ଚନ୍ଦ୍ରଶେଖରପୁର ୧୯/୧୧: ହୋଟେଲରେ ଏକାଠି କାମ କରୁଥିଲେ । ଉଭୟଙ୍କ ମଧ୍ୟରେ ପ୍ରେମ ସଂପର୍କ ଯୋଡ଼ିହେଲା । ବିବାହର ପ୍ରତିଶ୍ରୁତି ଦେଇ ଶାରିରୀକ ସଂପର୍କ ରଖିବା ପରେ ପ୍ରତାରଣା ଦେଇଥିଲେ । ଏଭଳି ଜଣେ ପ୍ରତାରକ ପ୍ରେମିକକୁ ଗିରଫ କରିଛି ମୈତ୍ରୀବିହାର ଥାନା ପୁଲିସ । ସେ ହେଲେ ସୋମନାଥ ମଲ୍ଲିକ(୨୯) । ଘର ଜଗତସିଂହପୁର ଜିଲ୍ଲା ତାରିକୁଣ୍ଡ ଥାନା ଗରୁଆଳ ଗାଁରେ ।
ସୋମନାଥ ଓ ପୀଡିତା ଯୁବତୀ ଗତ ୨୦୨୩ରେ ମୈତ୍ରୀବିହାର ଥାନା ଅନ୍ତର୍ଗତ ଏକ ହୋଟେଲରେ ଏକତ୍ର କାର୍ଯ୍ୟ କରୁଥିଲେ । ସୋମନାଥ ଯୁବତୀଙ୍କୁ ବିବାହ କରିବାର ପ୍ରତିଶ୍ରୁତି ଦେଇଥିଲେ । ଗତ ବର୍ଷ ଜୁଲାଇରେ ସୋମନାଥ ପାତ୍ରପଡ଼ା ସ୍ଥିତ ଏକ ହୋଟେଲକୁ ନେଇ ଯୁବତୀଙ୍କ ଅନିଚ୍ଛା ସତ୍ତେ୍ୱ ତାଙ୍କ ସହିତ ଶାରୀରିକ ସମ୍ପର୍କ ରଖିଥିଲେ । ଏହି ସମୟରେ ସେ କିଛି ଆପତ୍ତି ଜନକ ଫଟୋ ତାଙ୍କର ମୋବାଇଲରେ କଏଦ କରି ନେଇଥିଲେ । ପରେ ସେଗୁଡିକୁ ଭାଇରାଲ କରିବାର ଧମକ ଦେଇ ଯୁବତୀଙ୍କ ସହ ବାରମ୍ବାର ସମ୍ପର୍କ ରଖିଥିଲେ । କେବଳ ସେତିକି ନୁହେଁ ତାଙ୍କ ଠାରୁ ୭୦ ହଜାର ଟଙ୍କା ମଧ୍ୟ ନେଇଥିଲେ । ପରବର୍ତ୍ତୀ ସମୟରେ ସୋମନାଥ ପୀଡିତାଙ୍କୁ ବିବାହ କରିବାକୁ ମନା କରିଦେଇଥିଲେ । ଶେଷରେ କିଛି ଉପାୟ ନପାଇ ମୈତ୍ରୀ ବିହାର ଥାନାରେ ଅଭିଯୋଗ କରିଥିଲେ ଯୁବତୀ ।
