ଭୁବନେଶ୍ୱର,୦୭/୦୨: ମାଟି ତଳେ ଭୂତଳ ରାସ୍ତା । ଉପରେ ଚକାଚକ୍ ସଡ଼କ । ପୁଣି ଛିଡ଼ା ହେବ ଫ୍ଲାଏଓଭର । ଏସବୁ ଉପରେ ଦୌଡ଼ିବ ମେଟ୍ରୋ । ଜୟଦେବବିହାର ଛକକୁ ନେଇ ଏମିତି ମେଗା ଯୋଜନା କରିଛି ପୂର୍ତ୍ତ ବିଭାଗ ।
ଜୟଦେବ ବିହାରରୁ ନନ୍ଦନକାନନ ପର୍ଯ୍ୟନ୍ତ ନିର୍ମାଣ ହେବ ଫ୍ଲାଏଓଭର । ଏହା ପୂର୍ବରୁ ବଦଳିଯିବ ଜୟଦେବ ବିହାର ଛକ ଓ ରାସ୍ତାର ଚେହେରା । ପ୍ରଥମେ ଜୟଦେବ ବିହାର ଓଭରବ୍ରିଜ୍ ଭଙ୍ଗା ହେବ । କଳିଙ୍ଗ ଷ୍ଟାଡିୟମ ପଟୁ ଆସୁଥିବା ରାସ୍ତା ତଳେ ଖୋଲିବ ଭୂତଳ ରାସ୍ତା । ଏହି ଭୂତଳ ରାସ୍ତା ଲମ୍ବିବ ପାଲ୍ ହାଇଟ୍ସ ପର୍ଯ୍ୟନ୍ତ । ସେଠି ଥିବା ଫୁଟଓଭର ବ୍ରିଜ୍ ହଟିବ ।
ଜୟଦେବ ବିହାର ରାସ୍ତାକୁ ନୂଆ ରୂପ ଦିଆଯିବ । ଗୋଲେଇ ଛକ ନିର୍ମାଣ ହେବ । କଳିଙ୍ଗ ଷ୍ଟାଡିୟମ ପଟୁ ଆସୁଥିବା ହାଲୁକା ଯାନ (କାର୍, ଦୁଇ ଚକିଆ, ଅଟୋ ଆଦି ଗାଡ଼ିମୋଟର) ଭୂତଳ ରାସ୍ତା ଦେଇ ପାଲ ହାଇଟ୍ସ ପର୍ଯ୍ୟନ୍ତ ଯିବେ । ସେହିପରି ବସ୍, ଟ୍ରକ ଓ ଅନ୍ୟାନ୍ୟ ଭାରୀଯାନ ଭୂତଳ ରାସ୍ତା ଉପରେ ଥିବା ସଡ଼କ ଦେଇ ଆଗକୁ ଆସିବେ । ପାଲହାଇଟ୍ସ ପାଖରୁ ସମସ୍ତ ଗାଡ଼ିମୋଟର ସିଧା ଫ୍ଲାଏଓଭର ଚଢ଼ିବେ । ଏହି ଫ୍ଲାଏଓଭର ପୂରା ନନ୍ଦନକାନନ ଛକ ପର୍ଯ୍ୟନ୍ତ ନିର୍ମାଣ ହେବ । ମଝିରେ ଥିବା ନାଲ୍କୋ ଛକ, ଚନ୍ଦ୍ରଶେଖରପୁର ଡମଣା ଛକ, ପଟିଆ ଛକ, କିଟ୍ ଛକ, ରଘୁନାଥପୁର ଛକ ରାସ୍ତା ଫ୍ଲାଏଓଭର ସହ ସଂଯୋଗ ହେବ । ଏଭଳି ହେଲେ ଯେ କେହି ଆରାମରେ ଫ୍ଲାଏଓଭରକୁ ଚଢ଼ିପାରିବେ । ଏହାସହ ଫ୍ଲାଏଓଭରର ଗାଡ଼ିମୋଟର ତଳେ ଥିବା ବିଭିନ୍ନ ସର୍ଭିସ ରାସ୍ତାକୁ ଆସିପାରିବେ । ଏହି ଯୋଜନାକୁ ସାକାର କରିବା ପାଇଁ ପୂର୍ତ୍ତ ବିଭାଗ ପ୍ରାୟ ୩୫୦୦ କୋଟି ଟଙ୍କାର ଖର୍ଚ୍ଚ ଆକଳନ କରାଯାଇଛି । ଏହାର ବିସ୍ତୃତ ପ୍ରକଳ୍ପ ଯୋଜନା (ଡିପିଆର୍) ପ୍ରସ୍ତୁତି ପାଇଁ ମୁଖ୍ୟମନ୍ତ୍ରୀଙ୍କ ଅନୁମୋଦନ ମିଳିସାରିଛି । ଖୁବଶୀଘ୍ର ଡିପିଆର୍ ପ୍ରସ୍ତୁତ କରାଯିବ ।
ବଡ଼ କଥା ହେଲା, ଏହି ଫ୍ଲାଏଓଭର ଉପରେ ଯିବ ମେଟ୍ରୋ ରେଳ । ପୂରା ଏଲିଭେଟେଡେ୍ କରିଡରରେ ନିର୍ମାଣ ହେବ ମେଟ୍ରୋ ରେଳ ପଥ ଓ ଫ୍ଲାଏଓଭର । ଏ ନେଇ ଭୁବନେଶ୍ୱର ମେଟ୍ରୋ ରେଳ କର୍ପୋରେସନ (ବିଏମ୍ଆର୍ସିଏଲ୍) ଏବଂ ପୂର୍ତ୍ତ ବିଭାଗ ସମନ୍ୱିତ ଭାବେ କାର୍ଯ୍ୟ କରିବେ । ରାଜଧାନୀରେ ଟ୍ରାଫିକ ସମସ୍ୟା ଦୂର ପାଇଁ ଜୟଦେବବିହାରରୁ ନନ୍ଦନକାନନ ପର୍ଯ୍ୟନ୍ତ ଏଭଳି ବିସ୍ତୃତ ଯୋଜନା କରାଯାଇଛି । ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ଏ ନେଇ ବିଶେଷ ଗୁରୁତ୍ୱ ଦେଇଛନ୍ତି । ଏହାକୁ ତ୍ୱରିତ ବେଗରେ ଆଗେଇବା ପାଇଁ ବିଭାଗକୁ ନିର୍ଦ୍ଦେଶ ଦିଆଯାଇଛି ।
