ନୂଆଦିଲ୍ଲୀ: ଜାମ୍ମୁ କାଶ୍ମୀରର ଶୋପିଆନ୍ ଜିଲ୍ଲାର ହିରପୋରା ଗାଁର ଘନ ଜଙ୍ଗଲରେ ଏକ ବଡ଼ ସନ୍ଧାନ ମିଳିଛି । ଏଠାରେ ଭଗବାନ ଶିବଙ୍କର ଏକ ପ୍ରାଚୀନ ସ୍ଥାନ ମିଳିଛି, ଯାହା ସ୍ଥାନୀୟ ବାସିନ୍ଦା ତଥା ପ୍ରତ୍ନତତ୍ତ୍ୱ ବିଶେଷଜ୍ଞଙ୍କ ପାଇଁ ଆଗ୍ରହର ବିଷୟ ପାଲଟିଛି। ଏହି ସନ୍ଧାନ ଏହି ଅଞ୍ଚଳର ଐତିହାସିକ ଏବଂ ଧାର୍ମିକ ଗୁରୁତ୍ୱକୁ ଆଲୋକିତ କରିଛି ।
ହିରପୋରା ଗ୍ରାମ ନିକଟ ମୋଗଲ ରୋଡଠାରୁ ପ୍ରାୟ ତିନି କିଲୋମିଟର ଦୂରରେ ଥିବା ଜଙ୍ଗଲରେ ଏକ ମନ୍ଦିର ଆକୃତିର ପଥର ଉପରେ ତିନୋଟି ଶିବଲିଙ୍ଗ ଦେଖିବାକୁ ମିଳିଛି। ଏହି ସ୍ଥାନଟି ଅତ୍ୟନ୍ତ ଦୁର୍ଗମ ନୁହେଁ ଏବଂ ଏଠାକୁ କେବଳ ପାଦରେ ଚାଲି ପହଞ୍ଚି ହେବ। ଏହି ଆଶ୍ଚର୍ଯ୍ୟଜନକ ସ୍ଥାନ ଦେଖିବା ପରେ ସ୍ଥାନୀୟ ଲୋକମାନେ ତୁରନ୍ତ କର୍ତ୍ତୃପକ୍ଷ ଏବଂ ପ୍ରତ୍ନତତ୍ତ୍ୱ ବିଭାଗକୁ ସୂଚନା ଦେଇଛନ୍ତି ।
ଏନେଇ ଜଣେ ସ୍ଥାନୀୟ ବାସିନ୍ଦା କହିଛନ୍ତି ଯେ, ଯେତେବେଳେ ସେ ଏହି ପଥର ପ୍ରଥମ ଥର ଦେଖିଲେ, ସେତେବେଳେ ସେ ଭାବିଲେ ଏହା କୌଣସି ମନ୍ଦିରର ପ୍ରତୀକ ଅଟେ। ଏହା ଦେଖିବା ପରେ ସେ କିଛି ବିଶେଷଜ୍ଞଙ୍କ ସହ କଥା ହୋଇଥିଲେ, ଯେଉଁମାନେ କହିଥିଲେ ଯେ ଏହି ସ୍ଥାନ ଲଲିତାଦିତ୍ୟ କିମ୍ବା ରାଜା ଅବନ୍ତୀଭର୍ମାଙ୍କ ଯୁଗ ସହିତ ଜଡିତ ହୋଇପାରେ । ବିଶେଷଜ୍ଞ ଆହୁରି ମଧ୍ୟ କହିଛନ୍ତି ଯେ ଏହି ସ୍ଥାନ ପ୍ରାୟ ୬ଶହ ବର୍ଷ ପୁରୁଣା ହୋଇପାରେ ଏବଂ ଏହା ପୂର୍ବରୁ ଏଠାରେ ପୂଜାପାଠ ହୋଇଥାଇପାରେ ।
ତେବେ ଏହି ସନ୍ଧାନ ଜାମ୍ମୁ କାଶ୍ମୀରର ଏକ ଲୁକ୍କାୟିତ ପ୍ରତ୍ନତାତ୍ତ୍ୱିକ ଭଣ୍ଡାର ମଧ୍ୟରୁ ଅନ୍ୟତମ । ଏହି ଅଞ୍ଚଳର ପ୍ରତ୍ନତତ୍ତ୍ୱ ବିଭାଗ ଏବଂ ଅନ୍ୟ ସମ୍ପୃକ୍ତ ଅଧିକାରୀ ମାନେ ଶୀଘ୍ର ଏହି ସ୍ଥାନରେ ପୁଙ୍ଖାନୁପୁଙ୍ଖ ଅଧ୍ୟୟନ ଏବଂ ଅନୁସନ୍ଧାନ କରିବେ। ଏହି ସ୍ଥାନର ଐତିହାସିକ ଉତ୍ପତ୍ତି ଏବଂ ଏହାର ଗୁରୁତ୍ୱକୁ ଭଲ ଭାବରେ ବୁଝିବାକୁ ଚେଷ୍ଟା କରାଯିବ ବୋଲି ବିଶେଷଜ୍ଞ ମାନେ କହିଛନ୍ତି। ଏହି ଆବିଷ୍କାର କାଶ୍ମୀରର ପ୍ରାଚୀନ ଇତିହାସ ଏବଂ ଧାର୍ମିକ ଐତିହ୍ୟ ପ୍ରତି ଆଗ୍ରହ ସୃଷ୍ଟି କରିଛି ।
