ନୂଆଦିଲ୍ଲୀ,୨୮/୦୧: ସଙ୍ଗମ ନଗରୀରେ ମହାକୁମ୍ଭ ଜାରି ରହିଥିବା ବେଳେ ବର୍ତ୍ତମାନ ସୁଦ୍ଧା କୋଟି କୋଟି ଶ୍ରଦ୍ଧାଳୁ ବୁଡ଼ ପକାଇ ସାରିଲେଣି । ଏହା ମଧ୍ୟରେ ପ୍ରୟାଗରାଜ ଯାଉଥିବା ଏକ ଟ୍ରେନ ଉପରେ ହରପାଲପୁର ଷ୍ଟେସନ ନିକଟରେ ପଥରମାଡ଼ ହୋଇଛି । ଝାନସୀରୁ ପ୍ରୟାଗରାଜ ଯାଉଥିବା ଟ୍ରେନ ଉପରେ ଆକ୍ରମଣ ହୋଇଥିବା ନେଇ ସୂଚନା ମିଳିଛି । ପଥରମାଡ଼ ଓ ଭଙ୍ଗାରୁଜା ନେଇ ଯାତ୍ରୀମାନେ ଭୟଭୀତ ହୋଇପଡ଼ିଥିଲେ । ହରପାଲପୁର ଷ୍ଟେସନରେ ଆକ୍ରମଣ ହୋଇଥିବା ସୂଚନା ମିଳିଛି । ଦୁର୍ବୃତ୍ତମାନେ ଟ୍ରେନ ଉପରେ ପଥରମାଡ଼ କରିବା ସହ ଭଙ୍ଗାରୁଜା କରିଥିଲେ । ତେବେ ଏହି ଘଟଣାର ଭିଡି଼ଓ ଭାଇରାଲ ହେଉଛି। ତେବେ ଏହି ଭିଡ଼ିଓରେ ଦେଖିବାକୁ ମିଳିଛି ଯେ, ବଗିଟି ଥିବା ବେଳେ ଦୁର୍ବୁତ୍ତମାନେ ପଥରମାଡ଼ କରିଥିଲେ ।
କୁହାଯାଉଛି ଯେ, ଝାନସୀରୁ ପ୍ରୟାଗରାଜକୁ ଯାଉଥିବା ବିରାଙ୍ଗନା ଲକ୍ଷ୍ମୀବାଇ ଟ୍ରେନ୍ ନମ୍ବର ୧୧୮୦୧ ଉପରେ ଆକ୍ରମଣ କରାଯାଇଛି। ଟ୍ରେନ୍ ଭିତରେ ଉପସ୍ଥିତ ଯାତ୍ରୀମାନେ ହରପାଲପୁର ଷ୍ଟେସନରେ ଗେଟ୍ ଖୋଲି ନ ଥିଲେ। ଏହା ପରେ ସେଠାରେ ଉପସ୍ଥିତ ଲୋକମାନେ ପଥର ଫିଙ୍ଗିବା ଆରମ୍ଭ କଲେ । ଏହି କାରଣରୁ ଲୋକଙ୍କ ମଧ୍ୟରେ ପାଟିତୁଣ୍ଡ ହୋଇଥିଲା। ଟ୍ରେନ୍ ଭିତରେ ବହୁ ମହିଳା ମଧ୍ୟ ଉପସ୍ଥିତ ଥିଲେ, ଯେଉଁମାନେ ପ୍ରୟାଗର ମହାକୁମ୍ଭରେ ବୁଡ ପକାଇବାକୁ ଯାଉଥିଲେ। ହଠାତ୍ ଆକ୍ରମଣ ପରେ ଯାତ୍ରୀମାନେ ଡରି ଯାଇଥିଲେ। ଆକ୍ରମଣକାରୀଙ୍କ ସଂଖ୍ୟା ୮ ରୁ ୧୦ ବୋଲି କୁହାଯାଉଛି। ପୋଲିସ ଏହି ମାମଲା ରୁଜୁ କରିଛି। ସିସିଟିଭି ଫୁଟେଜ ଆଧାରରେ ଅଭିଯୁକ୍ତମାନଙ୍କୁ ଚିହ୍ନଟ କରାଯାଉଛି। ଉପଦ୍ରବକାରୀମାନେ ମଧ୍ୟ ଟ୍ରେନରେ ପ୍ରବେଶ କରିବାକୁ ଚେଷ୍ଟା କରିଥିଲେ। କିନ୍ତୁ ସେଠାର ଯାତ୍ରୀମାନେ ଠିକ୍ ସମୟରେ କବାଟ ବନ୍ଦ କରିଦେଇଥିଲେ। ସୋମବାର ରାତି ୧୦ ଟାରୁ ୧୧ ଟା ମଧ୍ୟରେ ଏହି ଆକ୍ରମଣ ହୋଇଥିଲା। ଏହା ପରେ ପୋଲିସ ଘଟଣାସ୍ଥଳରେ ପହଞ୍ଚି ତଦନ୍ତ ଜାରି ରଖିଛି।
