ନୂଆଦିଲ୍ଲୀ: ମୈସୁର ଅର୍ବାନ ଡେଭଲପମେଣ୍ଟ ଅଥରିଟି (MUDA) ମାମଲାରେ ବଡ କାର୍ଯ୍ୟାନୁଷ୍ଠାନ ଗ୍ରହଣ କରିଛି ପ୍ରବର୍ତ୍ତନ ନିର୍ଦ୍ଦେଶାଳୟ (ED)। କର୍ଣ୍ଣାଟକ ମୁଖ୍ୟମନ୍ତ୍ରୀ ସିଦ୍ଧରମୈୟାଙ୍କ ପତ୍ନୀ ଏବଂ ଅନ୍ୟ ମାନଙ୍କ ସମ୍ପତ୍ତି ଜବତ କରିଛି ବିଭାଗ । ଇଡି ସିଦ୍ଧରମୈୟାଙ୍କ ପତ୍ନୀ ଏବଂ ଅନ୍ୟ ଅଭିଯୁକ୍ତ ମାନଙ୍କର ମୋଟ ୧୪୨ଟି ସମ୍ପତ୍ତି ଜବତ କରିଛି । ଏହି ସମ୍ପତ୍ତି ଗୁଡ଼ିକର ଆନୁମାନିକ ମୂଲ୍ୟ ପ୍ରାୟ ୩ଶହ କୋଟି ଟଙ୍କା।

ଭାରତୀୟ ଦଣ୍ଡ ବିଧି, ୧୮୬୦ ଏବଂ ଦୁର୍ନୀତି ନିବାରଣ ଆଇନ, ୧୯୮୮ ଅନୁଯାୟୀ ମୈସୁର ଲୋକାୟୁକ୍ତ ପୋଲିସ ଦ୍ୱାରା ପଞ୍ଜିକୃତ ଏକ ଏଫଆଇଆର ଆଧାରରେ ଇଡି ଏହି କାର୍ଯ୍ୟାନୁଷ୍ଠାନ ଗ୍ରହଣ କରିଛି। ଏହି ମାମଲାରେ ମୁଖ୍ୟମନ୍ତ୍ରୀ ସିଦ୍ଧରମୈୟା ଏବଂ ଅନ୍ୟମାନଙ୍କ ବିରୁଦ୍ଧରେ ଗୁରୁତର ଅଭିଯୋଗ ଆସିଛି।

MUDA ଦ୍ୱାରା ଜମି ଆବଣ୍ଟନରେ ଅନିୟମିତତା ମାଧ୍ୟମରେ ଟଙ୍କା ହେରଫେର ଘଟଣାର ତଦନ୍ତର ଏକ ଅଂଶ ହେଉଛି ଏହି ଜବତ। ଇଡି ଏକ ବିବୃତ୍ତିରେ କହିଛି ଯେ ଜବତ ସମ୍ପତ୍ତି ଗୁଡ଼ିକ ରିଅଲ୍ ଇଷ୍ଟେଟ୍ ବ୍ୟବସାୟୀ ଏବଂ ଏଜେଣ୍ଟ ଭାବରେ କାମ କରୁଥିବା ବିଭିନ୍ନ ବ୍ୟକ୍ତିଙ୍କ ନାମରେ ପଞ୍ଜୀକୃତ ରହିଛି । ତେବେ ଅଭିଯୋଗ ହୋଇଛି ଯେ, ସିଦ୍ଧରମୈୟା ତାଙ୍କ ରାଜନୈତିକ ପ୍ରଭାବ ବ୍ୟବହାର କରି MUDA ଦ୍ୱାରା ଅଧିଗ୍ରହଣିତ ୩ ଏକର ୧୬ ଗୁଣ୍ଠ ଜମି ବଦଳରେ ତାଙ୍କ ପତ୍ନୀ ବିଏମ୍ ପାର୍ବତୀଙ୍କ ନାମରେ ଥିବା ୧୪ଟି ପ୍ଲଟର କ୍ଷତିପୂରଣ ହାସଲ କରିଥିଲେ।