ବାଲେଶ୍ୱର, ୨୩/୦୬; ଯାତ୍ରା ସିଂହବାହିନୀ ବିରୋଧରେ ସାଂଘାତିକ୍ ଅଭିଯୋଗ । ମାଲିକ ସଞ୍ଜୀବ ପାଢୀ ପାଉଣା ଦେଇନଥିବା ସାମାଜିକ ଗଣମାଧ୍ୟମରେ ଅଭିଯୋଗ କରିଥିଲେ ଆଗ ଧାଡ଼ିର ଯାତ୍ରା କଳାକାର କାହ୍ନା ସ୍ୱାଇଁ । ହେଲେ ଯାତ୍ରା ପାର୍ଟି ମାଲିକ ସଞ୍ଜୀବ ପାଢୀ ଏହାକୁ ଖଣ୍ଡନ କରିଛନ୍ତି । ଏନେଇ ରବିବାର ସନ୍ଧ୍ୟାରେ ବାଲେଶ୍ବରର ସ୍ଥାନୀୟ ଷ୍ଟେସନ କ୍ଲବରେ ସାମ୍ବାଦିକ ସମ୍ମିଳନୀ କରି ସ୍ପଷ୍ଟୋକ୍ତି ଦେଇଛନ୍ତି ।
ସିଂହବାହିନୀ ମାଲିକ ସଞ୍ଜୀବ ପାଢ଼ୀ କହିଛନ୍ତି, ଅଭିନେତା କାହ୍ନା ସ୍ୱାଇଁ ୨୦ ଲକ୍ଷ ଟଙ୍କା ଅଗ୍ରୀମ ନେଇଥିଲେ । ଯାତ୍ରା ପାର୍ଟି ଛାଡ଼ିବାରୁ ସେ ସେହି ଟଙ୍କାରୁ ୧୮ଲକ୍ଷ ଟଙ୍କା ଫେରାଇଛନ୍ତି । ଏବେବି ୨ ଲକ୍ଷ ଟଙ୍କା ତାଙ୍କ ପାଖରେ ରହିଛି । ଏହାଛଡ଼ା ସେ କାହ୍ନାଙ୍କ ନାଁରେ ଗମ୍ଭୀର ଅଭିଯୋଗ ମଧ୍ଯ ଆଣିଛନ୍ତି । ବାରମ୍ବାର ବିଭିନ୍ନ କର୍ମଚାରୀଙ୍କ ସମେତ ମ୍ୟାନେଜରଙ୍କୁ ମାଡ଼ ମାରିବା ସହିତ ଦୁର୍ବ୍ୟବହାର ଦେଖାଉଥିଲେ । ଯାତ୍ରା ପାର୍ଟିରେ ରହି ତାଙ୍କୁ ବିଭିନ୍ନ ଖର୍ଚ୍ଚାନ୍ତ କରିଛନ୍ତି । ଯଦି ତାଙ୍କର କୌଣସି ପ୍ରାପ୍ୟ ପାଇବାର ଅଛି, ତା’ ହେଲେ ସେ ମାଲିକଙ୍କ କାର୍ଯ୍ୟାଳୟକୁ ଆସି ହିସାବ କରନ୍ତୁ ଏବଂ ଟଙ୍କା ପାରିବାର ଥିଲେ ନେଇଯାଆନ୍ତୁ । ଯଦି ଫେରାଇବାକୁ ଥାଏ ତେବେ ଫେରାଇ ଦିଅନ୍ତୁ ବୋଲି ସିଂହବାହିନୀ ମାଲିକ ସଞ୍ଜୀବ ପାଢୀ କହିଛନ୍ତି । ଏହି ସାମ୍ବାଦିକ ସମ୍ମିଳନରେ ଯାତ୍ରା ପାର୍ଟି ମ୍ୟାନେଜର ସନାତନ ଜେନା, ରାଜେନ୍ଦ୍ର ମହାନ୍ତି ଉପସ୍ଥିତ ଥିଲେ । ଅନ୍ୟପଟେ ଅଭିନେତା ଶ୍ରୀ ସ୍ୱାଇଁଙ୍କ ଏଯାଏଁ ପ୍ରତିକ୍ରିୟା ମିଳିପାରିନି ।
