ଭୁବନେଶ୍ୱର ୦୪/୦୨: ପନିର୍ ପ୍ରାୟ ଲୋକଙ୍କର ପସନ୍ଦର ଖାଦ୍ୟ । ଏହାର ସ୍ୱାଦ ପିଲାଠାରୁ ବଡ଼ ଯାଏ ସମସ୍ତଙ୍କୁ ବାନ୍ଧି ରଖିଥାଏ । ତେଣିକି ସେ ପାଳଙ୍ଗ ପନିର୍ ହେଉ ଅବା ଶାହୀ ପନିର୍ । କିନ୍ତୁ ଜାଣନ୍ତି କି ପନିର୍ ସବୁବେଳେ ସତେଜ ଖାଇବା ଉଚିତ୍ । ବାସି ପନିର୍ ଖାଇବା ଅନୁଚିତ୍ । ପନିର୍ ଯେତିକି ପୁଷ୍ଟିକର, ସେତିକି ସ୍ୱାଦିଷ୍ଟ ମଧ୍ୟ । ଯଦି ଏହାକୁ ଠିକ୍ ଭାବେ ଷ୍ଟୋର ନ କରାଯାଏ, ତେବେ ଶରୀର ପାଇଁ କ୍ଷତିକାରକ । ପନିର୍ ଅନେକ ସମୟରେ ଲୋକଙ୍କ ପାଇଁ କ୍ଷତିକାରକ ସାବ୍ୟସ୍ତ ହୋଇଥାଏ । କାରଣ ଏଥିରେ ବ୍ୟାକ୍ଟେରିଆ ଖୁବ୍ ଶୀଘ୍ର ବଢିଥାନ୍ତି । ସେଥିପାଇଁ ପନିର୍କୁ ଅଧିକ ଦିନ ଯାଏ ସଂରକ୍ଷିତ କରିବା ଅନୁଚିତ୍ । ନଚେତ୍ ଶରୀର ପାଇଁ କ୍ଷତିକାରକ ସାବ୍ୟସ୍ତ ହୋଇପାରେ ।
ଏୟାର କଣ୍ଟେନର୍ରେ ଷ୍ଟୋର କରନ୍ତୁ: ଯଦି ପନିର୍ ରଖୁଛନ୍ତି, ତେବେ ଏୟାର କଣ୍ଟେନର୍ରେ ହିଁ ରଖନ୍ତୁ । ପବନ ସଂସ୍ପର୍ଶରେ ନ ଆସିବା ଦ୍ୱାରା ବ୍ୟାକ୍ଟେରିଆ ଓ ହାନିକାରକ ଜୀବାଣୁ ପ୍ରାୟତଃ ବଢି ନଥାନ୍ତି । ଏୟାର କଣ୍ଟେନର୍ରେ ରଖିବା ଦ୍ୱାରା ପନିର୍ ନଷ୍ଟ ହୋଇ ନଥାଏ । ଏପରିକି ଫ୍ରିଜ୍ରେ ରଖିବା ଦ୍ୱାରା ମଧ୍ୟ ପନିର୍ରୁ ଗନ୍ଧ ବାହାରି ନଥାଏ । ଫ୍ରିଜ୍ର ସବୁଠାରୁ ଥଣ୍ଡା ସ୍ଥାନରେ ହିଁ ରଖନ୍ତୁ: କାରଣ ଏଠାକୁ ବ୍ୟାକ୍ଟେରିଆ ଓ ଅନ୍ୟାନ୍ୟ ଜୀବଣୁ ସହଜରେ ପହଞ୍ଚିପାରି ନଥାନ୍ତି । କିନ୍ତୁ ଫ୍ରିଜର୍ରେ ଆଦୌ ରଖନ୍ତୁନାହିଁ ।
୩/୪ ଦିନରୁ ଅଧିକ ରଖନ୍ତୁନାହିଁ: ପନିର୍କୁ ୩/୪ ଦିନରୁ ଅଧିକ ରଖିବା ଅନୁଚିତ୍ । ନଚେତ୍ ଏଥିରେ ବ୍ୟାକ୍ଟେରିଆ କିମ୍ବା ଜୀବାଣୁ ହେବାର ଆଶଙ୍କା ବଢିଥାଏ । ଯଦି ସପ୍ତାହକ ପାଇଁ ପନିର୍ ଷ୍ଟୋର କରନ୍ତି, ତେବେ ଫୁଡ ପଏଜନିଂ ହେବାର ଆଶଙ୍କା ରହିଛି ।
ଷ୍ଟୋର କରିବ ପୂର୍ବରୁ ଭଲ ଭାବେ ଧୋଇ ନିଅନ୍ତୁ: ପନିର୍କୁ ଷ୍ଟୋର୍ କରିବା ପୂର୍ବରୁ ଏହାକୁ ଭଲ ଭାବେ ଧୋଇ ନିଅନ୍ତୁ । ସେଥିରେ ପୂର୍ବରୁ ଥିବା ବ୍ୟାକ୍ଟେରିଆ , ଜୀବାଣୁ ଓ ଅପରିଷ୍କାର ରହିଥିଲେ ସଫା ହୋଇଯିବ । ଯଦି ପନିର୍କୁ ଠିକ୍ ଭାବେ ଷ୍ଟୋର ନ କରାଯାଏ, ତେବେ ଡାଇରିଆ, ପେଟ ଯନ୍ତ୍ରଣା ଓ ବାନ୍ତି ହେବାର ଆଶଙ୍କା ସୃଷ୍ଟି ହୋଇଥାଏ ।
