ନୂଆଦିଲ୍ଲୀ: ଦିଲ୍ଲୀର ପୂର୍ବତନ ମୁଖ୍ୟମନ୍ତ୍ରୀ ଏବଂ ଆପ୍ର ରାଷ୍ଟ୍ରୀୟ ସଂଯୋଜକ ଅରବିନ୍ଦ କେଜ୍ରିଓ୍ବାଲ ନିଜର ପ୍ରତିଶ୍ରୁତି ପୂରଣ କରିନଥିବା ସ୍ବୀକାର କରିଛନ୍ତି । ପୂର୍ବ ନିର୍ବାଚନ ସମୟରେ ଦେଇଥିବା ପ୍ରତିଶ୍ରୁତି ମଧ୍ୟରୁ ୩ଟି ପୂରଣ କରିପାରି ନାହାନ୍ତି ବୋଲି ଦିଲ୍ଲୀବାସୀଙ୍କ ଆଗରେ ମାନିଛନ୍ତି ଅରବିନ୍ଦ କେଜ୍ରିଓ୍ବାଲ । ଯମୁନା ନଦୀ ପରିଷ୍କାର, ସ୍ବଚ୍ଛ ପାନୀୟ ଜଳ ଯୋଗାଣ ଏବଂ ଦିଲ୍ଲୀର ରାସ୍ତାକୁ ୟୁରୋପ୍ ଭଳି କରିବା ପାଇଁ ଦେଇଥିବା ପ୍ରତିଶ୍ରୁତି ପୂରଣ କରିପାରି ନାହାନ୍ତି ବୋଲି କେଜ୍ରିଓ୍ବାଲ କହିଛନ୍ତି ।
ଏହି ସବୁ ପ୍ରତିଶ୍ରୁତି ପୂରଣ କରିବା ଦିଗରେ କାର୍ଯ୍ୟ ଜାରି ରହିଛି ଏବଂ ଆଗାମୀ ୫ ବର୍ଷ ମଧ୍ୟରେ ପୂରା ହୋଇପାରିବ ବୋଲି କହିଛନ୍ତି ଦିଲ୍ଲୀ ପୂର୍ବତନ ମୁଖ୍ୟମନ୍ତ୍ରୀ । ଗତ ନିର୍ବାଚନରେ ଦେଇଥିବା ପ୍ରତିଶ୍ରୁତି ପୂରଣ ହୋଇନଥିବାରୁ ଆଗାମୀ ନିର୍ବାଚନ ପରେ ଏହାକୁ ପୂରଣ କରିବେ ବୋଲି ପୁଣି ପ୍ରତିଶ୍ରୁତି ଦେଇଛନ୍ତି କେଜ୍ରିଓ୍ବାଲ ।
ଦିଲ୍ଲୀ ବିଧାନସଭା ନିର୍ବାଚନ ଫେବୃଆରୀ ୫ରେ ହେବାକୁ ଥିବା ବେଳେ ୮ ତାରିଖରେ ଫଳାଫଳ ଘୋଷଣା ହେବ । ଏହା ପୂର୍ବରୁ ଜାତୀୟ ରାଜଧାନୀରେ ରାଜନୈତିକ ଉଷ୍ମତା ବୃଦ୍ଧି ପାଇଛି। ବିଜେପି, କଂଗ୍ରେସ ଏବଂ ଆପ୍ ମଧ୍ୟରେ ଜୋରଦାର ଲଢ଼େଇ ହେବାକୁ ଥିବା ବେଳେ ସବୁ ଦଳର ନେତା ଏବେ ମୈଦାନରେ । ଘରକୁ ଘର ବୁଲି ଭୋଟ ମାଗୁଛନ୍ତି ସବୁ ଦଳର ପ୍ରାର୍ଥୀ ଏବଂ କାର୍ଯ୍ୟକର୍ତ୍ତା । ସେପଟେ ନିର୍ବାଚନୀ ବୈତରଣୀ ପାର ହେବାକୁ ରାଜନୈତିକ ଦଳ ଲୋକମାନଙ୍କୁ ଲୋଭନୀୟ ପ୍ରତିଶ୍ରୁତି ମଧ୍ୟ ଦେଉଛନ୍ତି । ତେବେ ନିର୍ବାଚନ ଶେଷ ହେବା ପରେ କେଉଁ ଦଳ ଜିତିବ ତାହା ଜଣାପଡ଼ିବ । ଏହା ସହ ପରବର୍ତ୍ତୀ ସମୟରେ ସେହି ଦଳ ନିଜର ପ୍ରତିଶ୍ରୁତି ପୂରଣ କରୁଛି କି ନାହିଁ ସ୍ପଷ୍ଟ ହୋଇଯିବ ।
