ନୂଆଦିଲ୍ଲୀ,୧୮।୫: ପୁତୁରା ଆକାଶ ଆନନ୍ଦଙ୍କୁ ପୁଣି ବଡ଼ ଦାୟିତ୍ବ ଦେଲେ ବହୁଜନ ସମାଜବାଦୀ ପାର୍ଟି ମୁଖ୍ୟ ମାୟାବତୀ । ଆକାଶଙ୍କୁ ସେ ପ୍ରଦାନ କରିଛନ୍ତି ବିଏସ୍ପିର ମୁଖ୍ୟ ରାଷ୍ଟ୍ରୀୟ ସଂଯୋଜକ ପଦ । ଆକାଶ ବିଏସ୍ପିରୁ ଚଳିତ ବର୍ଷ ଫେବୃଆରୀରେ ବହିଷ୍କୃତ ହୋଇଥିଲେ ଏବଂ ଏପ୍ରିଲରେ ଦଳକୁ ଫେରିଥିଲେ। ତେବେ ଏହାପରେ ପୁଣିଥରେ ଆକାଶଙ୍କୁ ମାୟାବତୀ ଦେଇଛନ୍ତି ବଡ଼ ଦାୟିତ୍ୱ ।କେବଳ ସେତିକି ନୁହେଁ, ବିହାରରେ ହେବାକୁ ଥିବା ବିଧାନସଭା ନିର୍ବାଚନକୁ ଦୃଷ୍ଟିରେ ରଖି ମାୟାବତୀ ତାଙ୍କୁ ଜଣେ ଷ୍ଟାର ପ୍ରଚାରକ ମଧ୍ୟ କରିଛନ୍ତି। ଆକାଶଙ୍କ ପ୍ରତ୍ୟାବର୍ତ୍ତନ ପାଇଁ ବିଏସପି ମୁଖ୍ୟ ଏକ ନୂତନ ପଦବୀ ସୃଷ୍ଟି କରିଥିଲେ। ଏହା ପୂର୍ବରୁ, ବିଏସପିରେ ତାଙ୍କର ମୁଖ୍ୟ ସଂଯୋଜକ ପଦବୀ ଥିଲା।
ବିଏସପି ଦ୍ୱାରା ଜାରି ଏକ ପ୍ରେସ୍ ରିଲିଜରେ ମାୟାବତୀ କହିଛନ୍ତି , ଦଳର ଲୋକଙ୍କ ସମ୍ମତିରେ ଆକାଶ ଆନନ୍ଦଙ୍କୁ ଦଳର ମୁଖ୍ୟ ଜାତୀୟ ସଂଯୋଜକ କରାଯାଇଛି ଏବଂ ତାଙ୍କୁ ଦଳର ଭବିଷ୍ୟତ କାର୍ଯ୍ୟକ୍ରମ ମଧ୍ୟ ଦିଆଯାଇଛି। ଆଶା କରାଯାଉଛି ଯେ ଏଥର ଦଳ ଏବଂ ଆନ୍ଦୋଳନର ସ୍ୱାର୍ଥ ପାଇଁ, ସମସ୍ତ ସତର୍କତା ଅବଲମ୍ବନ କରିବା ସହିତ, ଦଳକୁ ମଜବୁତ କରିବାରେ ତାଙ୍କର ପ୍ରଶଂସନୀୟ ଅବଦାନ ରହିବ। ଉଲ୍ଲେଖନୀୟ ଯେ, ଚଳିତ ବର୍ଷ ଶେଷରେ ଅନୁଷ୍ଠିତ ହେବାକୁ ଯାଉଛି ବିହାର ବିଧାନସଭା ନିର୍ବାଚନ। ଏକ ପୃଥକ ବୈଠକରେ ଆଲୋଚନା ସମୟରେ, ପୂର୍ଣ୍ଣ ପ୍ରସ୍ତୁତି ସହିତ ନିଜସ୍ୱ ଶକ୍ତିରେ ନିର୍ବାଚନ ଲଢ଼ିବାକୁ ମଧ୍ୟ ନିଷ୍ପତ୍ତି ନିଆଯାଇଛି।
୨୦୨୪ ନିର୍ବାଚନ ପ୍ରଚାର ସମୟରେ ଆକାଶଙ୍କ ବିବାଦୀୟ ବୟାନକୁ ନେଇ ମାୟାବତୀ କାର୍ଯ୍ୟାନୁଷ୍ଠାନ ଗ୍ରହଣ କରିଥିଲେ। ଜନସଭାରେ ବିବାଦୀୟ ବୟାନକୁ ନେଇ ମାୟାବତୀ ତାଙ୍କୁ ଦଳର ସବୁ ଦାୟିତ୍ବରୁ ମୁକ୍ତ କରିଥିଲେ। ଏହା ସହ ଘୋଷଣା କରିଥିଲେ ସେ ବଞ୍ଚିଥିବା ବେଳେ ତାଙ୍କ କେହି ବି ଉତ୍ତରାଧିକାରୀ ରହିବେନି। ପୁତୁରା ଆକାଶ ଆନନ୍ଦ ଗତ ମାସ ଏପ୍ରିଲ ୧୩ ତାରିଖରେ ସୋସିଆଲ ମିଡିଆରେ ଏକ ଲମ୍ବା ପୋଷ୍ଟ କରି ମାୟାବତୀଙ୍କୁ କ୍ଷମା ମାଗିଥିଲେ, ଯାହାକୁ ତାଙ୍କ ପିଉସୀ ଅର୍ଥାତ୍ ମାୟାବତୀ ଗ୍ରହଣ କରିଥିଲେ । ଏହି ସମୟ ମଧ୍ୟରେ ମାୟାବତୀ କହିଥିଲେ ଯେ, ତାଙ୍କ ଜୀବନ ବିଏସପି ଏବଂ ଦଳର ଆନ୍ଦୋଳନ ପ୍ରତି ସମର୍ପିତ ଥିବାରୁ, ତାଙ୍କୁ ଆଉ ଏକ ସୁଯୋଗ ଦେବାକୁ ନିଷ୍ପତ୍ତି ନିଆଯାଇଛି। ତଥାପି, ସେ ଏହା ମଧ୍ୟ କହିଥିଲେ ଯେ ମୁଁ କାହାକୁ ଦଳର ଉତ୍ତରାଧିକାରୀ କରିବାର ପ୍ରଶ୍ନ ଉଠୁନାହିଁ ।
