ରାୟଗଡ଼(ଗଜପତି) ୧୪/୦୫ : ଗଜପତି ଜିଲ୍ଲା ରାୟଗଡ଼ ବ୍ଲକ ସଦର ସ୍ଥିତ ବଢେଇ ସାହିର ଆରାଧ୍ୟ ଦେବୀ ମା' ସିଦ୍ଧ କମଳାଙ୍କ ଯାତ୍ରା ବୁଧବାର ଉଦଯାପିତ ହୋଇଯାଇଛି। ଦୀର୍ଘ ସତର ବର୍ଷ ପରେ ମା' ସାଆନ୍ତାଣୀ ବାପା ଘରକୁ ଆସିଥିଲେ। ପାଞ୍ଚ ଦିନର ରହଣି ପରେ ମଙ୍ଗଳବାର ଶେଷ ଦିନ ହୋଇଥିବାରୁ ମା ରାତି ସାରା ନଗର ପରିକ୍ରମାରେ ବାହାରି ଗ୍ରାମ ବୁଲୁଥିଲେ। ବୁଧବାର ସକାଳୁ ପାରମ୍ପରିକ ରୀତିନୀତି ଅନୁସାରେ ଶାଶୁ ଘରକୁ ଏକ ବିରାଟ ପଟୁଆର ଫେରିଛନ୍ତି।
ମା'ଙ୍କ ଶେଷ ଦର୍ଶନ ପାଇଁ ଅସ୍ଥାୟୀ ମଣ୍ଡପରେ ପ୍ରବଳ ଭିଡ ଜମିଥିଲା। ରୀତିନୀତି ଅନୁସାରେ ଦିନରେ ପୂଜା ସରିବା ପରେ ସନ୍ଧ୍ୟା ୭ ଟା ସମୟରେ ଆଳତି କରାଯାଇଥିଲା। ରାତି ୧୧ଟାରେ ମା'ଙ୍କ ଘଟ ବାହାରି ପରିକ୍ରମା କରି ଭୋର୍ରେ ଅସ୍ଥାୟୀ ମଣ୍ଡପରେ ପହଞ୍ଚିଥିଲେ। ମା'ଙ୍କ ସ୍ଥାନୀୟ ମଣ୍ଡପ ଓ ବଲ୍ଲଭ ପାଇକଙ୍କ ଘରୁ ଭୈରବୀ ବେଶରେ ବାହାରି ଖଣ୍ଡା ଚାଳନା ଯାତ୍ରାର ମୁଖ୍ୟ ଆକର୍ଷଣ ଥିଲା। ଡିଜେ ସହ ଚାଙ୍ଗୁ ବାଜା ବାଜଣା ଓ ବାଣରେ ରାୟଗଡ଼ ଦୁଲୁକୁଥିବା ବେଳେ ଧୂପ ଓ ଦୀପ ମହକରେ ମହକିଥିଲା। ସମସ୍ତେ ଅଦିନିଆ ହୋଲି ପର୍ବର ମଜା ଉଠାଇଥିଲେ। ପ୍ରତି ସାହି ଗଳିକନ୍ଦିରେ ମା'ଙ୍କ ଘଟ ପୂଜା ପାଇଥିଲା। ବିଭିନ୍ନ ରଙ୍ଗବେରଙ୍ଗର ଆଲୋକମାଳାରେ ସାହି ସଜ୍ଜିତ ହୋଇଥିଲା। ବୁଧବାର ସକାଳ ୭ଟାରେ ବିରାଟ ପଟୁଆରରେ ବାହାରି ନଗର ପରିକ୍ରମା ଶେଷକରି ଠାକୁରାଣୀ ଅସ୍ଥାୟୀ ମଣ୍ଡପରୁ ସ୍ଥାୟୀ ମଣ୍ଡପରେ ପହଞ୍ଚିଥିଲେ।
ଠାକୁରାଣୀଙ୍କ ଯାତ୍ରା ସୁରୁଖୁରୁରେ ସମ୍ପର୍ଣ୍ଣ ହୋଇଛି। ମା'ଙ୍କ ଆଗମନ ନେଇ ପୁଣି ଅପେକ୍ଷା କରିବାକୁ ପଡ଼ିବ। ଉକ୍ତ କାର୍ଯ୍ୟକ୍ରମକୁ ପରିଚାଳନା କମିଟିର ସମସ୍ତ ସଦସ୍ୟ, ସଦସ୍ୟା ପରିଚାଳନା କରିଥିବା ବେଳେ ଯୁବଗୋଷ୍ଟୀ ସମ୍ପୂର୍ଣ୍ଣ ଭାବେ ପରିଚାଳନାରେ ସହଯୋଗ କରିଥିଲେ।
