ରାୟଗଡ଼(ଗଜପତି) ୧୮/୦୫: ରାୟଗଡ଼ର ଅଧିଷ୍ଠାତ୍ରୀ ଦେବୀ ମା କମଳା ଦେବୀ ଠାକୁରାଣୀଙ୍କ ଯାତ୍ରା ରବିବାର ଠାରୁ ଆରମ୍ଭ ହୋଇଛି I ଏଥିପାଇଁ ଚଳଚଞ୍ଚଳ ହୋଇ ଉଠିଛି ରାୟଗଡ଼ ସହରI ରାୟଗଡ଼ ଗ୍ରାମର ମଝି ସାହି ପକ୍ଷରୁ ଉକ୍ତ ଯାତ୍ରା ଆୟାଜିତ ହେଉଅଛି l ସାତ ବର୍ଷର ବ୍ୟାବଧାନ ପରେ ମା ସାତ ଦିନ ପାଇଁ ବାପ ଘରକୁ ଆସି ଏଠାରେ ଶ୍ରଦ୍ଧାଳୁଙ୍କୁ ଦର୍ଶନ ଦେବେ । ଏ ସମୟରେ ମାଙ୍କୁ ସମସ୍ତ ରୀତିନୀତି ଏବଂ ପରମ୍ପରା ଅନୁଯାଇ ପୂଜାର୍ଚନା କରାଯିବ I ଶାଶୁ ଘରୁ ମା ସାଆନ୍ତାଣୀ ବିରାଟ ପଟୁଆରରେ ବାପଘରକୁ ଆସିଛନ୍ତି l ଝିଅକୁ ଡାକିବା ପାଇଁ ବାପ ଘରୁ ଯେଉଁଭଳି ପଟୁଆର ଯାଇଥାଏ ଠାକୁରାଣୀଙ୍କୁ ଡାକିବା ପାଇଁ ମଧ୍ଯ ଦେଖିବାକୁ ମିଳିଥିଲା ସେହିଭଳି ଏକ ପରିବେଶ । ବାଜା, ବାଜଣା ସହ ମହୁରୀ ଶବ୍ଦରେ କମ୍ପି ଉଠିଥିଲା ଗାଁ ଦାଣ୍ଡ।   ଯାତ୍ରାର ରୀତି ଅନୁସାରେ ଦେବଚନ୍ଦ୍ର ବେହେରାଙ୍କ ହାଣ୍ଡି ଶାଳରୁ ପାଟ ହାଣ୍ଡି ମନ୍ଦିରକୁ ଅଣାଯାଇଥିଲା l ଏହାପରେ ପିଣ୍ଟୁ ପାଇକଙ୍କ ଘରୁ ମାଁଙ୍କ ପୂଜାର୍ଚ୍ଚନା କରାଯିବା ପରେ ମାଁ କୀଳାମୁଣ୍ଡାଙ୍କୁ ସ୍ଥାୟୀ ମନ୍ଦିରକୁ ଅଣାଯାଇ ପୂଜାର୍ଚ୍ଚନା କରାଯାଇଥିଲା l 

ଯାତ୍ରା ପାଇଁ ମାଁ ଙ୍କ ମୁଣ୍ଡରୁ ଫୁଲ ଖସି ଚାଙ୍ଗୁଡିରେ ପଡ଼ିବା ବିଧି ରହିଥିବାରୁ ଅନେକ ସମୟ ଯାଏଁ ଶ୍ରଦ୍ଧାଳୁ ମାନେ ଏହାକୁ ଅପେକ୍ଷା କରି ରହିଥିଲେ l ଆଜ୍ଞା ମାଳ ପାଇବା ପରେ ଏକ ବିରାଟ ପଟୁଆରରେ ମାଁଙ୍କୁ ଅଣାଯାଇ ଅସ୍ଥାୟୀ ପୀଠରେ ପୂଜା କରାଯାଏ l ଏହା ସହିତ ଲିହୁରୁଣୀ ଠାକୁରାଣୀ ମାଁଙ୍କୁ ଅଣାଯାଇଥାଏ l ଏ ସମୟରେ ଗାଁର ପ୍ରତ୍ୟକ ମହିଳା ଗାଁ ଦାଣ୍ଡରେ ମାଁ ଙ୍କୁ ବନ୍ଦାପନା କରି ସ୍ଵାଗତ କରିଥିଲେ l ଏହାପରେ ସନ୍ଧ୍ୟାରେ ନିଜ ବାପ ଘରେ ପହଞ୍ଚିଥିଲେ l ସେଠାରେ ଭୋଗ ଲାଗି ହେବାପରେ ଘଟ ପରିକ୍ରମା କରାଯାଇଥିଲା I ମାଆଙ୍କ ଆଗମନରେ ଭକ୍ତଙ୍କ ମନରେ ରହିଥିଲା ଉତ୍ସାହ। ରାତି ତମାମ ମାଁ ଙ୍କ ଘଟ ବିଶୋୟୀ ସାହି, ଓଡିଆ ସାହି, ଗୌଡ଼ ସାହି, ବଢ଼େଇ ସାହି, ହେଣ୍ଡିଆ ସାହି, ଆଦର୍ଶ ନଗର ଓ କୁମ୍ଭାର ସାହି ଆଦି ପରିକ୍ରମା କରିଥିଲେ l ମଧ୍ୟରାତ୍ରରେ ଏହି କାର୍ଯ୍ୟକ୍ରମ ଶେଷ ହେବା ପରେ ଅସ୍ଥାୟୀ ପୀଠକୁ ମାଙ୍କୁ ଅଣାଯାଇଥିଲା l ଯାତ୍ରାକୁ ଶାନ୍ତି ଶୃଙ୍ଖଳା ସହ ସମାପନ କରିବାକୁ ଗାଁ ର ସମସ୍ତେ ସହଯୋଗ କରୁଥିବା ଯାତ୍ରା ପରିଚାଳନା କମିଟି ପକ୍ଷରୁ ଜଣାପଡିଛି l ଉକ୍ତ କାର୍ଯ୍ୟକ୍ରମକୁ ପରିଚାଳନା କମିଟିର ସଦସ୍ୟ ଏବଂ ଯୁବଗୋଷ୍ଠୀ ସହଯୋଗ କରିଛନ୍ତି l