ମୁମ୍ବାଇ ,୧୨/୧୨: ନିର୍ବାଚନ ହେଲା ଫଳାଫଳ ବି ବାହିରିଲା । ଏହା ପରେ କିଏ ମୁଖ୍ୟମନ୍ତ୍ରୀ ହେବ ତାକୁ ନେଇ ଅଙ୍କକଷା ଚାଲିଲା । ଶେଷରେ ଦେବେନ୍ଦ୍ର ଫଡନାଭିସ ମୁଖ୍ୟମନ୍ତ୍ରୀ ଭାବେ ଶପଥ ନେଲେ । ଏକନାଥ ସିନ୍ଦେ ଓ ଅଜିତ୍ ପାୱାର ଉପମୁଖ୍ୟମନ୍ତ୍ରୀ ଭାବେ ଦାୟିତ୍ବ ଗ୍ରହଣ କଲେ । ମୁଖ୍ୟମନ୍ତ୍ରୀ ଅଡ଼ୁଆ ତୁଟିବା ପରେ ଏବେ ମନ୍ତ୍ରିମଣ୍ଡଳ ସଂପ୍ରସାରଣକୁ ନେଇ ସସପେନ୍ସ, ଜାରି ରହିଛି । ଏ ନେଇ ବୁଧବାର ଦିଲ୍ଲୀରେ ବିଜେପି ନେତୃତ୍ବଙ୍କ ସହ ବୈଠକ ହୋଇଥିଲା । ବିଭାଗ ବଣ୍ଟନ ଏକ ପ୍ରକାର ଫାଇନାଲ ହୋଇଥିବା ଚର୍ଚ୍ଚା ହେଉଛି । ତେବେ ବିଜେପିକୁ ୨୦ କ୍ୟାବିନେଟ ମନ୍ତ୍ରୀ ମିଳିପାରନ୍ତି । ସେହିପରି ଏକନାଥ ସିନ୍ଦେଙ୍କ ଶିବସେନାକୁ ୧୨ ଓ ଅଜିତ ପାୱାରଙ୍କ ଏନସିପିରୁ ୧୦ ମନ୍ତ୍ରୀ ହୋଇପାରନ୍ତି ।
ବୁଧବାର ମୁଖ୍ୟମନ୍ତ୍ରୀ ଦେବେନ୍ଦ୍ର ଫଡନାଭିସ କେନ୍ଦ୍ର ଗୃହମନ୍ତ୍ରୀ ଅମିତ ଶାହଙ୍କୁ ଭେଟିଥିଲେ । ଏଥିରେ ମନ୍ତ୍ରୀମଣ୍ଡଳ ଆବଣ୍ଟନ ନେଇ ଆଲୋଚନା ହୋଇଥିଲା । ଏକ ଘଣ୍ଟା ଧରି ବୈଠକ ହୋଇଥିଲା । ମହାରାଷ୍ଟ୍ର ମନ୍ତ୍ରୀମଣ୍ଡଳରେ ମୋଟ ୪୩ ମନ୍ତ୍ରୀ ହୋଇପାରନ୍ତି । ଆସନ୍ତା ୧୪ ତାରିଖରେ ମହାରାଷ୍ଟ୍ର କ୍ୟାବିନେଟ ସମ୍ପ୍ରସାରଣ ହେବ । ବିଜେପି ଓ ଦେବେନ୍ଦ୍ର ଫଡନାବିସଙ୍କ ପାଇଁ ମହାରାଷ୍ଟ୍ର ସରକାର କ୍ୟାବିନେଟ ଗଠନ ଓ ବିଭାଗ ବଣ୍ଟନ ବଡ ଚ୍ୟାଲେଞ୍ଜ ସୃଷ୍ଟି କରିଛି । ଶାସକ ମେଣ୍ଚର ଦୁଇ ସହଯୋଗୀ ଅଜିତ ପାୱାର ଓ ଏକନାଥ ସିନ୍ଦେ ବଡ ବିଭାଗ ଦାବି କରିଛନ୍ତି । ଶିବସେନା ଗୃହ ବିଭାଗ ଦାବି କରିଥିଲେ । ଏନସିପିର ବି ସମାନ ଭାଗିଦାରୀ ଦାବି କରିଥିଲା । ଯଦିଓ ଦଳ କମ ଆସନ ଜିତିଛି ମାତ୍ର ଶରଦ ପାୱାରଙ୍କଠୁ ଅଧିକ ଶକ୍ତିଶାଲୀ ବୋଲି ପ୍ରମାଣ କରିଛି ।
ଗଣମାଧ୍ୟମ ରିପୋର୍ଟ ଅନୁସାରେ ସହଯୋଗୀ ଦଳ ଗୁ଼ଡିକ ଏବେ ବି ମହାରାଷ୍ଟ୍ରରେ ଏନଡିଏ ସରକାର ପାଇଁ ମୁଣ୍ଡବିନ୍ଧାର କାରଣ ସାଜିଛନ୍ତି । ଫଳରେ ରାଜ୍ୟରେ ଏବେ ସୁଦ୍ଧା ମନ୍ତ୍ରୀମଣ୍ଡଳ ବିଭାଗ ବଣ୍ଟନ ହୋଇପାରୁନାହିଁ । ମନ୍ତ୍ରିମଣ୍ଡଳ ସଂପ୍ରସାରଣ ସସପେନ୍ସ ତୁଟାଇବାକୁ ମୁଖ୍ୟମନ୍ତ୍ରୀ ଦେବେନ୍ଦ୍ର ଫଡନାଭିସ୍ ବୁଧବାର ଗୃହମନ୍ତ୍ରୀ ଅମିତ ଶାହଙ୍କୁ ଭେଟିଥିଲେ । ଖୁବଶୀଘ୍ର ସସପେନ୍ସ ଉପରୁ ପରଦା ହଟିବ ବୋଲି ଆକଳନ କରାଯାଉଛି ।
