ନୂଆଦିଲ୍ଲୀ – ଦିଲ୍ଲୀ ଏନସିଆର ସମେତ ଭାରତର ଅନେକ ଭାଗରେ ଭୂକମ୍ପର ତୀବ୍ର ଝଟକା ଅନୁଭୂତ ହୋଇଛି। ନ୍ୟାସନାଲ ଜିୟୋଲଜିକାଲ ସର୍ଭେ ଅଫ୍ ଇଣ୍ଡିଆ ମୁତାବିକ , ଏହାର କେନ୍ଦ୍ର ଆଫଗାନିସ୍ତାନର ହିନ୍ଦୁକୁଶରେ ଭୂପୃଷ୍ଠ ଠାରୁ ୨୧୫ କିଲୋମିଟରର ଗଭୀରତାରେ ଥିବା କୁହାଯାଉଛି। ରିକ୍ଟର ସେକ୍ସରେ ଏହାର ତୀବ୍ରତା ୬.୨ ମପା ଯାଇଛି। ଭୂକମ୍ପର ଝଟକା ଏତେ ଜୋରରେ ଥିଲା ଯେ, ଘର ଓ ଅଫସିରେ ବସିଥିବା ଲୋକେ ଭୟରେ ବାହାରକୁ ଦୌଡ଼ିଥିଲେ। ହେଲେ ଏଥିରେ ଧନଜୀବନ ନଷ୍ଟ ହେବାର ଖବର ଆସି ନାହିଁ।

ଶନିବାର ସନ୍ଧ୍ୟା ୭ଟା ୪ ମିନିଟ ପରେ ଆସି ଥିବା ଏହି ଭୂକମ୍ପର କେନ୍ଦ୍ର ଭୂପୃଷ୍ଠର ଖୁବ୍ ଗଭୀରରେ ଥିଲା। ଏଥିଯୋଗୁଁ ଏହାର ଝଟକା ଅନେକ ଦେଶର ଅନୁଭୂତ ହୋଇଛି। ଆଫଗାନିସ୍ତାନ ବ୍ୟତୀତ ପାକିସ୍ତାନ ଭାରତ , ଚୀନ , ତାଜାକିସ୍ତାନ , ଉଜବେକିସ୍ତାନ , କିର୍ଗିସ୍ତାନ ଓ ତୁର୍କମେନିସ୍ତାନରେ ଏହାର ପ୍ରଭାବ ଦେଖିବାକୁ ମିଳିଛି। ଏପଟେ ଭାରତରେ ଦିଲ୍ଲୀ ବ୍ୟତୀତ ଜମ୍ମୁ-କାଶ୍ମୀର ସମେତ ଉତ୍ତର ଭାରତର କିଛି ରାଜ୍ୟରେ ମଧ୍ୟ ଭୂକମ୍ପର ଜୋରଦାର ଝଟକା ଅନୁଭୂତ ହୋଇଛି।

ବିଶେଷଜ୍ଞଙ୍କ ମୁତାବିକ , ଭୂକମ୍ପର କେନ୍ଦ୍ର ଯେତେ ଗଭୀର ହୋଇଥାଏ, ସେତେ ବ୍ୟାପକ ଭାବେ ଏହାର ପ୍ରଭାବ ଦେଖାଯାଏ। ହେଲେ ଏଥିରେ କ୍ଷୟକ୍ଷତି ହେବାର ସମ୍ଭାବନା କମ୍ ଥାଏ। ସୋସିଆଲ ମିଡିଆରେ ଲୋକେ ଦିଲ୍ଲୀ ଓ ଶ୍ରୀନଗର ସମେତ ଭାରତର ଅନେକ ସ୍ଥାନରେ ଝଟକା ଅନୁଭୂତ ହେବାର କଥା କହୁଛନ୍ତି।

ଏହା ପୂର୍ବରୁ ପାକିସ୍ତାନର ବଲୁଚିସ୍ତାନ ପ୍ରାନ୍ତରେ ଶୁକ୍ରବାର ଠାରୁ ଏବେସୁଦ୍ଧା ମଧ୍ୟମ ତୀବ୍ରତାର ଅତି କମରେ ପାଞ୍ଚଟି ଭୂକମ୍ପ ଆସି ସାରିଛି। ଶନିବାର ସକାଳେ ଆସିଥିବା ଭୂକମ୍ପର ଝଟକାରେ ବରଖାନ ଓ ଆଖପାଖ ଅଞ୍ଚଳର ପ୍ରଭାବିତ ହୋଇଛି।

ଆହୁରି ମଧ୍ୟ ପଢନ୍ତୁ : Weather Update : ଆସନ୍ତା ତିନି ଦିନ ଏହି ସବୁ ରାଜ୍ୟରେ ହେବ ଭୟଙ୍କର ବର୍ଷା