ମାଲକାନଗିରି, ୧/୭ : ଭୁବନେଶ୍ୱର ବିଏମସି ଅତିରିକ୍ତ କମିଶନର ରତ୍ନାକର ସାହୁଙ୍କୁ ମରଣାନ୍ତକ ଆକ୍ରମଣ ଘଟଣା ପ୍ରତିବାଦରେ ଅନୁସୂଚିତ ଜାତି/ଜନଜାତି ସଂଘ ମିଳିତ କ୍ରିୟାନୁଷ୍ଠାନ କମିଟି ଆଜି ମାଲକାନଗିରି ସଦର ଅନ୍ତର୍ଗତ ଏମଭି-୨ ଗ୍ରାମ ମାରମଂ ଗୁରୁ କ୍ଲବରେ କ୍ରିୟା ଅନୁଷ୍ଠାନ କମିଟିର ସଭାପତି ଜାରାଶବର ମାଡ଼ିଙ୍କ ଅଧ୍ୟକ୍ଷତାରେ ଏକ ସାମ୍ବାଦିକ ସମ୍ମିଳନୀ ଅନୁଷ୍ଠିତ ହୋଇଛି । ସୋମବାର ଯେତେବେଳେ ବିଏମସି ଅତିରିକ୍ତ କମିଶନର ରତ୍ନାକର ସାହୁ ନିୟମିତ ଜନ ଅଭିଯୋଗ ଶୁଣାଣି ବୈଠକରେ ଅଧ୍ୟକ୍ଷତା କରିଥିଲେ, ସେ ସମୟରେ ହଠାତ ଜିଛି ଅଜଣା ଅସାମାଜିକ ଲୋକ ବିନା ଅନୁମତିରେ ପ୍ରକୋଷ୍ଠ ଭିତରକୁ ପ୍ରବେଶ କରି ତାଙ୍କୁ ମରଣାନ୍ତକ ଆକ୍ରମଣର ଘଟଣାକୁ ତୀବ୍ର ନିନ୍ଦା କରିଛି ଜିଲ୍ଲା ଅନୁସୂଚିତ ଜାତି/ଜନଜାତି ସଂଘ ମିଳିତ କ୍ରିୟାନୁଷ୍ଠା କମିଟି।
ଯଦିବା ସବୁ ରାଜନୈତିକ ଦଳର ନେତାମାନେ ଏହି ଘଟଣାକୁ ନିନ୍ଦା କରିଛନ୍ତି ଏହା ସତ, କିନ୍ତୁ ଏପ୍ରକାର ଘଟଣାମାନଙ୍କର ସ୍ଥାୟୀ ସମାଧାନର ରାସ୍ତା କ’ଣ ବୋଲି ଏଠାରେ ପ୍ରଶ୍ନବାଚୀ ସୃଷ୍ଟି କରିଛି । ଖୋଦ୍ ରାଜଧାନୀ ଭୁବନେଶ୍ବରରେ ଯଦି ବରିଷ୍ଠ ଅଧିକାରୀ କିମ୍ବା ସରକାରୀ କର୍ମଚାରୀମାନେ ଦିନ ଦି'ପ୍ରହରରେ ଯଦି ଅସରୁକ୍ଷିତ, ତା'ହେଲେ ଉପାନ୍ତ ମାଓବାଦୀ ଇଲାକାରେ ସାଧାରଣ ନାଗରିକମାନେ କେତେ ସୁରକ୍ଷିତ ତାହା ଏଥିରୁ ଅନୁମେୟ ବୋଲି କହିଛନ୍ତି ମିଳିତ କ୍ରିୟାନୁଷ୍ଠାନ କମିଟିର ମୁଖ୍ୟ ଉପଦେଷ୍ଟା ପ୍ରଭାକର ହନ୍ତାଳ। ଏ ପ୍ରକାର ଘଟଣା ଘଟିଲେ ସମଗ୍ର ଓଡ଼ିଶାରେ ବିଭିନ୍ନ ପ୍ରକାର ଉନ୍ନୟନମୂଳକ କାର୍ଯ୍ୟରେ ବାଧା ସୃଷ୍ଟି ହେବ। ଏଣୁ ଏ ସଂକ୍ରାନ୍ତରେ ଏକ ସ୍ଥାୟୀ ସମାଧାନ ନିମନ୍ତେ ତୁରନ୍ତ ମୁଖ୍ୟମନ୍ତ୍ରୀ ମୋହନ ଚରଣ ମାଝୀ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ମିଳିତ କ୍ରିୟାନୁଷ୍ଠାନ କମିଟି ଅନୁରୋଧ କରିଛି । ଆଜିର ଏହି ସାମ୍ବାଦିକ ସମ୍ମିଳନୀରେ ମୁଖ୍ୟ ଉପଦେଷ୍ଟା ପ୍ରଭାକର ହନ୍ତାଳ, ସାଂଗଠନିକ ସମ୍ପାଦକ ଡମ୍ବରୁ ବାଘ, ଗୁରୁଚାନ୍ଦ ଆମ୍ବେଦକର ଚେତନା ପରିଷଦର ସଭାପତି ଲକ୍ଷ୍ମଣ ଚନ୍ଦ୍ର ଘରାମି, ସମ୍ପାଦକ କେ, ଦେଶୀରାଜୁ ଆଚାରି ପ୍ରମୁଖ ମଞ୍ଚାସୀନ ଥିଲେ।
