ଭୁବନେଶ୍ୱର,୧୭/୧୧: ହଜାରେ କି ୨ହଜାର ବର୍ଗଫୁଟ୍ ନୁହେଁ । କୋଳଥିଆ ମୌଜାର ଜୟଦେବ ବାଟିକା ସାମ୍ନା ଖଣ୍ଡଗିରି ବାରି ବସ୍ତିରେ ଏକାବେଳକେ ଅଧ ଏକର ସରକାରୀ ଜମିକୁ ମାଡି ବସିଛନ୍ତି । ଗୋଟିଏ ଛୋଟିଆ କୁଟୀରରୁ ଆଶ୍ରମର କାୟା ଧୀରେ ଧୀରେ ଖେଦି ଚାଲିଛି। ରାଜଧାନୀ ଛାତିରେ ସରକାରୀ ଜାଗାରେ ବିରାଟ ସାମ୍ରାଜ୍ୟ ଛିଡ଼ା ହୋଇଛି ।
କୁନି ସାରଥୀର ପାଦ ତଳେ ତୁଳସୀ ପତ୍ର ପ୍ରସଙ୍ଗକୁ ନେଇ ଚାରିଆଡ଼େ ଚର୍ଚ୍ଚ ଚାଲିଥିବା ବେଳେ ଏଭଳି ସାଂଘାତିକ ଅଭିଯୋଗ ଉଠିଛି । ରାଜ୍ୟ ସମାଜସେବୀ ମହାସଂଘ ସଭାପତି ନାରାୟଣ ସାହୁ ସରକାରୀ ଜାଗାରେ ଆଶ୍ରମ ନାଁରେ ଭଣ୍ଡାମି ଚାଲିଥିବା ଅଭିଯୋଗ ବାଢ଼ିଛନ୍ତି । ଏଭଳି ଅଭିଯୋଗ ପରେ ବିଏମ୍ସି ଓ ବିଡିଏ ତତ୍ପର ହୋଇଛି । ଆସନ୍ତା ସୋମବାର ସାଧାରଣ ପ୍ରଶାସନର ଏକ ଦଳ ଆଶ୍ରମକୁ ଯାଇ ଜମି ପଟ୍ଟା ଯାଞ୍ଚ କରିବ ବୋଲି ସୂଚନା ମିଳିଛି ।
ଶ୍ରୀ ବୈକୁଣ୍ଠ ଧାମ ଆଶ୍ରମରେ ଶନିବାର ଦିନତମାମ ଉତ୍ତେଜନା ଲାଗିରହିଥିଲା । ସ୍ଥାନୀୟ ବାସିନ୍ଦାମାନେ ଘୋର ବିରୋଧ କରିଥିଲେ । ସ୍ଥାନୀୟ ବାସିନ୍ଦା ଶିବ ସୁନ୍ଦର ସ୍ୱାଇଁ ଅଭିଯୋଗ କରିଛନ୍ତି, ଧର୍ମ ନାଁରେ ଲୋକଙ୍କୁ ମିଛ ଗପ ଶୁଣାଇ ଭୟଭୀତ କରାଯାଉଛି । ପିଲାଟିକୁ ପାଠ ପଢ଼ାଇବା ବଦଳରେ ଏଭଳି ଡ୍ରାମାବାଜି ଧାର୍ମିକ ଭାବନାକୁ ଆଘାତ ଦେଉଛି । ଶନିବାର ପୂର୍ବାହ୍ଣରେ ଆଶ୍ରମରେ ଭରତପୁର ଥାନାର ପୁଲିସ ଟିମ୍ ପହଞ୍ଚି ତନାଘନା କରିଥିଲା ।
ପୁଲିସ ତଥ୍ୟ ମୁତାବକ, ଭାଷ୍ୟକାର କାଶୀନାଥ ମିଶ୍ର ବର୍ତ୍ତମାନ କୋଲକାତାରେ ରହୁଛନ୍ତି । କଳକୀଙ୍କ ଅବତାର ଦର୍ଶାଯାଉଥିବା ତାଙ୍କ ପୁଅ ସତୀଶ ଚନ୍ଦ୍ର ମିଶ୍ରଙ୍କ ଦେଖାଦର୍ଶନ ମିଳିନାହିଁ । ଭାଇରାଲ ହେଉଥିବା ଫଟୋଟି ୧୦ ବର୍ଷର ପୁରୁଣା । ଆଶ୍ରମରେ କୌଣସି ଅନୈତିକ କାମ ଚାଲିଛି କି ନାହିଁ, ପୁଲିସ ଖୋଳତାଡ଼ କରୁଛି । ଫଟୋଚିତ୍ରକୁ କିଏ ଭାଇରାଲ କଲା? ସେନେଇ ଆଶ୍ରମ ପକ୍ଷରୁ ସାଇବର ଥାନାରେ ଏକ ଏତଲା ଦିଆଯାଇଛି ।
ଆଶ୍ରମ ଟ୍ରଷ୍ଟିଙ୍କ ଅଜବ ଯୁକ୍ତି
