ନୂଆଦିଲ୍ଲୀ : କେନ୍ଦ୍ର ଏବଂ ମହାରାଷ୍ଟ୍ରରେ ବିଜେପି ଓ ଏକନାଥ ସିନ୍ଦେଙ୍କ ଶିବସେନା ଏକାଠି ଅଛନ୍ତି। ହେଲେ ମୁମ୍ବାଇ ମହାନଗର ନିଗମ କ୍ଷେତ୍ରରେ ପୁଣି ଥରେ ଦୁଇ ଦଳ ମଧ୍ୟରେ ସବୁକିଛି ଠିକ୍ ନଥିବା ଦେଖିବାକୁ ମିଳୁଛି। ରିପୋର୍ଟ ଅନୁଯାୟୀ, କଲ୍ୟାଣ-ଡୋମ୍ବିଭାଲି ନଗର ନିଗମ ପରେ, ଏବେ ମୀରା-ଭାୟନ୍ଦର ନଗର ନିଗମରେ ଏକନାଥ ସିନ୍ଦେ ଗୋଷ୍ଠୀର ଶିବସେନା କଂଗ୍ରେସ ସହିତ ମିଶି ସମସ୍ତଙ୍କୁ ଆଶ୍ଚର୍ଯ୍ୟ କରିଛି। ଦୁଇ ଦଳ ବିଜେପି ବିରୁଦ୍ଧରେ ଏକ ମିଳିତ ମୋର୍ଚ୍ଚା ଗଠନ କରିବାକୁ ନିଷ୍ପତ୍ତି ନେଇଛନ୍ତି। ଏଭଳି ସ୍ଥଳେ ଦଳ ସ୍ପଷ୍ଟ କରିଛି ଯେ, କୌଣସି ଏକ ଦଳକୁ ଏହାର ସଂଖ୍ୟାଗରିଷ୍ଠତାର ଅପବ୍ୟବହାର କରିବାରୁ ରୋକିବା ପାଇଁ ଏହି ନିଷ୍ପତ୍ତି ନିଆଯାଇଛି।
ମିଡିଆ ରିପୋର୍ଟ ଅନୁଯାୟୀ, ମୀରା-ଭାୟନ୍ଦର ନଗର ନିଗମର ଶିନ୍ଦେ ଗୋଷ୍ଠୀ ଏବଂ କଂଗ୍ରେସ ପୌର କର୍ମୀ ମାନେ ଏକାଠି ହୋଇ ମୀରା-ଭାୟନ୍ଦର ନଗର ବିକାଶ ମୋର୍ଚ୍ଚା ନାମକ ଏକ ମିଳିତ ବିରୋଧୀ ମଞ୍ଚ ଗଠନ କରିଛନ୍ତି। ଏହା ବିଶ୍ୱାସ କରାଯାଉଛି ଯେ ସିନ୍ଦେ ଗୋଷ୍ଠୀର ଏହି ନିଷ୍ପତ୍ତି ପୌରପାଳିକାରେ ଶିବସେନା ଏବଂ ବିଜେପି ମଧ୍ୟରେ ଥିବା ତିକ୍ତ ସମ୍ପର୍କକୁ ପ୍ରତିଫଳିତ କରୁଛି । ହେଲେ ଏହା ପ୍ରଥମ ଥର ନୁହେଁ କି, ସିନ୍ଦେ ଗୋଷ୍ଠୀର ଶିବସେନା ବିଜେପି ବିରୋଧରେ କୌଣସି ଦଳ ସହିତ ମେଣ୍ଟ ଗଠନ କରିଛି।
୨୦୨୬ ମୀରା-ଭାୟନ୍ଦର ନଗର ନିଗମ ନିର୍ବାଚନ ଫଳାଫଳରେ, ବିଜେପି ୯୫ ଆସନରୁ ୭୮ଟି ଜିତି ସର୍ବବୃହତ ଦଳ ଭାବରେ ଉଭା ହୋଇଥିଲା। ଏହି ସମୟରେ, କଂଗ୍ରେସ ୧୩ଟି ଆସନ ଜିତିଥିଲା, ଯେତେବେଳେ ସିନ୍ଦେ ସେନା ୩ଟି ଆସନ ଜିତିଥିଲା। ବର୍ତ୍ତମାନ, ସିନ୍ଦେ କଂଗ୍ରେସ ସହିତ ଏକ ନୂତନ ବିରୋଧୀ ମେଣ୍ଟ ଗଠନ କରିଛନ୍ତି। ମହାରାଷ୍ଟ୍ର ପରିବହନ ମନ୍ତ୍ରୀ ପ୍ରତାପ ସରନାୟକ ଏହି ମେଣ୍ଟକୁ ସ୍ଥାନୀୟ ଦୁର୍ନୀତି ଏବଂ କ୍ଷମତାର ଅପବ୍ୟବହାର ରୋକିବା ପାଇଁ ଗଠିତ ବୋଲି କହିଛନ୍ତି । ମହାରାଷ୍ଟ୍ର ମନ୍ତ୍ରୀ ଦାବି କରିଛନ୍ତି ଯେ ୧୬ ଜଣ କାଉନସିଲର ଦଳୀୟ ରାଜନୀତିରୁ ଊର୍ଦ୍ଧ୍ୱକୁ ଉଠି ସହରର ସର୍ବୋତ୍ତମ ସ୍ୱାର୍ଥରେ ନିଷ୍ପତ୍ତି ନେଇଛନ୍ତି।
ଗଣମାଧ୍ୟମ ରିପୋର୍ଟ ଅନୁସାରେ, ସରନାୟକ ସିଧାସଳଖ ଜଣେ ସ୍ଥାନୀୟ ବିଜେପି ନେତାଙ୍କୁ ଟାର୍ଗେଟ କରୁଛନ୍ତି। ଏହି ବିରୋଧୀ ମେଣ୍ଟରେ ୧୩ ଜଣ କଂଗ୍ରେସ କର୍ପୋରେଟର, ୩ ଜଣ ଶିବସେନା (ସିନ୍ଦେ ଗୋଷ୍ଠୀ) ଏବଂ ଜଣେ ସ୍ୱାଧୀନ କର୍ପୋରେଟର ଅଛନ୍ତି। ଏହି ମେଣ୍ଟର ଲକ୍ଷ୍ୟ ବିଜେପିର ମନମୁଖୀ ଶାସନକୁ ରୋକିବା। ତଥାପି, ଶିବସେନା (ସିନ୍ଦେ ଗୋଷ୍ଠୀ)ର ଏହି ପଦକ୍ଷେପକୁ ବିଜେପି ସମାଲୋଚନା କରିଛି।
