ନୂଆଦିଲ୍ଲୀ: ହରିୟାଣାର ହିସାର ନିବାସୀ ତଥା ଜଣାଶୁଣା ୟୁଟ୍ୟୁବର ଜ୍ୟୋତି ମଲହୋତ୍ରାଙ୍କୁ ପାକିସ୍ତାନ ପାଇଁ ଗୁଇନ୍ଦାଗିରି ଅଭିଯୋଗରେ ଗିରଫ କରାଯାଇଛି। ତାଙ୍କ ସହ ପଞ୍ଜାବ ଓ ହରିୟାଣାରୁ ୫ ଜଣଙ୍କୁ ଏହି ଗୁପ୍ତଚର ନେଟୱାର୍କ ସହ ଜଡିତ ଥିବା ଅଭିଯୋଗରେ ହେପାଜତକୁ ନିଆ ଯାଇଛି। ଏହି ମାମଲାର କେନ୍ଦ୍ରବିନ୍ଦୁରେ ରହିଛନ୍ତି ପାକିସ୍ତାନ ହାଇ କମିଶନର କର୍ମଚାରୀ ଏହସାନ-ଉର-ରହିମ ଓରଫ ଦାନିଶ। ତେବେ ଭାରତ ସରକାର ତାଙ୍କୁ ଗତ ମଇ ୧୩ ତାରିଖରେ ‘ପର୍ସୋନା ନନ ଗ୍ରାଟା’ ଘୋଷଣା କରି ଦେଶରୁ ବହିଷ୍କାର କରିଛନ୍ତି।

ଜ୍ୟୋତି, ଯିଏ ‘ଜ୍ୟୋତି ରାଣୀ’ ନାମରେ ମଧ୍ୟ ବେଶ ଜଣାଶୁଣା, ନିଜ ଯୁଟ୍ୟୁବ ଚ୍ୟାନେଲ ‘Travel with JO’ ମାଧ୍ୟମରେ ଭାରତରେ ପ୍ରସିଦ୍ଧି ଅପେଜନ କରିଛନ୍ତି। ଯେଉଁଠାରେ ତାଙ୍କର ୩.୭୭ ଲକ୍ଷ ସବସ୍କ୍ରାଇବର ମଧ୍ୟ ରହିଛନ୍ତି। ଅନ୍ୟପଟେ ତାଙ୍କ ଇନସ୍ଟାଗ୍ରାମରେ ୧.୩୧ ଲକ୍ଷ ଫଲୋଅର୍ସ ରହିଛନ୍ତି। ସେ ପାକିସ୍ତାନ ସମେତ ବିଭିନ୍ନ ଦେଶର ଭ୍ରମଣ କରିବା ସହ ସାମାଜିକ ଗଣମାଧ୍ୟମ ଗୁଡକରେ ଭିଡିଓ ସେୟାର କରନ୍ତି।

