ନୂଆଦିଲ୍ଲୀ: ଜାନୁଆରୀ ୨୬ ସୁଦ୍ଧା ଦକ୍ଷିଣ ଲେବାନନ୍ରୁ ଇସ୍ରାଏଲ ନିଜର ସୈନ୍ୟ ପ୍ରତ୍ୟାହାର କରିନେବା ଦରକାର ବୋଲି ହେବ ବୋଲି ଦେଶର ନବନିର୍ବାଚିତ ରାଷ୍ଟ୍ରପତି ଜୋସେଫ୍ ଔନ କହିଛନ୍ତି । ଏହି ଦିନ ଇସ୍ରାଏଲ ଏବଂ ହିଜବୁଲ୍ଲା ମଧ୍ୟରେ ହୋଇଥିବା ଯୁଦ୍ଧ ବିରତି ବୁଝାମଣା ସଂପୂର୍ଣ୍ଣ ରୂପେ ଲାଗୁ ହେବର ଅଛି । ଏହା ପୂର୍ବରୁ ଇସ୍ରାଏଲ ଅସ୍ତ୍ର ବିରତି ଉଲ୍ଲଂଘନ କରୁଛି ବୋଲି ହିଜବୁଲ୍ଲା ମୁଖ୍ୟ ନାଇମ୍ କାସିମ ଅଭିଯୋଗ କରିଥିଲେ । ଏପରିକି ଏଥିପାଇଁ ଇସ୍ରାଏଲକୁ ପରିଣାମ ଭୋଗିବାକୁ ପଡ଼ିବ ବୋଲି ସେ ଚେତାବନୀ ଦେଇଥିଲେ । ଏହା ପରେ ପରେ ଦେଶର ରାଷ୍ଟ୍ରପତି ଜୋସେଫ ଔନ ଏଭଳି ଦାବି କରିଛନ୍ତି ।
ଜାତିସଂଘ ମୁଖ୍ୟ ଆଣ୍ଟୋନିଓ ଗୁଟେରସଙ୍କୁ ଔନ କହିଛନ୍ତି ଯେ, ନଭେମ୍ବର ୨୭ ପୂର୍ବରୁ ଦକ୍ଷିଣ ଲେବାନନ୍ରୁ ଇସ୍ରାଏଲ ନିଜର ସୈନ୍ୟ ପ୍ରତ୍ୟାହାର କରିବା ଦରକାର । ଏହା ସହ ଇସ୍ରାଏଲର ଆକ୍ରମଣ ଫଳରେ ଲେବାନନ୍ର ଅନେକ ଘର ଧ୍ବଂସ ହୋଇଥିବା ବେଳେ ଲୋକେ ବାସହରା ହେଉଛନ୍ତି ବୋଲି ସେ ଦାବି କରିଛନ୍ତି । ଯୁଦ୍ଧ ବିରତି ବୁଝାମଣା ଅନୁସାରେ, ଇସ୍ରାଏଲ ନିଜର ସୈନ୍ୟ ପ୍ରତ୍ୟାହାର କରିବାକୁ ଥିବା ବେଳେ ହିଜବୁଲ୍ଲା ମଧ୍ୟ ଲଟାନି ନଦୀ କୂଳରୁ ନିଜର ସୈନ୍ୟ ପ୍ରତ୍ୟାହାର କରିବ । ଏପରିକି ଦକ୍ଷିଣରେ ଥିବା ସମସ୍ତ ମିଲିଟାରି କ୍ୟାମ୍ପ ଉଠାଇବ ହିଜବୁଲ୍ଲା ।
ହିଜବୁଲ୍ଲା ମୁଖ୍ୟ କାସିମ କହିଥିଲେ, ଲେବାନନ୍ରେ ଇସ୍ରାଏଲ ଅସ୍ତ୍ର ବିରତି ଉଲ୍ଲଂଘନ କରୁଛି । ଶତାଧିକ ଥର ଏଭଳି ଅସ୍ତ୍ର ବିରତି ଉଲ୍ଲଂଘନ କରି ଇସ୍ରାଏଲ ଏବେ ଧୈର୍ଯ୍ୟର ସୀମା ଲଂଘିଛି । ଏହାକୁ ଆଗକୁ ଜାରି ରଖି ପାରିବ ନାହିଁ । ଆମ ଧୈର୍ଯ୍ୟର ପରୀକ୍ଷା ନିଅ ନାହିଁ ବୋଲି ସେ ଇସ୍ରାଏଲକୁ ଚେତାବନୀ ଦେଇଥିଲେ । କାସିମଙ୍କ ଏହି ଚେତାବନୀ ଏଭଳି ସମୟରେ ଆସିଛି, ଯେତେବେଳ ଗୁଟେରସ୍ ଲେବାନନ୍ରେ ପହଞ୍ଚି ସେଠାକାର ଶୀର୍ଷ ନେତୃତ୍ବଙ୍କ ସହ ଆଲୋଚନା କରିଛନ୍ତି । ସେ ଲେବାନନ୍ର ପ୍ରଧାନମନ୍ତ୍ରୀ ନଓ୍ବାଫ ସାଲମ ଏବଂ ଜୋସେଫ ଔନଙ୍କ ସହ ଦେଶର ସାଂପ୍ରତିକ ପରିସ୍ଥିତି ସଂପର୍କରେ କଥା ହୋଇଥିବା ଜଣାପଡ଼ିଛି ।
