ଗଡ଼ମଧୁପୁର, ୧୦/୦୨ : ପାରିବାରିକ କଳହର କରୁଣ ପରିଣତି। ଫ୍ୟାନରେ ଝୁଲି ପଡ଼ିଲେ ଦମ୍ପତି। ଯାଜପୁର ଜିଲ୍ଲା ଜେନାପୁର ଥାନା ମଧୁପୁରଗଡ଼ ପଞ୍ଚାୟତର କୁକୁଡ଼ା ଖାଳେଇ ଗ୍ରାମରେ ଏଭଳି ଅଭାବନୀୟ ଘଟଣା ଘଟିଛି। ଖବର ପାଇ ପୁଲିସ ଘଟଣାସ୍ଥଳରେ ପହଞ୍ଚି ଶବ ଜବତ କରି ତଦନ୍ତ ଆରମ୍ଭ କରିଛି। ମୃତ ଦମ୍ପତି ବାବୁଲା ମଲିକଙ୍କ ପୁଅ ଜଜ ମଲିକ(୨୪ ବର୍ଷ) ଏବଂ ତାଙ୍କ ବୋହୂ ଝରଣା ମଲିକ (୨୨ ବର୍ଷ)।
ସୂଚନାନୁଯାୟୀ, ଜେନାପୁର ଥାନା ମଧୁପୁରଗଡ଼ ପଞ୍ଚାୟତର କୁକୁଡ଼ା ଖାଳେଇ ଗାଁର ବାବୁଲା ମଲିକଙ୍କ ପରିବାରରେ କୌଣସି କାରଣରୁ ଗତ କିଛି ଦିନ ହେବ କଳହ ଲାଗି ରହିଥିଲା। ସୋମବାର ରାତି ପ୍ରାୟ ସାଢେ ୯ଟାରେ ଗାଁରେ ଅଷ୍ଟପ୍ରହରୀ ଚାଲୁଥିବା ବେଳେ ପୁଅ ଜଜ୍ ଓ ବୋହୂ ଝରଣା ଅଷ୍ଟପ୍ରହରୀକୁ ଆସି ଠାକୁରଙ୍କ ନିକଟରେ ପୂଜାର୍ଚ୍ଚନା କରି ଘରକୁ ଫେରିଥିଲେ। ଘରେ ଯାଇ ଉଭୟେ ମିଶି ଖାଇଥିଲେ। ପରେ ପୁଅ ଜଜ ଅଷ୍ଟପ୍ରହରୀକୁ ନ ଆସିବା ହେତୁ ବାପା ବାବୁଲା ଘରକୁ ତାକୁ ଡାକିବାକୁ ଯାଇଥିଲେ। ହେଲେ କବାଟ ବନ୍ଦ ଥିବାରୁ ଓ କେହି ନଶୁଣିବାରୁ କିଛି ଅଘଟଣ ସନ୍ଦେହ କରି କବାଟ ଭାଙ୍ଗିଥିଲେ। ଉଭୟେ ଏକ ଫ୍ୟାନରେ ଝୁଲୁଥିବା ଦେଖିବାକୁ ପାଇଥିଲେ। ସେମାନଙ୍କୁ ଉଦ୍ଧାର କରି ଆମ୍ଵୁଲାନ୍ସ ଯୋଗେ ଧର୍ମଶାଳା ଗୋଷ୍ଠି ସ୍ୱାସ୍ଥ୍ୟ କେନ୍ଦ୍ରକୁ ନେଇଥିଲେ। ସେଠାରେ ଡାକ୍ତର ସେମାନଙ୍କୁ ମୃତ ଘୋଷଣା କରିଥିଲେ। ଖବର ପାଇ ପୁଲିସ ଶବ ଜବତ କରି ତଦନ୍ତ ଆରମ୍ଭ କରିଛି।
ଏହି ଖବରଟିକୁ ପଢନ୍ତୁ- ଉକୁଣୀକୁ କରନ୍ତୁନି ହେୟ... ମୁଣ୍ଡରେ ରହି ଶୋଷିଦେବ ରକ୍ତ, ନେଇଯିବ ଜୀବନ
