ମୁମ୍ବାଇ,୦୩/୧୨: ମହାରାଷ୍ଟ୍ରରେ ବିଧାନସଭା ନିର୍ବାଚନର ଫଳାଫଳ ସାମ୍ନାକୁ ଆସିବାର ୧୦ ଦିନ ପରେ ମଧ୍ୟ ମୁଖ୍ୟମନ୍ତ୍ରୀଙ୍କ ନାମ ଚୂଡ଼ାନ୍ତ ହୋଇପାରିନାହିଁ । ମହାୟୁତି ଅର୍ଥାତ୍ ବିଜେପି, ଏକନାଥ ସିନ୍ଦେଙ୍କ ଶିବସେନା ଓ ଅଜିତ ପାୱାରଙ୍କ ଏନ୍ସିପି ଜଣେ ମୁଖ୍ୟମନ୍ତ୍ରୀ, ୨ ଜଣ ଉପ ମୁଖ୍ୟମନ୍ତ୍ରୀ ଫର୍ମୁଲା ସ୍ଥିର କରିଛନ୍ତି ।
ବିଜେପି ପକ୍ଷରୁ ଅର୍ଥମନ୍ତ୍ରୀ ନିର୍ମଳା ସୀତାରମଣ ଓ ଗୁଜରାଟର ପୂର୍ବତନ ମୁଖ୍ୟମନ୍ତ୍ରୀ ବିଜୟ ରୂପାନିଙ୍କୁ କେନ୍ଦ୍ରୀୟ ପର୍ଯ୍ୟବେକ୍ଷକ ଭାବେ ନିଯୁକ୍ତ କରାଯାଇଛି । ରୂପାନି ମଙ୍ଗଳବାର ସନ୍ଧ୍ୟାରେ ଓ ସୀତାରମଣ ଡିସେମ୍ବର ୪ ତାରିଖ ସକାଳେ ମୁମ୍ବାଇ ପହଞ୍ଚିବେ । ୪ ତାରିଖ ସକାଳ ୧୦ଟାରେ ବିଧାନ ଭବନର ସେଣ୍ଟ୍ରାଲ ହଲ୍ରେ ବିଜେପି ବିଧାୟକ ଦଳର ବୈଠକ ଅନୁଷ୍ଠିତ ହେବ । ସେଠାରେ ମୁଖ୍ୟମନ୍ତ୍ରୀଙ୍କ ନାମ ସ୍ଥିର କରାଯିବ ।
ଡିସେମ୍ବର ୫ ତାରିଖ ସନ୍ଧ୍ୟା ୫ଟାରେ ମୁମ୍ବାଇର ଆଜାଦ ମୈଦାନରେ ମୁଖ୍ୟମନ୍ତ୍ରୀଙ୍କ ଶପଥ ଗ୍ରହଣ ସମାରୋହ ଅନୁଷ୍ଠିତ ହୋଇପାରେ । ବିଜେପି ପକ୍ଷରୁ ଦେବେନ୍ଦ୍ର ଫଡନବିସ୍ ମୁଖ୍ୟମନ୍ତ୍ରୀ ହୋଇପାରନ୍ତି ବୋଲି କୁହାଯାଉଛି । ସେପଟେ ଅଜିତ ପାୱାର ଓ ଫଡନବିସ୍ ସୋମବାର ଦିଲ୍ଲୀରେ ସ୍ୱରାଷ୍ଟ୍ରମନ୍ତ୍ରୀ ଅମିତ ଶାହଙ୍କୁ ସାକ୍ଷାତ କରିବାର ଥିଲା । ପାୱାର ଦିଲ୍ଲୀ ପହଞ୍ଚିଥିବାବେଳେ ଫଡନବିସ୍ଙ୍କ ଗସ୍ତ ଅଚାନକ ରଦ୍ଦ ହୋଇଛି । ଏବେ ସେ ଭିଡିଓ କନ୍ଫରେନ୍ସିଂ ଜରିଆରେ ବୈଠକରେ ସାମିଲ ହେବେ । ଅନ୍ୟପଟେ ଅସୁସ୍ଥ ଥିବା କାମଚଳା ମୁଖ୍ୟମନ୍ତ୍ରୀ ଏକନାଥ ସିନ୍ଦଙ୍କ ଘରକୁ ଯାଇ ଶିବସେନା ସାଂସଦ ସଞ୍ଜୟ ଶିରସାଟ୍ ତାଙ୍କର ସ୍ୱାସ୍ଥ୍ୟାବସ୍ଥା ପଚାରି ବୁଝିଛିଥିଲେ । ସିନ୍ଦେ ସୋମବାର ଦଳୀୟ ବିଧାୟକମାନଙ୍କ ସହିତ ବୈଠକ କରିବାର ଥିବାବେଳେ ତାହା ରଦ୍ଦ ହୋଇଥିଲା । ଡାକ୍ତରମାନେ ତାଙ୍କୁ ଆରାମ କରିବାକୁ ପରାମର୍ଶ ଦେଇଛନ୍ତି । ଇତିମଧ୍ୟରେ ତାଙ୍କ ପୁଅ ଶ୍ରୀକାନ୍ତ ସିନ୍ଦେ ଉପମୁଖ୍ୟମନ୍ତ୍ରୀ ଦୌଡ଼ରେ ନଥିବା ପ୍ରକାଶ କରିଛନ୍ତି । ଏପରିକି ସେ କେନ୍ଦ୍ରମନ୍ତ୍ରୀ ପଦ ଲାଗି ଲାଳାୟିତ ନଥିବା ସ୍ପଷ୍ଟ କରିଛନ୍ତି । ସେପଟେ ସିନ୍ଦେଙ୍କ ଅସୁସ୍ଥତା ଲାଗି ଏନ୍ଡିଏର ବୈଠକକୁ ମଙ୍ଗଳବାର ଯାଏ ସ୍ଥଗିତ ରଖାଯାଇଛି।
ମହାରାଷ୍ଟ୍ରରେ ମହାୟୁତିକୁ ୨୩୦ଟି ଆସନ ମିଳିଛି । ବହୁମତ ଲାଗି ଜରୁରି ସଂଖ୍ୟାଠାରୁ ଏହା ୮୫ ଅଧିକ । ସେଥିମଧ୍ୟରୁ ବିଜେପି ୧୩୨, ଶିବସେନା ସିନ୍ଦେ ୫୭ ଓ ଏନ୍ସିପି ଅଜିତ ପାୱାର ୪୧ଟି ଆସନ ପାଇଛନ୍ତି
