ନୂଆଦିଲ୍ଲୀ, ୧୫।୫: ବିଶ୍ୱ ତୈଳ ବଜାରରେ ଏବେ ହଲଚଲ । ରୁଷ ଏବଂ ୟୁକ୍ରେନ ଯୁଦ୍ଧ ମଧ୍ୟରେ ଭାରତର ଶକ୍ତି ସୁରକ୍ଷାକୁ ନେଇ ବଡ଼ ପ୍ରଶ୍ନବାଚୀ ସୃଷ୍ଟି ହୋଇଛି । ଆଉ ମାତ୍ର ୨୪ ଘଣ୍ଟା ପରେ ଅର୍ଥାତ୍ ମେ ୧୬ ତାରିଖ ରାତି ୧୨ଟା ପରେ ଭାରତକୁ ରୁଷରୁ ରିହାତି ଦରରେ ମିଳୁଥିବା ଅଶୋଧିତ ତୈଳ ଆମଦାନୀ ଉପରେ ରୋକ୍ ଲାଗିପାରେ । ଯଦି ଆମେରିକା ପକ୍ଷରୁ ମିଳିଥିବା ସ୍ୱତନ୍ତ୍ର ରିହାତି ଅବଧି ବୃଦ୍ଧି କରାନଯାଏ, ତେବେ ଭାରତୀୟ ବଜାରରେ ପେଟ୍ରୋଲ ଏବଂ ଡିଜେଲ ଯୋଗାଣରେ ବଡ଼ ସଙ୍କଟ ଦେଖାଦେବାର ସମ୍ଭାବନା ରହିଛି ।
ଗତ ୭୫ ଦିନ ଧରି ହୋର୍ମୁଜ ପ୍ରଣାଳୀରେ ଚାଲିଥିବା ଅସ୍ଥିରତା ଏବଂ ବିଶ୍ୱ ତୈଳ ଯୋଗାଣ ବାଧାପ୍ରାପ୍ତ ହେବା ଯୋଗୁଁ ଭାରତ ଚାପରେ ରହିଛି । ରୁଷରୁ ତେଲ କିଣିବା ଉପରେ ଆମେରିକା ଲଗାଇଥିବା ପ୍ରତିବନ୍ଧକରୁ ଭାରତକୁ କିଛି ସମୟ ପାଇଁ ରିହାତି ବା 'ୱେଭର' ମିଳିଥିଲା । ଏହି ଅବଧି ପ୍ରଥମେ ମାର୍ଚ୍ଚରେ ଅନୁମୋଦିତ ହୋଇଥିଲା ଏବଂ ପରେ ବୃଦ୍ଧି କରାଯାଇଥିଲା । ବର୍ତ୍ତମାନର ସୂଚନା ଅନୁଯାୟୀ, ଏହି ରିହାତି ମେ ୧୬ ତାରିଖ ମଧ୍ୟରାତ୍ରିରେ ଶେଷ ହେବାକୁ ଯାଉଛି । ଭାରତ ପକ୍ଷରୁ ପୁଣି ଥରେ ୱାଶିଂଟନକୁ ଅନୁରୋଧ କରାଯାଇଛି ଯେ, ଦେଶର ଆର୍ଥିକ ସ୍ଥିତି ଏବଂ ସାଧାରଣ ଜନତାଙ୍କ ସ୍ୱାର୍ଥ ଦୃଷ୍ଟିରୁ ଏହି ଅବଧିକୁ ଆହୁରି ବୃଦ୍ଧି କରାଯାଉ ।
ୟୁକ୍ରେନ ଯୁଦ୍ଧ ଓ ଆମେରିକାର ଚାପ:
ବ୍ଲୁମବର୍ଗର ଏକ ରିପୋର୍ଟ ଅନୁଯାୟୀ, ୟୁକ୍ରେନ ଉପରେ ରୁଷର ଆକ୍ରମଣ ପରଠାରୁ ଆମେରିକା କ୍ରମାଗତ ଭାବେ ଭାରତ ଉପରେ ଚାପ ପକାଇ ଆସୁଛି । ମସ୍କୋରୁ କମ୍ ଦରରେ ତେଲ କିଣି ରୁଷର ଅର୍ଥନୀତିକୁ ସହାୟତା ନକରିବା ପାଇଁ ୱାଶିଂଟନ ଚାହୁଁଛି । ମାତ୍ର ଭାରତୀୟ ଅଧିକାରୀମାନେ ସ୍ପଷ୍ଟ କରିଛନ୍ତି ଯେ, ଶକ୍ତି ଯୋଗାଣ ସୁନିଶ୍ଚିତ କରିବା ଦେଶ ପାଇଁ ସର୍ବୋଚ୍ଚ ପ୍ରାଥମିକତା । ଯଦି ତୈଳ ବଜାରରେ ଅସ୍ଥିରତା ଲାଗି ରହେ, ତେବେ ଏହାର ପ୍ରଭାବ ସାଧାରଣ ଖାଉଟିଙ୍କ ପକେଟ୍ ଉପରେ ପଡ଼ିବ ଏବଂ ଦେଶରେ ମୁଦ୍ରାସ୍ଫୀତି ବଢ଼ିବ ।