୨୦୨୩ ମସିହାରେ ଜ୍ୟୋତି ପାକିସ୍ତାନ ଭିସା ପାଇଁ ଦିଲ୍ଲୀସ୍ଥିତ ପାକିସ୍ତାନ ହାଇ କମିଶନରେ ଦାନିଶଙ୍କୁ ପ୍ରଥମ ଥର ପାଇଁ ଭେଟିଥିଲେ। ଏହା ପରେ ସେ ଆଉ ଦୁଇଥର ପାକିସ୍ତାନ ଗସ୍ତ କରିଥିଲେ। ପୁଲିସ ଅନୁଯାୟୀ, ଦାନିଶ ଜ୍ୟୋତିଙ୍କୁ ପାକିସ୍ତାନୀ ଗୁଇନ୍ଦା ଅଧିକାରୀ ଶାକିର ଓ ରାଣା ଶାହବାଜଙ୍କ ସହ ଯୋଡିଥିଲେ। ଜ୍ୟୋତି ହ୍ୱାଟସଆପ, ଟେଲିଗ୍ରାମ ଓ ସ୍ନାପଚାଟ ଜରିଆରେ ସମ୍ବେଦନଶୀଳ ସୂଚନା ପଠାଉଥିଲେ। ସେ ଶାହବାଜଙ୍କ ନମ୍ବରକୁ ‘ଜାଟ ରନଧାୱା’ ନାମରେ ସେଭ କରିଥିଲେ। ଅଭିଯୋଗ ଅନୁଯାୟୀ, ସେ ଭାରତୀୟ ସ୍ମାରକ ଓ ଅନ୍ୟ ସୂଚନା ପାକିସ୍ତାନୀ ଅଧିକାରୀଙ୍କୁ ଦେଉଥିଲେ ଏବଂ ପାକିସ୍ତାନର ସକାରାତ୍ମକ ଛବି ନେଇ ନିଜ ୟୁଟ୍ୟୁବରେ ପ୍ରଚାର କରୁଥିଲେ। ସେ ଜଣେ ପାକିସ୍ତାନୀ ଅଧିକାରୀ ସହ ରୋମାଣ୍ଟିକ ସମ୍ପର୍କରେ ଥିବା ଓ ବାଲିରେ ତାଙ୍କ ସହ ଭେଟିଥିବାର ଅଭିଯୋଗ ମଧ୍ୟ ରହିଛି।

ଭାରତରେ ପୋଷ୍ଟିଂ ସମୟରେ, ହାଇ କମିଶନରେ ଦାନିଶଙ୍କ ଭୂମିକା ଭାରତୀୟ ନାଗରିକଙ୍କୁ ଗୁପ୍ତଚର ପାଇଁ ନିଯୁକ୍ତି ଦେବା ପାଇଁ କୂଟନୈତିକ ସୁରକ୍ଷା ଯୋଗାଇଥିଲା। ତଦନ୍ତରୁ ଜଣାପଡ଼ିଛି ଯେ ଜ୍ୟୋତି ମାଲହୋତ୍ରା ଏବଂ ପଞ୍ଜାବ ଏବଂ ହରିୟାଣାରେ ଗିରଫ ହୋଇଥିବା ବ୍ୟକ୍ତିଙ୍କୁ ଅର୍ଥ ପ୍ରଦାନ ଓ ଗୁଇନ୍ଦାଗିରି ବଢାଇବାରେ ତାଙ୍କର ମୁଖ୍ୟ ଭୂମିକା ଥିଲା। ଦାନିଶ ସମ୍ବେଦନଶୀଳ ସୂଚନା କିମ୍ବା ଗୁରୁତ୍ୱପୂର୍ଣ୍ଣ ସ୍ଥାନଗୁଡ଼ିକୁ ବିଷୟରେ ସୂଚନା ପ୍ରାପ୍ତ କରିବ ନିମନ୍ତେ ଭାରତୀୟ ନାଗରିକମାନଙ୍କୁ ଚିହ୍ନଟ ଏବଂ ରାଜି କରାଉଥିଲେ। ଏହାସହ ISI ଏଜେଣ୍ଟମାନଙ୍କ ସହିତ ସୂଚନା ଏବଂ ପରିଚୟ ଦିଆଯାଇଥିବା ବ୍ୟକ୍ତିମାନଙ୍କୁ ଭିସା ପ୍ରଦାନ ଏବଂ ସେମାନଙ୍କ ପାକସ୍ତାନ ଯାତ୍ରା ଯୋଜନାକୁ ସଂଗଠିତ କରିବା ଦାନିଶଙ୍କ ମୁଖ୍ୟ ଲକ୍ଷ୍ୟ ରହିଥିଲା।

