ନୂଆଦିଲ୍ଲୀ,୨୧/୦୭: ମୌସୁମୀ ଅଧିବେଶନ ଆରମ୍ଭରୁ ହୋ-ହାଲ୍ଲା ହୋଇଛି । ବିରୋଧୀଙ୍କ ନାରାବାଜିଲେ କମ୍ପିଛି ଗୃହ । ଅପରେସନ୍ ସିନ୍ଦୂର, ବିହାର ଏସ୍ଆଇଆରକୁ ନେଇ ଲୋକସଭାରେ ବିରୋଧୀ ନାରାବାଜି କରିଥିଲେ । ଫଳରେ ଅପରାହ୍ନ ୨ଟା ଯାଏ ଗୃହକୁ ମୁଲତବୀ ଘୋଷଣା କରିଛନ୍ତି ଲୋକସଭା ବାଚସ୍ପତି ଓମ୍ ବିର୍ଲା ।
ଅଧିବେଶନ ଆରମ୍ଭରୁ ପ୍ରଥମେ ପହଲଗାମ ଓ ଅହମ୍ମଦାବାଦ ପ୍ଲେନ୍ କ୍ରାସ୍ ପୀଡିତଙ୍କୁ ଉଭୟ ଗୃହରେ ଶ୍ରଦ୍ଧାଞ୍ଜଳି ଦିଆଯାଇଥିଲା । ଏହାପରେ ବିରୋଧୀ ହୋ-ହାଲ୍ଲା କରିବା ଆରମ୍ଭ କରିଥିଲେ । ଶାସକ ଦଳ ବିରୋଧରେ ନାରାବାଜି ଦେଇଥିଲେ । ଲୋକସଭା ବାଚସ୍ପତି ଓମ୍ ବିର୍ଲା ଗୃହରେ ଶାନ୍ତି-ଶୃଙ୍ଖଳା ରକ୍ଷା କରିବାକୁ ସାଂସଦମାନଙ୍କୁ କହିଥିଲେ ବି କେହି କର୍ଣ୍ଣପାତ କରିନଥିଲେ । ବାଚସ୍ପତି କହିଥିଲେ, ଦେଶର ଜନତାଙ୍କ ଭାବନାକୁ ଧ୍ୟାନରେ ରଖି ଘଟିଥିବା ଘଟଣାରେ ମହତ୍ତ୍ୱପୂର୍ଣ୍ଣ ବିଷୟରେ ଆଲୋଚନା କରିବାକୁ କହିଥିଲେ । ଯାହା ବି ବିଷୟ ଅଛି ନୋଟିସ୍ ଦିଅନ୍ତୁ । ପ୍ରଶ୍ନୋତ୍ତର ପରେ ଏହା ଉପରେ ଚର୍ଚ୍ଚା ହେବ । ପ୍ରଥମ ଦିନ ଅଧିବେଶନରେ ଭଲ, ବ୍ୟାପକ ଚର୍ଚ୍ଚା ହେଉ ।'' ବାଚସ୍ପତିଙ୍କୁ ଅନୁରୋଧ ପରେ ବି କେହି କର୍ଣ୍ଣପାତ କରିନଥିଲେ । ଶେଷରେ ଅପରାହ୍ନ ୨ଟା ଯାଏ ଗୃହକୁ ମୁଲତବୀ ଘୋଷଣା କରିଥିଲେ ବାଚସ୍ପତି ।
ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ମୌସୁମୀ ଅଧିବେଶନକୁ ବିଜୟ ଉତ୍ସବ କହିବାକୁ ନେଇ କଂଗ୍ରେସ ଏମ୍ପି କେସି ବେଣୁଗୋପାଳ କହିଛନ୍ତି, ଆମ ଦାବି ଗୁରୁତ୍ୱପୂର୍ଣ୍ଣ ବିଷୟରେ ଆଲୋଚନା ହେଉ । ଆମ ଦେଶ ପାଇଁ ଆମେ ଗର୍ବିତ । ପ୍ରଧାନମନ୍ତ୍ରୀ ନିଜେ ଆଜି ବିବୃତ୍ତି ରଖନ୍ତୁ ।
Lok Sabha adjourned till 12 noon amid sloganeering by Opposition MPs https://t.co/otvUTtf1F4
— ANI (@ANI) July 21, 2025
ବିରୋଧୀଙ୍କ ହୋ-ହାଲ୍ଲାକୁ ନେଇ ବିଜେପି ସାଂସଦ ପ୍ରବୀଣ କଣ୍ଡେୱାଲା କହିଛନ୍ତି, ବିରୋଧୀ ଜାଣିଶୁଣି ସଂସଦର ସାମ୍ନା କରିପାରୁ ନାହିଁ । ସରକାର ସ୍ପଷ୍ଟ କରିଛନ୍ତି ସବୁ ବିଷୟରେ ଚର୍ଚ୍ଚା ହେବ । ଯଦି ବିରୋଧୀ ଗୃହ ଚଲାଇବାକୁ ଦେବେ ତେବେ ସରକାର ସବୁ ପ୍ରଶ୍ନର ଉତ୍ତର ଦେବାକୁ ପ୍ରସ୍ତୁତ ।''
ସେହିପରି ବିଜେପି ସାଂସଦ ଦିନେଶ ଶର୍ମା କହିଛନ୍ତି, ବିରୋଧୀଙ୍କ ପାଖରେ କିଛି ମୁଦ୍ଦା ନାହିଁ । ସେମାନେ ହତାଶ୍ । ଦେଶର ବିକାଶ ହୋଇଛି, ଲକ୍ଷ୍ନୌ ପୁଅ ମହାକାଶ ଯାଇଛନ୍ତି, ରାସ୍ତା, ହାଇୱେ ନିର୍ମାଣ ହୋଇଛି । ଏହି ଅଧିବେଶନକୁ ନିନ୍ଦନ ନୁହେଁ ଅଭିନନ୍ଦନର ଅଧିବେଶନ କରନ୍ତୁ । କଂଗ୍ରେସ ଓ ବିରୋଧୀ ଦଳ କେବେ କେବେ ଭାରତ ପକ୍ଷରେ ବୟାନ ଦିଅନ୍ତୁ । ଏହା ବାପୁଙ୍କ ଗାନ୍ଧୀ ଦଳ ନୁହେଁ ଶଶୀ ଥରୁରଙ୍କ ବୟାନ ପରେ ତାଙ୍କ ସହ ସମ୍ପର୍କ ଭାଙ୍ଗିବା ଦଳ । ''
