ଭୁବନେଶ୍ୱର,୧୩/୦୮ : କେନ୍ଦ୍ରୀୟ ବଙ୍ଗୋପସାଗରରେ ମଙ୍ଗଳବାର ଘୂର୍ଣ୍ଣିବଳୟ ସୃଷ୍ଟି ହୋଇଛି । ଏହାର ପ୍ରଭାବରେ ବୁଧବାର ପଶ୍ଚିମ କେନ୍ଦ୍ରୀୟ ଓ ସଂଲଗ୍ନ ଉତ୍ତର ପଶ୍ଚିମ ବଙ୍ଗୋପସାଗରରେ ଲଘୁଚାପ ସୃଷ୍ଟି ହୋଇପାରେ । ଲଘୁଚାପ ପ୍ରଭାବରେ ପଶ୍ଚିମ ଓଡ଼ିଶା ଓ ଦକ୍ଷିଣ ଓଡ଼ିଶାରେ ପ୍ରବଳରୁ ଅତିପ୍ରବଳ ବର୍ଷା ହେବ ବୋଲି ପାଣିପାଗ ବିଭାଗ ପୂର୍ବାନୁମାନ କରିଛି ।
ସମ୍ଭାବ୍ୟ ଲଘୁଚାପର ପ୍ରଭାବ ସତ୍ତ୍ଵେ ମଙ୍ଗଳବାର ରାଜ୍ୟର ବିଭିନ୍ନ ସ୍ଥାନରେ ପ୍ରବଳ ଗରମ ଓ ଗୁଳୁଗୁଳି ଅନୁଭୂତ ହୋଇଛି । ବୌଦ୍ଧରେ ସର୍ବାଧିକ ୩୭ ଡିଗ୍ରୀ ତାତି ଅନୁଭୂତ ହୋଇଛି । ବୁଧବାର କୋରାପୁଟ ଓ ମାଲକାନଗିରିରେ ପ୍ରବଳରୁ ଅତିପ୍ରବଳ ବର୍ଷା ହୋଇପାରେ । ନବରଙ୍ଗପୁର, ରାୟଗଡ଼ା, କଳାହାଣ୍ଡି, ଗଜପତି, ବଲାଙ୍ଗିର ଓ ନୂଆପଡ଼ାରେ ପ୍ରବଳ ବର୍ଷା ସମ୍ଭାବନା ଅଛି । ଉପକୂଳ ଓଡ଼ିଶା ଓ ପଶ୍ଚିମ ଓଡ଼ିଶାର ବିଭିନ୍ନ ସ୍ଥାନରେ ଘଡ଼ଘଡ଼ି ସହ ବର୍ଷା ହୋଇପାରେ । ଗୁରୁବାର ମାଲକାନଗିରି ଓ କୋରାପୁଟରେ ପ୍ରବଳରୁ ଅତିପ୍ରବଳ ବର୍ଷା ଆଶଙ୍କା ଥିବାରୁ ଅରେଞ୍ଜ ୱାର୍ଣ୍ଣିଂ ଜାରି ହୋଇଛି । ଗଜପତି, ରାୟଗଡ଼ା, କଳାହାଣ୍ଡି ଓ ନବରଙ୍ଗପୁରରେ ପ୍ରବଳ ବର୍ଷା ହୋଇପାରେ । ୧୫ ତାରିଖରେ ଦକ୍ଷିଣ ଓଡ଼ିଶାର ବହୁ ଜିଲ୍ଲାରେ ପ୍ରବଳ ବର୍ଷା ଆଶଙ୍କା ଅଛି ।
ମଙ୍ଗଳବାର ଉପକୂଳ ଓଡ଼ିଶା ଓ ପଶ୍ଚିମ ଓଡ଼ିଶାର ଅନେକ ସ୍ଥାନର ତାପମାତ୍ରା ୩୬ ଡିଗ୍ରୀ ପାଖାପାଖି ରହିଥିଲା । ଅଧିକ ଆର୍ଦ୍ରତା ଯୋଗୁଁ ଭୀଷଣ ଗୁଳୁଗୁଳି ହେଉଥିଲା । ଝାରସୁଗୁଡ଼ାରେ ୩୬.୫, ସମ୍ବଲପୁରରେ ୩୬.୨, ତାଳଚେରରେ ୩୫.୬, ସୋନପୁର ଓ ରାଉରକେଲାରେ ୩୫, ଟିଟିଲାଗଡ଼ରେ ତାତି ୩୪.୫ ଡିଗ୍ରୀ ରହିଥିଲା । ସକାଳୁ ନେଇ ସନ୍ଧ୍ୟା ଭିତରେ ଅନୁଗୁଳରେ ୧୨ମିମି ଓ ପାରଳାଖେମୁଣ୍ଡିରେ ୮.୨ ମିମି ବର୍ଷା ରେକର୍ଡ ହୋଇଛି ।
