ ଅଞ୍ଚଳରେ ସୁରକ୍ଷା ବଳ ତଲାସୀ ଅଭିଯାନ ଆରମ୍ଭ କରିଥିଲେ। ସେ କହିଥିଲେ, ଅପରେସନ୍ ବେଳେ ଆତଙ୍କୀ ଆଡ୍ଡା ବିଷୟରେ ଜଣାପଡିଥିଲା, ତାକୁ ଧ୍ବଂସ କରି ଦିଆଯାଇଛି।
ପୋଲିସ ଅଧିକାରୀଙ୍କ କହିବା ଅନୁସାରେ, ଘଟଣାସ୍ଥଳରେ ବହୁ ପରିମାଣରେ ହତିଆର ଓ ଗୋଳାବାରୁଦ ଜବତ କରାଯାଇଛି। ଏଥିରେ ୫ ଏକେ-୪୭ ରାଇଫଲ, ୮ଟି ଏକେ-୪୭ ମାଗାଜିନ୍, ଗୋଟିଏ ପିସ୍ତଲ ମାଗାଜିନ୍, ୬୬୦ ରାଉଣ୍ଡ ଏକେ-୪୭ ଗୋଳାବାରୁଦ, ଗୋଟିଏ ପିସ୍ତଲ ରାଉଣ୍ଡ, ୫୦ ରାଉଣ୍ଡ ଏମ୍୪ ଗୋଳା-ବାରୁଦ ରହିଛି। ସେ କହିଛନ୍ତି, ଏହା ଏକ ବଡ଼ ସଫଳତା। ଆତଙ୍କବାଦୀ ଏହି ଅଞ୍ଚଳରେ ଶାନ୍ତି ଓ ବ୍ୟବସ୍ଥାକୁ ଭଙ୍ଗ କରୁଥିବା ଗତିବିଧିର ଯୋଜନା ତିଆରି କରୁଛନ୍ତି, ଯାହାକୁ ବିଫଳ କରି ଦିଆଯାଇଛି। ସୁରକ୍ଷାବଳ ଠିକ୍ ସମୟରେ କାର୍ଯ୍ୟାନୁଷ୍ଠାନ ଗ୍ରହଣ କରିବା ପରେ ଆତଙ୍କୀଙ୍କୁ ଲାଗିଛି ବଡ଼ ଝଟକା।
