ମୁମ୍ବାଇ: ପ୍ରଭାସ ଏବଂ କିର୍ତ୍ତୀ ସାନନ ଅଭିନୀତ ଫିଲ୍ମ ‘ଆଦିପୁରୁଷ’ ୨୦୨୩ରେ ପ୍ରେକ୍ଷାଳୟକୁ ଆସିଥିଲା । ଏଥିରେ ରାବଣ ଭୂମିକାରେ ନଜର ଆସିଥିଲେ ସୈଫ ଅଲ୍ଲୀ ଖାନ । କିନ୍ତୁ ଉଭୟ ଫିଲ୍ମ ଏବଂ କଳାକାରଙ୍କୁ ଦର୍ଶକଙ୍କ ସମାଲୋଚନାର ଶିକାର ହେବାକୁ ପଡ଼ିଥିଲା । ରାବଣ ଭୂମିକାରେ ନଜର ଆସିଥିବା ସୈଫ ଅଲ୍ଲୀ ଖାନ ମଧ୍ୟ ସମାଲୋଚିତ ହୋଇଥିଲେ । କିନ୍ତୁ ଏବେ ସାଉଥ ସୁପରଷ୍ଟାର ‘ୟଶ୍’ ରାବଣ ଭୂମିକାରେ ନଜର ଆସିବେ । ନୀତେଶ ତିଓ୍ବାରୀ ନିର୍ଦ୍ଦେଶିତ ଚଳଚ୍ଚିତ୍ର ‘ରାମାୟଣ’ରେ ରାବଣ ଭୂମିକାରେ ସେ ହିଁ ନଜର ଆସିବେ ବୋଲି ସ୍ପଷ୍ଟ କରିଛନ୍ତି କେଜିଏଫ୍ ଷ୍ଟାର ‘ୟଶ୍’ ।
ଏହି ଫିଲ୍ମରେ ବ୍ରହ୍ମାସ୍ତ୍ର ଅଭିନେତା ରଣବୀର କପୁର ଭଗବାନ ରାମଙ୍କ ଭୂମିକାରେ ନଜର ଆସିବାକୁ ଥିବା ବେଳେ ମା’ ସୀତାଙ୍କ ଭୂମିକାରେ ଦର୍ଶକଙ୍କ ହୃଦୟ ଜିଣିବାକୁ ପ୍ରସ୍ତୁତ ସାଉଥ ଅଭିନେତ୍ରୀ ସାଇ ପଲ୍ଲବୀ । ତେବେ ଅପକମିଂ ଚଳଚ୍ଚିତ୍ର ‘ରାମାୟଣ’ର ନିର୍ଦ୍ଦେଶନା ଦେଉଛନ୍ତି ଦଙ୍ଗଲ ଫେମ୍ ନୀତେଶ ତିଓ୍ବାରୀ । ସେପଟେ ନିଜର ଆଗାମୀ ଚଳଚ୍ଚିତ୍ର ‘ଟକ୍ସିକ୍’ ପାଇଁ ବ୍ୟସ୍ତ ଅଛନ୍ତି ୟଶ୍ ।
ଲସ୍ ଆଞ୍ଜେଲସ୍ରେ ହଲିଉଡ ରିପୋର୍ଟକୁ ପ୍ରତିକ୍ରିୟା ଦେଇ ୟଶ୍ କହିଥିଲେ, ଟକ୍ସିକ୍ର ଭିଏଫଏକ୍ସ ପାଇଁ ଆମେରିକା ଯାଇଥିଲି । ସେବେ ନମିତା ମଲହୋତ୍ରା ମୋତେ ସାକ୍ଷାତ କରିବାକୁ ଚାହୁଁଛନ୍ତି ବୋଲି କହିଥିଲେ । ସାକ୍ଷାତ କରିବା ପରେ ସେ, ରାମାୟଣରେ ରାବଣ ଭୂମିକା କରିବାକୁ ମୋତେ କହିଥିଲେ । ଆଉ ମୁଁ ଏଥିରେ ରାଜି ହୋଇଯାଇଥିଲି । ଏଭଳି ଫିଲ୍ମ ନିର୍ମାଣ କରିବାର ଶୈଳୀ ବିଲକୁଲ ଅଲଗା । ଏଥିରେ ପ୍ରତିଟି ଭୂମିକା ଲାଗି ଦମଦାର ଅଭିନୟର ଆବଶ୍ୟକତା ରହିଛି । ମୁଁ ଏହି ଭୂମିକା ଲାଗି ଖୁବ ପରିଶ୍ରମ କରିବି ଏବଂ ଦର୍ଶକଙ୍କୁ ଏକ ନୂଆ ସ୍ବାଦର ଅଭିନୟ ଭେଟି ଦେବି ।’
ସାଉଥ ସୁପରଷ୍ଟାର ୟଶଙ୍କ ଫିଲ୍ମ ଲଗାତାର ସୁପରହିଟ୍ ସାବ୍ୟସ୍ତ ହୋଇଛି । ୨୦୧୮ରେ ୟଶ୍ ଅଭିନୀତ କେଜିଏଫ ବକ୍ସ ଅଫିସ୍ର ସବୁ ରେକର୍ଡ ବ୍ରେକ୍ କରିଥିଲା । ୟଶଙ୍କୁ ଏହି ଫିଲ୍ମ ‘ପ୍ୟାନ୍-ଇଣ୍ଡିଆ’ ଷ୍ଟାରର ମାନ୍ୟତା ଦେଇଥିଲା । ସେହିଭଳି ୨୦୨୨ରେ ଆସିଥିବା କେଜିଏଫ-୨ ମଧ୍ୟ ବକ୍ସ ଅଫିସ୍ରେ ଜବରଦସ୍ତ କଲେକ୍ସନ କରିଥିଲା । ବିଶ୍ବବ୍ୟାପୀ ୧୦୦୦ କୋଟିରୁ ଅଧିକ ଆୟ କରିଥିଲା ୟଶ୍ ଅଭିନୀତ କେଜିଏଫ-୨ । ରାମାୟଣ ବ୍ୟତୀତ ୟଶଙ୍କ ଟକ୍ସିକ୍ ଏବଂ କେଜିଏଫ୍-୩ ଚଳଚ୍ଚିତ୍ର ଆଗମୀ ଦିନରେ ରିଲିଜ୍ ହେବାକୁ ଯାଉଛି ।
