ବାରଙ୍ଗ,୨୬/୦୧: ନନ୍ଦନକାନନ ପ୍ରାଣୀ ଉଦ୍ୟାନରେ ସିଂହୀ ‘ରେୱା’ ଶନିବାର ୩ଟି ଶାବକ ଜନ୍ମ ଦେଇଛି । ୭ବର୍ଷୀୟା ‘ରେୱା’ ଇତିମଧ୍ୟରେ ତୃତୀୟ ଥର ପାଇଁ ମା’ହୋଇଛି । ତେବେ ଚିନ୍ତାର ବିଷୟ ହେଉଛି ୩ ଶ । ବ କ ଙ୍କ ମଧ୍ୟରୁ ଗୋଟିଏ ଶାବକର ମୃତ୍ୟୁ ହୋଇଥିବାବେଳେ ଆଉ ୨ଟି ଶାବକଙ୍କୁ ମା’ସିଂହୀ ଗ୍ରହଣ କରିନାହିଁ । ତେଣୁ ଦୁଇ ଶାବକ (ଅଣ୍ଡିରା, ମାଈ)ଙ୍କୁ ମା’ଠାରୁ ଅଲଗା କରି ଶିଶୁ ଲାଳନ ପାଳନ କେନ୍ଦ୍ରରେ ରଖାଯାଇଛି । ଆଇସିୟୁରେ ସେମାନଙ୍କ ଚିକିତ୍ସା କରାଯାଉଛି ।
ପ୍ରାଣୀ ଉଦ୍ୟାନରେ ଜନ୍ମିତ ସିଂହ ‘ଜିତ୍’ ସହିତ କମଳା ନେହେରୁ ପ୍ରାଣୀ ସଂଗ୍ରହାଳୟରୁ ଆସିଥିବା ସିଂହୀ ‘ରେୱା’ର ପ୍ରାୟ ୧୦୭ ଦିନ ତଳେ ମିଳନ ହୋଇଥିଲା । ଫଳରେ ‘ରେୱା’ ଗର୍ଭବତୀ ହୋଇଥିଲା । ଶନିବାର ସକାଳ ୯.୩୩ରେ ପ୍ରଥମେ ‘ରେୱା’ ଏକ ମୃତ ଶାବକ ଜନ୍ମ ଦେଇଥିଲା । ଆଉ ଶାବକ ଜନ୍ମ ଦେବାରେ ବିଳମ୍ବ ହେବାରୁ ପ୍ରାଣୀ ଚିକିତ୍ସକଙ୍କ ଚିକିତ୍ସା ପରେ ଅପରାହ୍ଣ ୩.୫୮ ଏବଂ ୫.୫୬ରେ ଦୁଇଟି ଶାବକ ଜନ୍ମ ଦେଇଥିଲା । ଆଜିର ଜନ୍ମିତ ଶାବକଙ୍କୁ ମିଶାଇ ପ୍ରାଣୀ ଉଦ୍ୟାନରେ ସିଂହ ସଂଖ୍ୟା ୨୪କୁ ବୃଦ୍ଧି ପାଇଛି ।