ଭାରତୀୟ ଅଧିକାରୀମାନଙ୍କୁ ଏନେଇ ଗୁଇନ୍ଦା ସୂଚନା ମିଳିବା ପରେ ଭାରତୀୟ ଏଜେନ୍ସି ଗୁଡିକ ଆକ୍ସନ ମୋଡକୁ ଆସିଯାଇଥିଲେ। ତେବେ ଜେନେଭା ଚୁକ୍ତି ଅନୁଯାୟୀ ଅନ୍ୟଦେଶର କୂଟନୈତକ ଅଧିକାରୀଙ୍କୁ ଗିରଫ କରିବାର ଅଧିକାର ନଥିବାରୁ ବାଧ୍ୟ ହୋଇ ଭାରତ ସରକାର ଦାନିଶଙ୍କ ବିରୁଦ୍ଧରେ ମଇ ୧୩ ତାରିଖରେ ‘ପର୍ସୋନା ନନ ଗ୍ରାଟା’ ଘୋଷଣା କରି ଦେଶରୁ ବହିଷ୍କାର କରିଥିଲେ। ତେବେ ତାଙ୍କ ସହ ଜଡିତ ଅନେକ ଭାରତୀୟ ନାଗରିକଙ୍କୁ ଗିରଫ କରିବା ପାଇଁ ଭାରତ ସରକାର ଯୋଜନା ଆରମ୍ଭ କରିଥିଲେ। ଯେଉଁମାନଙ୍କ ମଧ୍ୟରୁ କେବଳ ପଞ୍ଜାବ ଓ ହରିୟାନାରୁ ୬ ଜଣ ରହିଥିବା ଜଣାପଡିଛି। 

ଜ୍ୟୋତିଙ୍କ ବିରୁଦ୍ଧରେ ଭାରତୀୟ ନ୍ୟାୟ ସଂହିତା ଧାରା ୧୫୨ ଓ ଅଫିସିଆଲ ସିକ୍ରେଟ ଆକ୍ଟ, ୧୯୨୩ ଅନୁଯାୟୀ ମାମଲା ରୁଜୁ ହୋଇଛି। ତାଙ୍କୁ ୫ ଦିନିଆ ପୁଲିସ ରିମାଣ୍ଡରେ ରଖାଯାଇ ତାଙ୍କ ଆର୍ଥିକ କାରବାର ଓ ଇଲେକ୍ଟ୍ରୋନିକ ଉପକରଣ ତଦନ୍ତ ଚାଲିଛି।

ବିଭିନ୍ନ ସାମାଜିକ ଗଣମାଧ୍ୟମରେ ଜ୍ୟୋତିଙ୍କୁ ‘ଦେଶଦ୍ରୋହୀ’ କହି କଠୋର ଶାସ୍ତି ଦାବି କରାଯାଉଛି। ତାଙ୍କ ପିତା ହରିସ ମଲହୋତ୍ରା ନିଜ ଝିଅଙ୍କୁ ନିର୍ଦ୍ଦୋଷ କହିବା ସହ ସେ ଅନୁମତି ସହ ପାକିସ୍ତାନ ଗସ୍ତ କରିଥିଲେ ବୋଲି କହିଛନ୍ତି। ତେବେ ଜ୍ୟୋତିଙ୍କ ସହ ଅନ୍ୟ କେହି ଇନଫ୍ଲୁଏନ୍ସର ଜଡିତ ଥିଲେ କି ନାହିଁ ପୁଲିସ ତାହାର ଅନୁସନ୍ଧାନ କରୁଛି। ହିସାର ଏସପି ଶଶାଙ୍କ କୁମାର କହିଛନ୍ତି, “ଶତ୍ରୁ ଦେଶ ସୋସିଆଲ ମିଡିଆ ଇନଫ୍ଲୁଏନ୍ସରଙ୍କୁ ଦେଶ ବିରୋଧରେ ବ୍ୟବହାର କରୁଛି। ଯାହା ଆମ ପାଇଁ ଏକ ନୂଆ ଚ୍ୟଲେଞ୍ଜ ସଷ୍ଟି କରିଛି। ଆଗକୁ ଏହା ଉପରେ କଡା ନଜର ରଖିବାକୁ ପଡିବ।”