ସୁଧର୍ମା ମହାସଭା ସଭାପତି ତଥା ଆଶ୍ରମ ଟ୍ରଷ୍ଟି ପାଣ୍ଡବ କୁମାର ପରିଡ଼ା ଏନେଇ ଅଜବ ଯୁକ୍ତି ବାଢ଼ିଛନ୍ତି । ସେ କହିଛନ୍ତି, ସୁଧର୍ମା ମହାସଭା ଅର୍ଥ ହେଉଛି ଦେବତାମାନଙ୍କ ମହାସଭା । ଆମେ ବର୍ଷ ବର୍ଷ ଧରି ମାଳିକା ଉପରେ ଗବେଷଣା କରୁଛୁ । ଆମ ପ୍ରଭୁଙ୍କୁ ଯେତେବେଳେ ୪ ବର୍ଷ ହୋଇଥିଲା, ଖୋଦ୍ ମୋତେ ଶୂନ୍ୟବାଣୀ ହୋଇଥିଲା । ମହାପ୍ରଭୁ ଯାଜପୁରରେ ଭାଷ୍ୟାକାର କାଶୀନାଥ ମିଶ୍ରଙ୍କ ଘରେ ଜନ୍ମ ନେଇଥିଲେ । ସେଠୁ ଆସି ଗୁପ୍ତ ଖଣ୍ଡଗିରିରେ ବାସ କରୁଛନ୍ତି । ମାଳିକା ଅନୁସାରେ ୨୦୦୫ରେ ହିଁ ପ୍ରଭୁ ଜନ୍ମ ନେଇଛନ୍ତି ।
ଶାସ୍ତ୍ରରେ ଯାହା ଲେଖାଯାଇଛି, ତାହା ସବୁ ଘଟିଚାଲିଛି । ଦିନେ ସମୁଦ୍ର ଦେବତା ୪୦ ଫୁଟ୍ ଦୂରରେ ଥିଲେ । ପ୍ରଭୁଙ୍କ ଇଛାକ୍ରମେ ସମୁଦ୍ର ଆମ ପଦକୁ ଛୁଇଁଲେ । ସାରା ବିଶ୍ୱରୁ ଶହ ଶହ ଭକ୍ତ ଆଶ୍ରମକୁ ଆସୁଛନ୍ତି । ଏହି ଆଶ୍ରମ ଭିତରକୁ ପାନ ବିଡି଼ ମଦ ମାଂସ ଖାଉଥିବା ଲୋକଙ୍କ ପ୍ରବେଶରେ ରୋକ ଲାଗିଛି । ଏବେ ଯେଉଁ ଫଟୋକୁ ନେଇ ବିବାଦ ହେଉଛି, ତାହା ପ୍ରାୟ ୧୦ ବର୍ଷ ତଳର । କିଏ ଭାଇରାଲ କଲା, ତାହା ଜଣା ନାହିଁ । ବର୍ତ୍ତମାନ ତାଙ୍କ ପାଦରେ ନୁହେଁ ବରଂ ମୁଣ୍ଡରେ ତୁଳସୀ ଲାଗି ହେଉଛି । ଭଗବାନଙ୍କୁ ସହିପାରୁନଥିବା କିଛି ଦୁଷ୍ଟ ବ୍ୟକ୍ତି ତାଙ୍କୁ ବିରୋଧ କରୁଛନ୍ତି ।
କେଟିଏମ୍ ଚଢ଼ୁଛନ୍ତି ‘କଳ୍କୀଙ୍କ ଅବତାର’ ସ୍ଥାନୀୟ ଲୋକଙ୍କ କହିବା ଅନୁସାରେ, ସେମାନେ ୧୦ରୁ ୧୨ ବର୍ଷ ଧରି କୁନି ପିଲାକୁ ଦେଖି ଆସୁଛନ୍ତି । ବର୍ତ୍ତମାନ ସେ ଯୁବକ ହୋଇଗଲାଣି । ଇନ୍ଫୋସିଟି ଅଞ୍ଚଳର ଏକ ଘରୋଇ କଲେଜରେ ପଢ଼ୁଛି । ସେ କାନ୍ଧରେ ପାଠପଢ଼ା ବ୍ୟାଗ୍ ପକାଇ ଏକ ଦ୍ରୁତଗାମୀ ବାଇକ୍ (କେଟିଏମ୍)ରେ ସହର ଘୁରି ବୁଲୁଛି ।
ଟଙ୍କା ନେଣଦେଣ ପାଇଁ ଭକ୍ତଙ୍କ ଆକାଉଣ୍ଟ ଏହି ଆଶ୍ରମରେ ପାଖାପାଖି ୫୦ଜଣ ସଦସ୍ୟ କାମ କରୁଛନ୍ତି । ଅଧିକାଂଶ ମହିଳା ଓ ଯୁବତୀ । ଟଙ୍କା ନେଣଦେଣ ପାଇଁ ଭକ୍ତମାନଙ୍କ ଆକାଉଣ୍ଟ ବ୍ୟବହାର ହେଉଛି । ଫଳରେ କୋଟି କୋଟି ଟଙ୍କାର ନେଣଦେଣ ସହଜରେ ହେଉଥିବା ପୁଲିସ ହାତରେ ପ୍ରମାଣ ଲାଗିଛି ।
ମାସିକିଆ ବୁକ୍ ହେଉଥିଲା ଓୟୋ
ଆଶ୍ରମଠୁ କେଇ ମିଟର ଦୂରରେ ଥିବା ଶ୍ରୀଜଗନ୍ନାଥ ମନ୍ଦିର ନିକଟରେ ଏକ ଓୟୋ ହୋଟେଲ ରହିଛି । ଉକ୍ତ ହୋଟେଲର ସବୁ ରୁମ୍କୁ ଆଶ୍ରମ ପକ୍ଷରୁ ବର୍ଷ ବର୍ଷ ଧରି ମାସିକିଆ ବୁକ୍ କରାଯାଉଛି । ଆଶ୍ରମକୁ ଆସୁଥିବା ଅତିଥି ଓ ଭକ୍ତଗଣ ସେଠାରେ ରହୁଛନ୍ତି । ଭକ୍ତଙ୍କଠୁ ମିଳୁଥିବା ଅର୍ଥରେ ଉକ୍ତ ବସ୍ତିରେ ଏକ ୩ ମହଲା ଆଲିସାନ କୋଠା ମଧ୍ୟ ନିର୍ମାଣ ହୋଇଛି ।
