ନୂଆଦିଲ୍ଲୀ ୧୪/୦୪: ପ୍ରାୟ ୫୦ ଲକ୍ଷ ବର୍ଷ ପୂର୍ବେ ପୃଥିବୀକୁ ଆସିଥିଲା ଭୟଙ୍କର ବନ୍ୟା । ଏହି ବନ୍ୟା ଏତେ ବଡ଼ ଥିଲା ଯେ ଏହା ଜିବ୍ରାଲ୍ଟର (ଭୂମଧ୍ୟ ସାଗରରେ ଏକ ପଥୁରିଆ ଉପଦ୍ୱୀପ) ଏବଂ ସିସିଲି (ଭୂମଧ୍ୟ ସାଗରର ସବୁଠୁ ବଡ଼ ଦ୍ୱୀପ) ମଝିରେ ଥିବା ସ୍ଥଳଭାଗକୁ ଧସି ଦେଇଥିଲା । ଫଳରେ କିଛି ବର୍ଷରେ ହିଁ ପୂରା ଭୂମଧ୍ୟ ସାଗର ପାଣିରେ ଭରିଯାଇଥିଲା । ନିକଟରେ ବୈଜ୍ଞାନିକମାନେ ଏହି ଚକିତ କଲା ଭଳି ତଥ୍ୟ ସାମ୍ନାକୁ ଆଣିଛନ୍ତି ।
ବୈଜ୍ଞାନିକଙ୍କ ଅନୁସାରେ, ଆଟଲାଣ୍ଟିକ୍ ମହାସାଗର ପାଣି ଜିବ୍ରାଲ୍ଟର ଦେଇ ଭୂମଧ୍ୟ ସାଗରକୁ ମାଡ଼ି ଆସିଥିଲା । ସେତେବେଳେ ଭୂମଧ୍ୟ ସାଗର ଏକ ଶୁଖିଲା ଘାଟି ଥିଲା । ମହାସାଗର ପାଣି ପ୍ରାୟ ୧ କିମି ଉଚ୍ଚରୁ ତଳକୁ ଖସିଥିଲା । ଏହି ପାଣି ନିଜ ରାସ୍ତାରେ ଗଗନଶ୍ଚୁମ୍ବୀ ଅଟ୍ଟାଳିକା ଭଳି ଉଚ୍ଚତାର ଗଭୀର ଖାଇକୁ ଭରି ଦେଇଥିଲା । ଏତେ ସାରା ପାଣି ମାତ୍ର କିଛି ମାସରେ ହିଁ ପୂରା ଭୂମଧ୍ୟ ସାଗରକୁ ଭରି ଦେଇଥିଲା । ଏହି ବନ୍ୟା ନିଜ ଅନ୍ତିମ ଚରଣରେ ଥିବାବେଳେ ଆମାଜନ୍ ନଦୀଠାରୁ ବି ପ୍ରାୟ ହଜାର ଗୁଣା ଅଧିକ ପାଣି ବହିଥିଲା ।
୨୦୦୯ରେ ଏକ ରିସର୍ଚ୍ଚରୁ ମଧ୍ୟ ବୈଜ୍ଞାନିକମାନେ ଏହି ଥିଓରି ସାମ୍ନାରେ ରଖିଥିଲେ । ଏଥିରେ ଜିବ୍ରାଲ୍ଟର ପାଖ ସମୁଦ୍ର ତଳେ ମିଳିଥିବା ଏକ ବଡ଼ ଘାଟିର ଅଧ୍ୟୟନ କରାଯାଇଥିଲା । ଏହି ଘାଟି ଏହି ବିଶାଳକାୟ ବନ୍ୟା ଯୋଗୁ ନିର୍ମାଣ ହୋଇଥିବା କୁହାଯାଏ । ତେବେ କେତେକ ଦିଗରୁ ବୈଜ୍ଞାନିକମାନେ ଏ ବାବଦରେ ସ୍ପଷ୍ଟ ହେବା ଲାଗି ଗବେଷଣା ଜାରି ରଖିଛନ୍ତି । ଯଦି ଏହା ସତ ହୋଇଥାଏ ତେବେ ଏହି ବନ୍ୟାକୁ ଜ୍ୟାଙ୍କଲିନ୍ ମେଗାଫ୍ଲଡ୍ କୁହାଯିବ ଏବଂ ଏହାକୁ ପୃଥିବୀର ସବୁଠୁ ବଡ଼ ବନ୍ୟା ଭାବେ ବିବେଚନା କରାଯିବ । ତେବେ ଏତେ ବଡ଼ ଦାବି ପାଇଁ ସ୍ପଷ୍ଟ ପ୍ରମାଣର ଆବଶ୍ୟକତା ରହିଛି । ନିକଟରେ ବୈଜ୍ଞାନିକମାନେ ଜ୍ୟାଙ୍କଲିନ୍ ଯୁଗର ସେଡିମେଣ୍ଟାରୀ ରକ୍ ଉପରେ ଅଧ୍ୟୟନ କରିଥିଲେ । କିପରି ଆଧୁନିକ ସିସିଲି ଏବଂ ଆଫ୍ରିକା ମଧ୍ୟରେ ଥିବା ଜାଗା ଦେଇ ପାଣି ପୂର୍ବ ଭୂମଧ୍ୟ ସାଗରରେ ପୁଣି ଭରିଥିଲା ତାହା ଏହି ପଥରରୁ ଜଣାପଡ଼ିଥାଏ ।
ଏହି ଆବିଷ୍କାର ଏକ ଲମ୍ବା କାହାଣୀକୁ ନୂଆ ମୋଡ଼ ଦେଇଛି, ଯାହା କି ଉନବିଂଶ ଶତାବ୍ଦୀର ଶେଷ ଆଡ଼କୁ ଆରମ୍ଭ ହୋଇଥିଲା । ସେହି ସମୟରେ ବୈଜ୍ଞାନିକମାନେ ଭୂମଧ୍ୟ ସାଗର ଆଖପାଖରେ ଲୁଣରେ ଭର୍ତ୍ତି ହୋଇଥିବା ପଥର ଚଟାଣର ଅଧ୍ୟୟନ କରିଥିଲେ । ସେଥିରୁ ଜଣାପଡ଼ିଥିଲା ଯେ, ପ୍ରାୟ ୫୦/୬୦ ଲକ୍ଷ ବର୍ଷ ପୂର୍ବେ କିଛି ଅଜବ ଘଟଣା ଘଟିଥିଲା । ହିମ ଯୁଗ ପୂର୍ବରୁ ଏହି ସମୁଦ୍ର ଶୁଖି ଯାଇଥିଲା । ବୈଜ୍ଞାନିକମାନେ ଏହି ଯୁଗକୁ ‘ମେସିନିଅନ୍’ ଯୁଗ ନାଁ ଦେଇଥିଲେ ।
୧୯୭୦ ଦଶକରେ ବୈଜ୍ଞାନିକମାନେ ପ୍ରଥମ ଥର ଭୂମଧ୍ୟ ସାଗର ତଳେ ମେସିନିଅନ୍ ଯୁଗର ସେଡିମେଣ୍ଟାରୀ ପଥରକୁ ବେଶ୍ ଗଭୀର ପର୍ଯ୍ୟନ୍ତ ଖୋଳିଥିଲେ । ସେଥିରୁ ବେଶ୍ ଚକିତ କଲା ଭଳି କଥା ଜଣାପଡ଼ିଥିଲା । ପ୍ରାୟ ୬୦ ଲକ୍ଷ ବର୍ଷ ତଳେ ଏକ ବଡ଼ ପରିବର୍ତ୍ତନ ଆସିଥିଲା । ଟେକ୍ଟୋନିକ୍ ପ୍ଲେଟ୍ ଘୁଞ୍ଚିବା ଯୋଗୁ ଏହି ସମୁଦ୍ର ଆଟ୍ଲାଣ୍ଟିକ୍ ମହାସାଗରରୁ ସମ୍ପୂର୍ଣ୍ଣ ଭାବେ ଅଲଗା ହୋଇଯାଇଥିଲା ବୋଲି ବୈଜ୍ଞାନିକମାନେ ଜାଣିବାକୁ ପାଇଥିଲେ ।
