ଲକ୍ଷ୍ନୌ,୦୧/୦୪: ପଞ୍ଜାବ କିଙ୍ଗ୍ସ ଲକ୍ଷ୍ନୌ ସୁପର ଜିଆଣ୍ଟସକୁ ୮ ୱିକେଟରେ ପରାସ୍ତ କରିଛି। ଲକ୍ଷ୍ନୌ ନିଜ ଘରୋଇ ପଡ଼ିଆରେ ପରାଜୟର ସମ୍ମୁଖୀନ ହୋଇଛି। ଚଳିତ ସିଜନରେ ଏହା ପଞ୍ଜାବର କ୍ରମାଗତ ଦ୍ୱିତୀୟ ବିଜୟ ହୋଇଥିବାବେଳେ ଲକ୍ଷ୍ନୌ ଟୁର୍ନାମେଣ୍ଟର ଦ୍ୱିତୀୟ ପରାଜୟର ସମ୍ମୁଖୀନ ହୋଇଛି। ଇକନା ଷ୍ଟାଡିୟମରେ ଖେଳାଯାଇଥିବା ଏହି ମ୍ୟାଚରେ ଏଲ୍ଏସ୍ଜି ପ୍ରଥମେ ଖେଳି ୧୭୧ ରନ୍ ସ୍କୋର କରିଥିଲା। ଏହାର ଜବାବରେ ପଞ୍ଜାବ ୧୭ ଓଭରରେ ୮ ୱିକେଟ୍ ଥାଇ ମ୍ୟାଚ ଜିତିଥିଲା।
ଏକନା ଷ୍ଟାଡିୟମରେ ଖେଳାଯାଇଥିବା ଏହି ମ୍ୟାଚରେ ପଞ୍ଜାବ କିଙ୍ଗ୍ସ ପାଇଁ ୧୭୨ ରନ୍ର ବିଜୟଲକ୍ଷ୍ୟ ଥିଲା। ପଞ୍ଜାବ ଦଳର ନୂତନ ତାରକା ପ୍ରିୟାଂଶ ଆର୍ଯ୍ୟ ଏଥର ଭଲ ପ୍ରଦର୍ଶନ କରିପାରିନଥିଲେ କିନ୍ତୁ ତାଙ୍କ ସାଥୀ ପ୍ରଭାସୀମ୍ରନଙ୍କ ଧୁଆଁଧାର ବ୍ୟାଟିଂରେ ଫିକା ପଡ଼ିଥିଲା ଲକ୍ଷ୍ନୌ ବୋଲରଙ୍କ ପ୍ରଦର୍ଶନ। ପ୍ରଭସୀମ୍ରନ୍ ସିଂ ମାତ୍ର ୨୩ ଟି ବଲରେ ନିଜର ଅର୍ଦ୍ଧଶତକୀୟ ପାଳି ପୂରଣ କରିଥିଲେ ଏବଂ ମ୍ୟାଚରେ ସେ ୩୪ ବଲରେ ୬୯ ରନର ଧ୍ବସ୍ତବିଧ୍ବସ୍ତ ଇନିଂସ ଖେଳିଥିଲେ।
ପ୍ରଭସୀମ୍ରାନ ସିଂଙ୍କ ଆଉଟ ହେବା ପରେ ଅଧିନାୟକ ଶ୍ରେୟାସ ଆୟର ପଞ୍ଜାବ କିଙ୍ଗ୍ସର ଇନିଂସକୁ ଆଗକୁ ନେଇଥିଲେ। ଗୁଜୁରାଟ ଟାଇଟାନ୍ସ ବିପକ୍ଷ ମ୍ୟାଚରେ କ୍ୟାପଟେନ ଶ୍ରେୟସ୍ ୯୭ ରନର ଅପରାଜିତ ଇନିଂସ ଖେଳିଥିଲେ। ଏଥର ଲକ୍ଷ୍ନୌ ବିପକ୍ଷରେ ସେ ୩୦ ଟି ବଲରେ ଅପରାଜିତ ୫୨ ରନ୍ ସଂଗ୍ରହ କରିଥିଲେ। ଆୟର କେବଳ ୨ ଟି ମ୍ୟାଚରେ ୧୪୯ ରନ୍ ସଂଗ୍ରହ କରିଛନ୍ତି ଏବଂ ଉଭୟ ମ୍ୟାଚ୍ ରେ ଅର୍ଦ୍ଧଶତକ ହାସଲ କରିଛନ୍ତି। କହିରଖୁଛୁ ଯେ, ଏହି ବିଜୟ ସହିତ ପଞ୍ଜାବ କିଙ୍ଗସ ବର୍ତ୍ତମାନ ୪ ପଏଣ୍ଟ ସହ ପଏଣ୍ଟ ଟେବୁଲରେ ଦ୍ୱିତୀୟ ସ୍ଥାନକୁ ଆସିଛି।
