ନୂଆପଡ଼ା,୧୮/୬ : ମା’ଘରୁ ସ୍ବାମୀ ଓ ଦୁଇ ପିଲା ସହ ଶ୍ଵଶୁର ଘରକୁ ଫେରୁଥିଲେ । ଅଧାବାଟରେ ସଡ଼କ ଦୁର୍ଘଟଣାରେ ଚାଲିଗଲା ମହିଳାଙ୍କ ଜୀବନ । ମୃତ ମହିଳା ସାହିପଲାର ଚନ୍ଦ୍ରଲତା ସାହୁ(୨୯)। ଏମିତି ଏକ ଦୁର୍ଘଟଣା ଘଟିଛି ନୂଆପଡ଼ା ଜିଲ୍ଲା ଜୋଙ୍ଗ ଥାନା ମୁଣ୍ଡାଗାଁ ଛକରେ ।
ଗତ କିଛି ଦିନ ତଳେ ନୂଆପଡ଼ା ଥାନା ସାହିପଲା ଗାଁର ରାଜେଶ ସାହୁ ନିଜ ସ୍ତ୍ରୀ ଚନ୍ଦ୍ରଲତା ଓ ଦୁଇ ପୁଅ ସହ ଜୋଙ୍କ ଥାନା ଜେଞ୍ଜରା ଗାଁର ଶ୍ବଶୁର ଘରକୁ ଯାଇଥିଲେ । ଆଜି ମଧ୍ୟାହ୍ନରେ ରାଜେଶ, ସ୍ତ୍ରୀ ଚନ୍ଦ୍ରଲତା ଓ ଦୁଇ ପୁଅ ଏକ ବାଇକରେ ସାହିପଲାକୁ ଫେରୁଥିଲେ । ଜୋଙ୍କ ଥାନା ଖରିଆରରୋଡ଼ ସହରର ମୁଣ୍ଡାଗାଁ ଛକ ନିକଟରେ ଏକ ଅଜଣା ଗାଡ଼ି ବାଇକକୁ ଧକ୍କା ଦେଇଥିଲା । ସେଠି ବାଇକ୍ ଭାରସାମ୍ୟ ହରାଇ ଝୁଲି ଯିବାରୁ ସାନପୁଅକୁ ବଞ୍ଚାଇବା ପାଇଁ ମା’ ଚନ୍ଦ୍ରଲତା ତଳେ ପଡ଼ି ଯାଇଥିଲେ । ଏଥିରେ ଚନ୍ଦ୍ରଲତା ଗୁରୁତର ହୋଇଥିଲେ । କିନ୍ତୁ ସ୍ବାମୀ ରାଜେଶ ଓ ଦୁଇ ପୁଅଙ୍କୁ କୌଣସି ଆଘାତ ଲାଗି ନ ଥିଲା । ସ୍ଥାନୀୟ ଲୋକେ ଚନ୍ଦ୍ରଲତାଙ୍କୁ ଗୁରୁତର ଅବସ୍ଥାରେ ଉଦ୍ଧାର କରି ନୂଆପଡ଼ା ଜିଲ୍ଲା ମୁଖ୍ୟ ଚିକିତ୍ସାଳୟରେ ଭର୍ତ୍ତି କରିଥିଲେ । ସେଠାରେ ଚନ୍ଦ୍ରଲତାଙ୍କୁ ଡାକ୍ତର ମୃତ ଘୋଷଣା କରିଥିଲେ । ଅପରାହ୍ନରେ ପୁଲିସ ମୃତଦେହକୁ ବ୍ୟବଚ୍ଛେଦ କରି ପରିବାର ଲୋକଙ୍କୁ ହସ୍ତାନ୍ତର କରିଛି । ତେବେ ମା’ଘରୁ ଶ୍ବଶୁର ଘରକୁ ଫେରିବା ବାଟରେ ମହିଳାଙ୍କ ଜୀବନ ଚାଲି ଯାଇଛି । ଏବେ ଦୁଇ ପୁଅ ମା ଛେଉଣ୍ଡ ହୋଇଛନ୍ତି । ଏହି ଗରିବ ପରିବାରକୁ ସରକାରୀ ସହାୟତା ଯୋଗାଇ ଦେବାକୁ ଜିଲ୍ଲା ପ୍ରଶାସନ ନିକଟରେ ଦାବି ହେଉଛି ।
