ମୁମ୍ବାଇ/ରାଞ୍ଚି,୨୩/୧୧:ଶନିବାର ମହାରାଷ୍ଟ୍ର ଓ ଝାଡ଼ଖଣ୍ଡ ବିଧାନସଭା ନିର୍ବାଚନର ଭୋଟ ଗଣତି । ଏଥିପାଇଁ ସମସ୍ତ ପ୍ରସ୍ତୁତି ଶେଷ ହୋଇଛି । ନିର୍ବାଚନ କମିଶନଙ୍କ ପକ୍ଷରୁ ମଧ୍ୟ ବ୍ୟାପକ ବ୍ୟବସ୍ଥା ଗ୍ରହଣ କରାଯାଇଛି । ସକାଳ ୮ଟାରେ ପ୍ରଥମେ ପୋଷ୍ଟାଲ ବାଲଟ ଏବଂ ପରେ ଇଭିଏମ୍ର ଭୋଟ ଗଣତି ହେବ । ପୂର୍ବାହ୍ନ ସୁଦ୍ଧା ଫଳାଫଳର ଚିତ୍ର ସାମ୍ନାକୁ ଆସିବାର ସମ୍ଭାବନା ରହିଛି । ଏହି ଦୁଇ ରାଜ୍ୟର ଶାସନ ଭାର କାହା ହାତକୁ ଯିବ ତାହା ଉପରେ ସଭିଁଙ୍କ ନଜର ରହିଛି । ଏଥିସହ ପଞ୍ଜାବ, କେରଳ, ଉତ୍ତରାଖଣ୍ଡ, ଉତ୍ତରପ୍ରଦେଶ ରାଜ୍ୟରେ ହୋଇଥିବା ଉପନିର୍ବାଚନ ଫଳାଫଳ ମଧ୍ୟ ଶନିବାର ଜଣାପଡ଼ିବ ।
ଝାଡ଼ଖଣ୍ଡର ମୋଟ ୮୧ ଆସନରେ ନଭେମ୍ବର ୧୩ ଏବଂ ୨୦ରେ ଦୁଇଟି ପର୍ଯ୍ୟାୟରେ ମତଦାନ ହୋଇଥିଲା । ସେହିପରି ୨୮୮ ଆସନ ବିଶିଷ୍ଟ ମହାରାଷ୍ଟ୍ରରେ ଗୋଟିଏ ପର୍ଯ୍ୟାୟରେ ନଭେମ୍ବର ୨୦ରେ ଭୋଟ ଗ୍ରହଣ କରାଯାଇଥିଲା । ମହାରାଷ୍ଟ୍ରରେ ୬୨.୦୫% ଭୋଟିଂ ହୋଇଥିବାବେଳେ ଝାଡ଼ଖଣ୍ଡରେ ୬୮.୦୧ ପ୍ରତିଶତ ମତଦାନ ହୋଇଥିଲା । ଏଥିସହ ୧୫ ରାଜ୍ୟର ୪୮ ବିଧାନସଭା ଆସନ ଏବଂ ୨ଟି ଲୋକସଭା ଆସନରେ ଦୁଇଟି ପର୍ଯ୍ୟାୟରେ ଉପନିର୍ବାଚନ ହୋଇଥିଲା । ସେଥିମଧ୍ୟରେ ପଞ୍ଜାବର ୪ ଏବଂ ୟୁପିର ୯ ବିଧାନସଭା ଆସନ, କେରଳର ୱାୟନାଡ଼ ଏବଂ ମହାରାଷ୍ଟ୍ରର ନାନ୍ଦେଡ ଲୋକସଭା ଆସନ ରହିଛି । ନିର୍ବାଚନ କମିଶନଙ୍କ ଅଫିସିଆଲ ୱେବସାଇଟରେ ସମସ୍ତ ତଥ୍ୟ ଅପ୍ଡେଟ୍ ରହିବ । ଭୋଟ ଗଣତି କେନ୍ଦ୍ରଗୁଡ଼ିକରେ ଏଥିପାଇଁ କଡ଼ା ସୁରକ୍ଷା ବ୍ୟବସ୍ଥା କରାଯାଇଛି ।
ଅଧିକାଂଶ ବୁଥ୍ବାହୁଡ଼ା ମତ ବା ଏକ୍ଜିଟ ପୋଲ ପୂର୍ବାନୁମାନ ଅନୁସାରେ ମହାରାଷ୍ଟ୍ରରେ ବିଜେପି ନେତୃତ୍ୱାଧୀନ ମହାୟୁତି ମେଣ୍ଟକୁ ବହୁମତ ମିଳିପାରେ । ଏହି ରାଜ୍ୟରେ କଂଗ୍ରେସ-ଶିବସେନା(ଉଦ୍ଧବ)- ଏନ୍ସିପି(ଶରଦ ପାୱାର) ମେଣ୍ଟ ମହାବିକାଶ ଅଘାଡ଼ି (ଏମ୍ଭିଏ) ମହୟୁତିକୁ ଟକ୍କର ଦେଇପାରେ । ଏବେ ମହାରାଷ୍ଟ୍ରରେ ମହାୟୁତି ସରକାର ଅଛି । ଝାଡ଼ଖଣ୍ଡରେ ଜେଏମ୍ଏମ୍-କଂଗ୍ରେସ-ଆର୍ଜେଡି (ଇଣ୍ଡିଆ ବ୍ଲକ୍) କ୍ଷମତାରେ ଥିବାବେଳେ ବିଜେପି ନେତୃତ୍ୱାଧୀନ ଏନ୍ଡିଏ ସହ କଡ଼ା ଟକ୍କର ଦେଖିବାକୁ ମିଳିପାରେ ବୋଲି ଅନୁମାନ କରାଯାଇଛି । ବୁଥ ବାହୁଡା ମତକୁ ନେଇ କେତେକ ଦଳ ବେଶ୍ ଉତ୍ସାହିତ ହୋଇପଡିଥିଲା ବେଳେ ଆଉ କେତେକ ଦଳ ଏହାକୁ ଗ୍ରହଣ କରିପାରି ନାହାନ୍ତି।
