ଶ୍ରୀନଗର,୧୫/୧୦: କୋଣାର୍କ ସୂର୍ଯ୍ୟସ ଓଡ଼ିଶା ଚଳିତ ଲିଜେଣ୍ଡସ ଲିଗ୍ କ୍ରିକେଟ୍ରେ ୧ ରନ୍ରେ ହାଇଦ୍ରାବାଦକୁ ପରାସ୍ତ କରି ଫାଇନାଲରେ ପ୍ରବେଶ କରିଛି । ଆସନ୍ତା ୧୬ ତାରିଖରେ ଓଡ଼ିଶା ଓ ସଦର୍ଣ୍ଣ ସୁପରଷ୍ଟାର୍ସ ମଧ୍ୟରେ ଫାଇନାଲ ଖେଳାଯିବ । ଦ୍ୱିତୀୟ କ୍ୱାଲିଫାୟର ବେଶ ଚିତାକର୍ଷକ ହୋଇଥିଲା । କୋଣାର୍କ ସୂର୍ଯ୍ୟସ ପ୍ରଥମେ ବ୍ୟାଟିଂ କରି ୫ ୱିକେଟ୍ ହରାଇ ୧୫୬ ରନ୍ କରିଥିଲା । ଜବାବରେ ହାଇଦ୍ରାବାଦ ୬ ୱିକେଟ୍ ହରାଇ ୧୫୫ ରନ୍ କରିବାରେ ସଫଳ ହୋଇଥିଲା ।
ଅନ୍ତିମ ଓଭରରେ ହାଇଦ୍ରାବାଦ ବିଜୟ ପାଇଁ ୧୨ ରନ୍ ଆବଶ୍ୟକ କରୁଥିଲା । କୋଣାର୍କ ସୂର୍ଯ୍ୟସ ଅଧିନାୟକ ଇରଫାନ ପଠାନ ବୋଲିଂ କରିବାକୁ ଆସିଥିଲେ । ପ୍ରଥମ ବଲରେ ୧ ଓ ଦ୍ୱିତୀୟ ବଲରେ ୨ ରନ୍ ଦେଇଥିଲେ । ତୃତୀୟ ବଲକୁ ସାମିଉଲ୍ଲା ସିନୱାରୀ ଛକା ମାରିବା ପରେ ମ୍ୟାଚ୍ ଏକ ପ୍ରକାର ହାତଛଡ଼ା କରି ସାରିଥିଲା ଓଡ଼ିଶା ।
ମାତ୍ର ଅଧିନାୟକ ଇରଫାନ ଏହାପରେ ନିଜର ଚମତ୍କାରିତା ଦେଖାଇଥିଲେ । ଚତୁର୍ଥ ବଲରେ ସିନୱାରୀଙ୍କ ଆଉଟ୍ କରିବା ପରେ ଖେଳ ସଂପୂର୍ଣ୍ଣ ପଲଟି ଯାଇଥିଲା । ପଞ୍ଚମ ବଲରେ ଷ୍ଟୁଆର୍ଟ ବିନ୍ନୀ ୧ ରନ୍ ନେଇଥିଲେ । କିନ୍ତୁ ଅନ୍ତିମ ବଲରେ ଅଧିନାୟକ ଗୁରକୀରତ ସିଂ ରନ ସଂଗ୍ରହ କରିବାରେ ବିଫଳ ହୋଇଥିଲେ । ଫଳରେ କୋଣାର୍କ ସୂର୍ଯ୍ୟସ ମାତ୍ର ୧ ରନ୍ରେ ବିଜୟୀ ହୋଇଥିଲା ।
ବ୍ୟାଟିଂ ଆମନ୍ତ୍ରଣ ପାଇ କୋଣାର୍କ ସୂର୍ଯ୍ୟସ ସେମିତି ଭଲ ଆରମ୍ଭ କରିପାରି ନଥିଲା । ଓପନର ରିଚାର୍ଡ ଲେଭି (୬) ଓ ଦିଲସାନ ମୁନାବୀରା (୧୮) ସହଳ ପାଭିଲିୟନ ଫେରିଥିଲେ । କିନ୍ତୁ ମଧ୍ୟଭାଗରେ କେଭିନ ଓ’ବ୍ରାଏନଙ୍କ (୫୦) ଅର୍ଦ୍ଧଶତକ ଏବଂ ଇରଫାନଙ୍କ ଅପରାଜିତ ୪୯ ରନ୍ ସହାୟତାରେ ଦଳ ୧୫୬ ରନ୍ କରିପାରିଥିଲା ।
ହାଇଦ୍ରାବାଦ ଆରମ୍ଭରୁ ଶୀର୍ଷ କ୍ରମର ୩ ବ୍ୟାଟର ଚାଡୱିକ ୱାଲଟନ (୧୦), ଜର୍ଜ ୱାକର (୬) ଓ ପିଟର ଟ୍ରେଗୋଙ୍କୁ (୧୫) ହରାଇଥିଲା। ମାତ୍ର ରିକି କ୍ଲାର୍କ ମଧ୍ୟଭାଗରେ ବିସ୍ଫୋରକ ବ୍ୟାଟିଂ କରି ଦଳକୁ ବିଜୟ ନିକଟତର କରାଇଥିଲେ । ସେ ୪୪ ବଲରୁ ୬୭ ରନ୍ କରିଥିଲେ । ହେଲେ ଅଧିନାୟକ ଗୁରୁକୀରତ (୨୭) ଶେଷ ପର୍ଯ୍ୟନ୍ତ ଅପରାଜିତ ରହିଥିଲେ ବି ଦଳକୁ ଜିତାଇ ପାରିନଥିଲେ । ଶ୍ରେଷ୍ଠ ଅଲରାଉଣ୍ଡ ପ୍ରଦର୍ଶନ ପାଇଁ ଇରଫାନ ପ୍ଲେୟାର ଅଫ୍ ଦ ମ୍ୟାଚ୍ ବିବେଚିତ ହୋଇଥିଲେ ।
