କୋଲକାତା,୨୮/୦୬: ଦେଶକୁ ଦୋହଲାଇ ଦେଇଥିବା ଆରଜି କର ଡାକ୍ତର ଦୁଷ୍କର୍ମ ମାମଲା ମନରୁ ଲିଭିନାହିଁ । ପୁଣି କୋଲକାତାରେ ଆଉ ଏକ ଲଜ୍ଜା । ସାଉଥ କେଲକାତା ଲ' କଲେଜରେ ଆଇନ୍ ଛାତ୍ରୀଙ୍କୁ ଗଣଦୁଷ୍କର୍ମ ଅଭିଯୋଗ ହୋଇଛି । ଘଟଣାରେ ୩ ଜଣ ଗିରଫ ହୋଇଛନ୍ତି । ଅଭିଯୋଗ ତଥ୍ୟରୁ ଘଟଣାର ବର୍ବରତା ସାମ୍ନାକୁ ଆସିଛି । ଛାଡି଼ଦେବାକୁ ଅଭିଯୁକ୍ତଙ୍କ ଗୋଡ଼ ଧରିଥିଲେ ପୀଡିତା ହେଲେ ସେ ତାଙ୍କୁ ଛାଡିନଥିବା ଏଫଆରରୁ ସାମ୍ନାକୁ ଆସିଛି । ଯାହା ପ୍ରମାଣ କରୁଛି କେତେ ବର୍ବର, ଅମାନୁଷିକ ସେମାନେ । ସେମାନଙ୍କ ପାଖରେ ମାନବିକତା ମରିଯାଇଥିଲା ।
ଦକ୍ଷିଣ କୋଲକାତାର ଏକ ଲ’କଲେଜରେ ଜଣେ ଆଇନ ଛାତ୍ରୀଙ୍କୁ ଗଣଦୁଷ୍କର୍ମ ମାମଲା ସାମ୍ନାକୁ ଆସିଛି । ଘଟଣାଟି ୨୫ ଜୁନ୍ର । ରାତି ପ୍ରାୟ ୧୦ଟା ହେବ । କଲେଜର ଗ୍ରାଉଣ୍ଡ ଫ୍ଲୋରର ଏକ ଗାର୍ଡ ରୁମ୍ରେ ଅଭିଯୁକ୍ତମାନେ ଏହି ଜଘନ୍ୟ କାଣ୍ଡ ଘଟାଇଥିଲେ । ଏହାପରେ ଛାତ୍ରୀଜଣକ ପୁଲିସରେ ଅଭିଯୋଗ କରିଥିଲେ । ଅଭିଯୋଗ ପରେ ୩ ଜଣ ଅଭିଯୁକ୍ତଙ୍କୁ ଗିରଫ କରାଯାଇଛି । ସେମାନେ ହେଲେ ମନୋଜିତ ମିଶ୍ର, ଜୈବ ଅହମ୍ମଦ ଏବଂ ପ୍ରମିତ ମୁଖାର୍ଜୀ । ମନୋଜିତ୍ ମିଶ୍ର ହିଁ ଘଟଣାର ମାଷ୍ଟରମାଇଣ୍ଡ ବୋଲି କୁହାଯାଉଛି ।
ଜୁନ୍ ୨୬ରେ ମାମଲାରେ ଏଫଆଇଆର ହୋଇଥିଲା । ଅଭିଯୋଗରେ ଦର୍ଶାଯାଇଛି କି, ମନୋଜିତ୍ ପୀଡ଼ିତାଙ୍କୁ ବିବାହ ଲାଗି ପ୍ରସ୍ତାବ ଦେଇଥିଲେ । କିନ୍ତୁ ତାଙ୍କର ପୂର୍ବରୁ ଜଣେ ବୟଫ୍ରେଣ୍ଡ ଥିବା ଦର୍ଶାଇ ସେ ପ୍ରସ୍ତାବକୁ ପ୍ରତ୍ୟାଖ୍ୟାନ କରିଥିଲେ । ଘଟଣା ଦିନ ସେ ଫର୍ମ ପୂରଣ ଲାଗି କଲେଜ ଯାଇଥିବାବେଳେ ଅଭିଯୁକ୍ତମାନେ ତାଙ୍କୁ ପ୍ରଥମେ ଅଟକାଇଥିଲେ । ପରେ ଗ୍ରାଉଣ୍ଡ ଫ୍ଲୋରର ଏକ କୋଠରୀକୁ ନେଇ ମେନ୍ ଗେଟ୍ ବନ୍ଦ କରିଦେଇଥିଲେ । ଏହି ସମୟରେ ତାଙ୍କୁ ଛାଡ଼ିବାକୁ ସେ ଅଭିଯୁକ୍ତଙ୍କ ଗୋଡ଼ ଧରି ନେହୁରା ହୋଇଥିଲେ ବି କେହି ତାଙ୍କ କଥା ଶୁଣିନଥିଲେ । ଜଘନ୍ୟ କାଣ୍ଡ ଘଟାଇଥିଲେ । ଅଭିଯୁକ୍ତମାନେ ତାର ଭିଡିଓ କରିଥିଲେ । କେବଳ ସେତିକି ନୁହେଁ, ହକି ଷ୍ଟିକ୍ରେ ତାଙ୍କୁ ହତ୍ୟା କରିବାକୁ ଉଦ୍ୟମ ବି କରିଥିଲେ । ପରେ ଘଟଣା ସଂପର୍କରେ କାହାକୁ କହିଲେ ଭିଡିଓକୁ ଭାଇରାଲ୍ କରିଦେବାକୁ ଧମକ ଦେଇଥିଲେ ।
ପଢା ସରିବା ପରେ ବି କଲେଜ ଉପରେ ଥିଲା କଣ୍ଟ୍ରୋଲ- ଦୁଇ ଅଭିଯୁକ୍ତ ଜୈବ୍ ଓ ପ୍ରମିତ ଏବେ କଲେଜରେ ପଢୁଛନ୍ତି । ମନୋଜିତ କଲେଜର ପୂର୍ବତନ ଛାତ୍ର । ସେ ଓକିଲ ଥିବା ଜଣାପଡିଛି । ତାଙ୍କୁ ସଂସ୍ଥାନର ଗଭର୍ନିଂ ବଡିରେ ଅସ୍ଥାୟୀ ନିଯୁକ୍ତି ଦିଆଯାଇଥିଲା । ମନୋଜିତ ହିଁ ଏହି ଘଟଣାର ମାଷ୍ଟରମାଇଣ୍ଡ ବୋଲି କୁହାଯାଉଛି । ପାଠପଢା ସରିବା ପରେ ବି କଲେଜ ଉପରେ ମନୋଜିତ୍ର କଣ୍ଟ୍ରୋଲ ଥିଲା । ଏହା ସହିତ ସେ ଟିଏମ୍ସିର ଛାତ୍ର ନେତା ଥିବା ଜଣାପଡିଛି ।