ରେକର୍ଡ ସ୍ତରରେ ଆମଦାନୀ ଓ LNGକୁ ମନା:
ରିହାତି ଅବଧି ଶେଷ ହେବା ପୂର୍ବରୁ ଭାରତୀୟ ତୈଳ ବିଶୋଦନାଗାରଗୁଡ଼ିକ ଦ୍ରୁତ ଗତିରେ ତେଲ କିଣିବାରେ ଲାଗିଛନ୍ତି । କ୍ଲେପର ତଥ୍ୟ ଅନୁଯାୟୀ, ମେ ମାସରେ ରୁଷରୁ ଆମଦାନୀ ଦୈନିକ ୨.୩ ନିୟୁତ ବ୍ୟାରେଲରେ ପହଞ୍ଚି ଏକ ନୂଆ ରେକର୍ଡ ସୃଷ୍ଟି କରିଛି । ତେବେ ଆମେରିକାର କଡ଼ା ନିୟମ ଯୋଗୁଁ ଭାରତ ରୁଷରୁ ଆସୁଥିବା LNG ଗ୍ରହଣ କରିବାକୁ ମନା କରିଦେଇଛି । ଏହି କାରଣରୁ ଏକ ରୁଷୀୟ ଜାହାଜ ଏବେ ସିଙ୍ଗାପୁର ନିକଟରେ ଫସି ରହିଛି ।
ଦେଶରେ କେତେ ଅଛି ତେଲ ଓ ଗ୍ୟାସର ଷ୍ଟକ୍ ?
ଏହି ସଙ୍କଟ ମଧ୍ୟରେ କେନ୍ଦ୍ର ପେଟ୍ରୋଲିୟମ ମନ୍ତ୍ରୀ ହରଦୀପ ସିଂହ ପୁରୀ ଦେଶବାସୀଙ୍କୁ ଆଶ୍ୱାସନା ଦେଇଛନ୍ତି । CII ବାର୍ଷିକ ସମ୍ମିଳନୀରେ ସୂଚନା ଦେଇ ସେ କହିଛନ୍ତି ଯେ, ଭାରତ ପାଖରେ ପର୍ଯ୍ୟାପ୍ତ ପରିମାଣର ସଂରକ୍ଷିତ ଷ୍ଟକ୍ ରହିଛି । LNG ଷ୍ଟକ୍ ୬୯ ଦିନ ପାଇଁ ପର୍ଯ୍ୟାପ୍ତ । LPG ଷ୍ଟକ୍ ୪୫ ଦିନ ପାଇଁ ମହଜୁଦ । ଦୈନିକ ଏଲପିଜି ଉତ୍ପାଦନକୁ ୩୬ ହଜାର ଟନରୁ ବଢ଼ାଇ ୫୪ ହଜାର ଟନ କରାଯାଇଛି ।
ଆଗକୁ କ’ଣ ହେବ ?
ଏହି ଗୁରୁତ୍ୱପୂର୍ଣ୍ଣ ପ୍ରସଙ୍ଗରେ ଆଲୋଚନା କରିବାକୁ ଏପ୍ରିଲ ୩୦ରେ ରୁଷର ଉପ-ଶକ୍ତି ମନ୍ତ୍ରୀ ପାଭେଲ ସୋରୋକିନ ଭାରତ ଗସ୍ତ କରିଥିଲେ । ଆଗାମୀ ଜୁନ ମାସରେ ପୁଣି ଥରେ ଉଭୟ ଦେଶ ମଧ୍ୟରେ ବୈଠକ ବସିବାର ସମ୍ଭାବନା ରହିଛି । ତେବେ ବର୍ତ୍ତମାନ ସମସ୍ତଙ୍କ ନଜର ଆମେରିକାର ପରବର୍ତ୍ତୀ ନିଷ୍ପତ୍ତି ଉପରେ ରହିଛି । ଯଦି ଆମେରିକା ନିଜ ଜିଦ୍ରେ ଅଟଳ ରହେ, ତେବେ ଭାରତକୁ ଅନ୍ୟ ଉତ୍ସରୁ ମହଙ୍ଗା ଦରରେ ତେଲ କିଣିବାକୁ ପଡ଼ିପାରେ, ଯାହାର ପ୍ରଭାବ ପେଟ୍ରୋଲ ପମ୍ପରେ ଦେଖିବାକୁ ମିଳିପାରେ ।
ଆହୁରି ପଢ଼ନ୍ତୁ... CEC Appointment Process: ସିଇସି ନିଯୁକ୍ତି ପ୍ରକ୍ରିୟା ଉପରେ ସୁପ୍ରିମକୋର୍ଟଙ୍କ ପ୍ରଶ୍ନ, କମିଟିରେ ସ୍ୱାଧୀନ ସଦସ୍ୟ କାହିଁକି ନାହାନ୍ତି...
