ନୂଆଦିଲ୍ଲୀ: ବେଲାରୁଷର ଷ୍ଟାର ଟେନିସ୍ ଖେଳାଳି ସବାଲେଙ୍କାଙ୍କୁ ଜୋରଦାର ଝଟ୍କା ଲାଗିଛି । ଅଷ୍ଟ୍ରେଲିଆ ଓପନରେ ହ୍ୟାଟ୍ରିକ୍ କରିବାକୁ ସେ ଦେଖିଥିବା ସ୍ବପ୍ନ ଧୂଳିସାତ୍ ହୋଇଛି । ସେପଟେ ମାଡିସନ୍ କିଜଙ୍କ ଦୀର୍ଘ ୭ ବର୍ଷର ସ୍ବପ୍ନ ସାକାର ହୋଇଛି । ସବାଲେଙ୍କାଙ୍କୁ ଚକ୍ମା ଦେଇ ପ୍ରଥମ ଗ୍ରାଣ୍ଡସ୍ଲାମ ଜିତିଛନ୍ତି ଆମେରିକାର ୨୯ ବର୍ଷୀୟ ମାଡିସନ୍ କିଜ୍ । ଅଷ୍ଟ୍ରେଲିଆନ୍ ଓପନ୍ ମହିଳା ସିଙ୍ଗଲ୍ସ ଫାଇନାଲରେ ପରାସ୍ତ ହୋଇଛନ୍ତି ସବାଲେଙ୍କା ।
ଟାଇଟଲ୍ ମୁକାବିଲାରେ ବିଶ୍ୱର ଏକ ନମ୍ୱର ଖେଳାଳି ଆରିନା ସବାଲେଙ୍କାଙ୍କୁ ହରାଇ ବର୍ଷର ପ୍ରଥମ ଗ୍ରାଣ୍ଡସ୍ଲାମ୍ ଜିତିଛନ୍ତି ମାଡିସନ କିଜ୍ । ଟୁର୍ଣ୍ଣାମେଣ୍ଟରେ ୧୯ତମ ମନ୍ୟତାପ୍ରାପ୍ତ ଖେଳାଳି ମାଡିସନ କିଜ୍ ୬-୩, ୨-୬, ୭-୫ ସେଟରେ ସବାଲେଙ୍କାଙ୍କୁ ପରାସ୍ତ କରିଛନ୍ତି । ୨ ଘଣ୍ଟା ୨୦ ମିନିଟ୍ ଧରି ଖେଳାଯାଇଥିବା ଏହି ମ୍ୟାଚ୍ରେ ୨୯ବର୍ଷୀୟ ମାଡିସନ୍ ବିଜୟୀ ହେବା ସହ ସବାଲେଙ୍କାଙ୍କ ଲଗାତାର ତୃତୀୟ ଟାଇଟଲ୍ ଜିତିବା ସ୍ୱପ୍ନକୁ ଧୂଳିସାତ କରିଛନ୍ତି ।ଫାଇନାଲ ମୁକାବିଲାରେ ପ୍ରଥମ ସେଟକୁ ମାଡିସନ ଅତି ଚମତ୍କାର ଭାବେ ୬-୩ରେ ଜିତି ନେଇଥିଲେ । ଏହାପରେ ଦ୍ୱିତୀୟ ସେଟକୁ ଆରିନା ସବାଲେଙ୍କା ୬-୨ରେ ନିଜ ନାଁରେ କରିଥିଲେ ।
ଶେଷ ଏବଂ ନିର୍ଣ୍ଣାୟକ ସେଟରେ ଦୁହିଁଙ୍କ ମଧ୍ୟରେ ଜୋରଦାର ଲଢେଇ ଦେଖିବାକୁ ମିଳିଥିଲା । ଦୁହେଁ ୫-୫ ପଏଣ୍ଟରେ ପହଞ୍ଚିବା ପରେ ମାଡିସନ୍ ଲଗାତାର ଦୁଇ ପଏଣ୍ଟ ହାସଲ କରିବା ସହ ଶେଷ ସେଟକୁ ୭-୫ରେ ଜିତି ନେଇଥିଲେ । ବେଲରୁଷ ଖେଳାଳି ସବାଲେଙ୍କା ଯଦି ଆଜି ଏହି ଟାଇଟଲ୍ ଜିତିବାରେ ସଫଳ ହୋଇଥାନ୍ତେ, ତେବେ ଅଷ୍ଟ୍ରେଲିଆନ୍ ଓପନ ହ୍ୟାଟ୍ରିକ୍ ଜିତିବାରେ ଷଷ୍ଠ ମହିଳା ହୋଇଥାନ୍ତେ । ଏହାସହ ୧୯୯୭-୧୯୯୯ ପରେ ମେଲବର୍ଣ୍ଣ ପାର୍କରେ ତିନି ଥର ଟାଇଟଲ୍ ଜିତିବାରେ ମାର୍ଟିନା ହିଙ୍ଗିସଙ୍କ ପରେ ପ୍ରଥମ ମହିଳା ଖେଳାଳି ହୋଇଥାନ୍ତେ । ଅନ୍ୟପଟେ ୨୦୧୭ ମସିହାରେ ୟୁଏସ୍ ଓପନ୍ ଫାଇନାଲରେ ପରାସ୍ତ ହେବାର ୭ ବର୍ଷ ପରେ ଆମେରିକୀୟ ଟେନିସ ଖେଳାଳି ମାଡିସନ କିଜ୍ ପ୍ରଥମ ଗ୍ରାଣ୍ଡସ୍ଲାମ ଜିତିଛନ୍ତି ।
