ପୁରୀ,୨୫/୦୨: ବାଲିସାହିରେ ଖଜା ବ୍ୟବସାୟରୁ ଆକ୍ରମଣ ମାମଲାରେ ଆଉ ଜଣକୁ ଗିରଫ କରିଛି ଟାଉନ୍ ଥାନା ପୁଲିସ । ଅଭିଯୁକ୍ତ ଜଣକ ହେଲା ଖଜା ବ୍ୟବସାୟୀ କାଳୀକାଦେବୀ ସାହିର ମୂଷା ସ୍ୱାଇଁର ଜ୍ୱାଇଁ ଚନ୍ଦନପୁର ଥାନା ଅଧୀନ ଉତ୍ତରହଣା ମଠସାହିର ଟୁଲୁ ପ୍ରଧାନ (୪୨) । ସେ କେରାଣ୍ଡିପୁର ପଞ୍ଚାୟତର ସରପଞ୍ଚଙ୍କ ସ୍ୱାମୀ ବୋଲି ପୁଲିସ କହିଛି । ସୋମବାର ଦୋବନ୍ଧା ସ୍ଥିତ ପଞ୍ଚାୟତ କାର୍ଯ୍ୟାଳୟରେ ଭତ୍ତା ବାଣ୍ଟୁଥିବାବେଳେ ତାକୁ ପୁଲିସ ବାନ୍ଧିଛି । ଗିରଫ ଅଭିଯୁକ୍ତ ଟୁଲୁକୁ ଅପରାହ୍ନରେ କୋର୍ଟ ଚାଲାଣ କରାଯାଇଛି । ଜାମିନ ନାମଞ୍ଜୁର ହେବାରୁ ତାକୁ ଜେଲ୍ ପଠାଇ ଦିଆଯାଇଥିବା ପୁଲିସ କହିଛି । ଟୁଲୁ ତା’ ଶ୍ୱଶୁର ମୂଷା ପାଖରେ ରହି ଖଜା ବ୍ୟବସାୟ କରୁଥିବାବେଳେ ଆକ୍ରମଣ ପରେ ଗାଁକୁ ପଳାଇଥିଲା ବୋଲି ପୁଲିସ କହିଛି । ପୂର୍ବରୁ ଏହି ମାମଲାରେ ମୂଷା ପୁତୁରା ବାଲିସାହି ସିଦ୍ଧବକୁଳ ଲେନ୍ର ରାଜା ସ୍ୱାଇଁ (୨୭)କୁ ଗିରଫ କରିଥିଲା ପୁଲିସ । ଆକ୍ରମଣର ଶିକାର ଆହତ ବାଲିସାହି ସିଦ୍ଧବକୁଳ ଲେନ୍ର ଈଶ୍ୱର ସିଂହ (୫୩) ଏବେ ଚିକିତ୍ସାଧୀନ ଥିବା ଜଣାପଡ଼ିଛି ।
ଖବର ଅନୁସାରେ ଈଶ୍ୱର ଓ ମୂଷା ଦୁଇ ଜଣ ଖଜା ବ୍ୟବସାୟୀ । ଉଭୟଙ୍କ ବାଲିସାହି ସ୍ଥିତ ବୁଢ଼ୀମା’ ମନ୍ଦିର ପାଖରେ ୨ଟି ଖଜା ଦୋକାନ ରହିଛି । ବ୍ୟବସାୟକୁ କେନ୍ଦ୍ର କରି ୨ ଦୋକାନୀଙ୍କ ମଧ୍ୟରେ ବିବାଦ ଲାଗି ରହିଥିଲା । ଗତ ୧୮ ତାରିଖରେ ଉଭୟ ପକ୍ଷଙ୍କ ମଧ୍ୟରେ ଝଗଡ଼ା ଲାଗିଥିଲା । ମୂଷା, ତା’ ପୁଅ ଅଭୟ ସ୍ୱାଇଁ, ପୁତୁରା ରାଜି ଓ ଜ୍ୱାଇଁ ଟୁଲୁ ଉତ୍କ୍ଷିପ୍ତ ହୋଇ ଈଶ୍ୱରଙ୍କୁ ଆକ୍ରମଣ କରିଥିଲେ । ଷ୍ଟିଲ୍ ଚେୟାର୍ରେ ପିଟି ଈଶ୍ୱରଙ୍କୁ ରକ୍ତାକ୍ତ କରିଥିଲେ । ତାଙ୍କୁ ଜିଲ୍ଲା ମୁଖ୍ୟ ଚିକିତ୍ସାଳୟରେ ପ୍ରାଥମିକ ଚିକିତ୍ସା ପରେ କଟକ ସ୍ଥାନାନ୍ତର କରାଯାଇଥିଲା । ଏନେଇ ଈଶ୍ୱରଙ୍କ ପୁଅ କୃଷ୍ଣଚନ୍ଦ୍ର ସିଂହ ଏତଲା ଦେଇଥିଲେ । ପୁଲିସ ମାମଲା ରୁଜୁ କରିଥିବାବେଳେ ଏସ୍ଆଇ ମୌମ୍ୟରଞ୍ଜନ ଜେନା ତଦନ୍ତ ଦାୟିତ୍ୱ ନେଇଥିଲେ । ଗତ ୧୯ ତାରିଖରେ ରାଜାକୁ ଗିରଫ ହୋଇଥିଲା । ୨୦ ତାରିଖରେ ତାକୁ କୋର୍ଟ ଚାଲାଣ କରାଯାଇଥିଲା । ରାଜା ଓ ଟୁଲୁ ଏବେ ଜେଲ୍ରେ ଥିବାବେଳେ ମୂଷା ଓ ଅଭୟ ଫେରାର୍ ଥିବା କହିଛନ୍ତି ଆଇଆଇସି ଗୋକୁଳ ରଞ୍ଜନ ଦାସ ।
