ଝାରସୁଗୁଡ଼ା,୧୯/୧୧: ଝାରସୁଗୁଡ଼ା ସହର ବମ୍ବେଛକ ପାଖରେ ଥିବା ବିବେକ ବିହାର ଆବାସିକ ଅଂଚଳରେ ସୋମବାର ସଂଧ୍ୟାରେ ଜମି ବିବାଦକୁ କେନ୍ଦ୍ର କରି ଗୁଳି ଫୁଟିଛି । ରାସ୍ତା ଅବରୋଧ କରି ପୂର୍ବରୁ ନିର୍ମିତ ଏକ ପାଚେରୀକୁ ଜେସିବି ସହାୟତାରେ ଭାଙ୍ଗିବା ସମୟରେ ଜଣେ ଅବସରପ୍ରାପ୍ତ ଖଣି ଅଧିକାରୀ ଏହାର ପ୍ରତିବାଦ କରିଥିଲେ । ସେଠାରେ କାର୍ଯ୍ୟରତ ଶ୍ରମିକ କର୍ମଚାରୀଙ୍କ ସହ ପାଟିତୁଣ୍ଡ ହେବା ସହ ଗଣ୍ଡଗୋଳ ପରେ ଅବସରପ୍ରାପ୍ତ ଖଣି ଅଧିକାରୀ ରାମଜୀ କୁମାର ସିଂଙ୍କ ପୁଅ ଅଭିଷେକ ସିଂ ଲାଇସନ୍ସ ପ୍ରାପ୍ତ ରାୟଫଲ୍ ବନ୍ଧୁକରୁ ଦୁଇ ରାଉଣ୍ଡ ଫାଙ୍କା ଗୁଳି ଚାଳନା କରିଥିଲେ । ଗୁଳି ଚାଳନା ପରେ ସେଠାରେ ଉତ୍ତେଜନା ପ୍ରକାଶ ପାଇଥିଲା । ସଦର ଥାନା ପୁଲିସ ପହଞ୍ଚି ତଦନ୍ତ ଆରମ୍ଭ କରିଥିଲା । ଗୁଳି କାଣ୍ଡରେ ସଂପୃକ୍ତ ବାପ ପୁଅଙ୍କୁ ସଦର ଥାନାରେ ଅଟକ ରଖି ଜେରା କରୁଥିବା ଆଇଆଇସି ସ୍ୱପ୍ନାରାଣୀ ଗୋଛାୟତ ସୂଚନା ଦେଇଛନ୍ତି ।
ପୁଲିସ ସୂଚନା ମତେ, ବମ୍ବେ ଛକରୁ ବିଟିଏମ ଯିବା ରାସ୍ତାର ବାମ ପାଶ୍ୱର୍ରେ ପ୍ରାୟ ଶହେ ମିଟର ଦୂରରେ ବିବେକ ବିହାର ଅଂଚଳରେ ଥିବା ଏକ ରାସ୍ତାକୁ ଅବରୋଧ କରି ପୂର୍ବରୁ ଏକ ପାଚେରୀ ଥିଲା । ଏହାକୁ ଭାଙ୍ଗିବା ପାଇଁ ଜମି ମାଲିକ ବିକାଶ ଅଗ୍ରୱାଲ ସୋମବାର ସଂଧ୍ୟା ପ୍ରାୟ ୫ଟାରେ ଜେସିବି ମେସିନ ସହ କିଛି ଶ୍ରମିକ କର୍ମଚାରୀଙ୍କୁ ପଠାଇଥିଲେ । ଏହି ସମୟରେ ଅବସରପ୍ରାପ୍ତ ଖଣି ଅଧିକାରୀ ରାମଜୀ ସିଂ, ତାଙ୍କ ପତ୍ନୀ ଓ ପୁଅ ପହଞ୍ଚି କାନ୍ଥ ଭଙ୍ଗାକୁ ପ୍ରତିବାଦ କରିଥିଲେ । ଶ୍ରୀମତୀ ସିଂଙ୍କ ସହ ନିୟୋଜିତ କର୍ମଚାରୀଙ୍କ ପାଟିତୁଣ୍ଡ ଚାଲିଥିବା ବେଳେ ବନ୍ଧୁକ ବାହାର କରି ଅଭିଷେକ ଦୁଇ ରାଉଣ୍ଡ ଫାଙ୍କା ଗୁଳି ଚାଳନା କରିଥିଲେ । ସେଠାରୁ ବାପ ପୁଅ ସିଧା ସଦର ଥାନାକୁ ଯାଇ କାନ୍ଥ ଭଙ୍ଗା ଯାଉଥିବା ସହ କିଛି ଲୋକ ପହଞ୍ଚି ଗଣ୍ଡଗୋଳ କରୁଥିବା ଅଭିଯୋଗ କରିଥିଲେ । ଅନ୍ୟପଟେ ବାପପୁଅଙ୍କ ଗୁଳିକାଣ୍ଡ ଘଟଣା ନେଇ ଜମି ମାଲିକ ପକ୍ଷ ମଧ୍ୟ ପୁଲିସକୁ ଜଣାଇଥିଲେ ।
ଘଟଣାସ୍ଥଳରେ ଏସ୍ଡିପିଓ, ଆଇଆଇସି ଏବଂ ଅନ୍ୟ ପୁଲିସ କର୍ମଚାରୀ ପହଞ୍ଚି ଯାଞ୍ଚ କରିଥିଲେ । ରାସ୍ତା ଅବରୋଧ କରି ତିଆରି ହୋଇଥିବା ବେଆଇନ ପାଚେରୀ ଭାଙ୍ଗିବାକୁ ଯାଇଥିବା କର୍ମଚାରୀଙ୍କ ସହ ଅବସରପ୍ରାପ୍ତ ଖଣି ଅଧିକାରୀ, ତାଙ୍କ ପତ୍ନୀ ଏବଂ ପୁଅ ଗଣ୍ଡଗୋଳ କରିଥିବା ଜମି ମାଲିକ ବିକାଶ ଅଗ୍ରୱାଲ ଅଭିଯୋଗ କରିଛନ୍ତି । ରାମଜୀ କୁମାର ସିଂ ପୂର୍ବରୁ ଏମସିଏଲ୍ରେ ବରିଷ୍ଠ ଅଧିକାରୀ ଭାବେ କାର୍ଯ୍ୟ କରିଥିବା ବେଳେ ସେ ଝାଡ଼ଖଣ୍ଡର ମୂଳ ବାସିନ୍ଦା ହୋଇଥିବା କୁହାଯାଉଛି । ତାଙ୍କ ନାମରେ ଗତ ୧୯୮୫ ମସିହାରେ ଝାଡ଼ଖଣ୍ଡ ହଜାରୀବାଗରେ ବନ୍ଧୁକ ଲାଇସନ୍ସ ପ୍ରଦାନ କରାଯାଇଥିବା ଜଣାପଡ଼ିଛି ।
