ନୀଳଗିରି,୧୯/୦୬: ବାଲେଶ୍ବର ଜିଲ୍ଲା ନୀଳଗିରି ଥାନା ଅଧିନ ଗୋଡ଼ିଶୁଳ ଛକ ତାରିଣୀ ମନ୍ଦିରରୁ ଲୁଟ୍। ଭାଲୁକାଶୁଣି ଜଙ୍ଗଲରୁ ଠାବ ହେଲା ଦାନବାକ୍ସ। ଗତକାଲି ବିଳମ୍ବିତ ରାତିରେ ମା' ତାରିଣୀଙ୍କ ଠାରେ ଲାଗି ହୋଇଥିବା ଅଳଙ୍କାର,ଦାନ ହୁଣ୍ଡି ଆଦି ଚୋରି ହୋଇଥିବା ଜଣାପଡିଛି।
ତେବେ ଆଜି ସକାଳେ ସ୍ଥାନୀୟ ଲୋକେ ତାରିଣୀ ମନ୍ଦିରରୁ ଲୁଟ୍ ହୋଇଥିବା ଖବର ଜାଣିବାକୁ ପାଇଥିଲେ। ଏହାପରେ ସେମାନେ ପୁଲିସକୁ ଖବର ଦେଇଥିଲେ। ଏନେଇ ଖବର ପାଇ ପୁଲିସ ଘଟଣାସ୍ଥଳରେ ପହଞ୍ଚି ତଦନ୍ତ କରୁଛି । ସବୁଠାରୁ ବଡ଼ କଥା ନୀଳଗିରି ଅଞ୍ଚଳରେ କିଛି ଦିନ ବ୍ୟବଧାନରେ ଦିନକୁ ଦିନ ବିଭିନ୍ନ ମନ୍ଦିରଗୁଡ଼ିକୁ ଟାର୍ଗେଟ କରି ଲୁଟ୍ କରୁଛନ୍ତି ଲୁଟେରା । ଯାହା ଭକ୍ତ ଏବଂ ଶ୍ରଦ୍ଧାଳୁଙ୍କ ଭାବାବେଗକୁ ଆଘାତ ଦେଉଛି। ସୂଚନା ଥାଉକି, କିଛି ମାସ ପୂର୍ବରୁ ନୀଳଗିରି ଥାନା ଅଧିନ ପୋଡ଼ାଶୁଳ ଛକଠାରେ ମା' ଶ୍ୟାମାକାଳୀ ମନ୍ଦିର,ଚତର ଗ୍ରାମର ଥିବା ଶନି ମନ୍ଦିରରୁ ଠିକ୍ ସମାନ ଢଙ୍ଗରେ ଅଳଙ୍କାର ସମେତ ଦାନ ହୁଣ୍ଡି ଲୁଟି ନେଇଥିଲେ ଦୁବୃର୍ତ୍ତ। ସେହିପରି ଟାଙ୍ଗଣା ଗ୍ରାମର ବିଶ୍ୱନାଥ ବୁଗୁଡାଈଙ୍କ ଘରେ ଗତକାଲି ମଧ୍ୟରାତ୍ରରେ ଦୁର୍ବୁତ୍ତମାନେ ଲକ୍ଷାଧିକ ଟଙ୍କା ଓ ସୁନାଗହଣା ଲୁଟ କରିନେଇଥିବା ଜଣାପଡିଛି।
