କୋଲକାତା: ପଶ୍ଚିମବଙ୍ଗର ରାୟଗଞ୍ଜ ଲୋକସଭା ନିର୍ବାଚନ ମଣ୍ଡଳୀରେ ପ୍ରଚାର ସମୟରେ ମୁଖ୍ୟମନ୍ତ୍ରୀ ମମତା ବାନାର୍ଜୀଙ୍କ ଉପରେ ବର୍ଷିଛନ୍ତି ବିଜେପି ନେତା ଅମିତ ଶାହ । ବାଂଲାଦେଶରୁ ରାଜ୍ୟକୁ ଆସିଥିବା ହିନ୍ଦୁ ଶରଣାର୍ଥୀଙ୍କୁ ନାଗରିକତା ମିଳିଲେ ମମତା ବାନାର୍ଜୀଙ୍କ ଅସୁବିଧା କେଉଁଠି ବୋଲି ଶାହ ପ୍ରଶ୍ନ କରିଛନ୍ତି । ଗୋଟିଏ ପଟେ ମମତା ଦିଦି ଅନୁପ୍ରବେଶକାରୀଙ୍କୁ ରାଜ୍ୟରେ ପଶିବାକୁ ଅନୁମତି ଦେଉଛନ୍ତି । ଅନ୍ୟପଟେ ଶରଣାର୍ଥୀଙ୍କୁ ନାଗରିକତା ଦେବାକୁ ବିରୋଧ କରୁଛନ୍ତି । ଏଥିରେ ମମତା ଦିଦିଙ୍କୁ କାହିଁକି ଅସୁବିଧା ହେଉଛି ବୋଲି ପଚାରିଛନ୍ତି କେନ୍ଦ୍ର ଗୃହମନ୍ତ୍ରୀ ଅମିତ ଶାହ ।
ସେ ଆହୁରି କହିଛନ୍ତି ଯେ, ସିଏଏ ହଟାଇବାକୁ କଂଗ୍ରସେ ଏବଂ ମମତା ଦିଦିଙ୍କ ସାହସ ନାହିଁ । ସନ୍ଦେଶଖାଲିରେ ଭୋଟ ବ୍ୟାଙ୍କକୁ ସୁରକ୍ଷିତ କରିବାକୁ ଯାଇ ମମତା ଦିଦି ଗରିବ ମା-ଭଉଣୀଙ୍କ ଉପରେ ଅତ୍ୟାଚାର ହେବାକୁ ଦେଲେ । ସନ୍ଦେଶଖାଲିର ମା-ଭଉଣୀମାନେ ସଂଘର୍ଷ କରିଛନ୍ତି । ହାଇକୋର୍ଟଙ୍କ ରାୟ ପରେ ମମତା ଦିଦିଙ୍କ ଅନୁଗାମୀ ଜେଲରେ ଅଛନ୍ତି । ଅମିତ ଶାହ କହିଛନ୍ତି ଯେ, ଟିଏମସିର ଯେଉଁ ନେତାମାନେ ଚାଳଛପର ଘରେ ରହୁଥିଲେ ଆଜି ସେମାନେ ବିଳାଶପୂର୍ଣ୍ଣ ଘରେ ରହୁଛନ୍ତି । ପାର୍ଥ ଚାଟାର୍ଜୀ ଏବେ ବି ଜେଲରେ ଅଛନ୍ତି କିନ୍ତୁ ତାଙ୍କୁ ଦଳରୁ ବହିଷ୍କାର କରିନାହାନ୍ତି ମମତା ।
ସେହିଭଳି ମମତା ବାନାର୍ଜୀଙ୍କ ସରକାରରେ ନିର୍ବାଚନରେ ହିଂସାକାଣ୍ଡ ଘଟୁଛି । ପଞ୍ଚାୟତ ନିର୍ବାଚନରେ ୨୦୦ ଲୋକଙ୍କୁ ହତ୍ୟା କରାଯାଉଛି । ଲୋକସଭା ଏବଂ ବିଧାନସଭା ନିର୍ବାଚନ ପରେ ଲୋକଙ୍କୁ ହତ୍ୟା କରାଯାଉଛି ବୋଲି ଅମିତି ଶାହ ଅଭିଯୋଗ କରିଛନ୍ତି । ଶାହ କହିଛନ୍ତି, ଯଦି ବେଙ୍ଗଲକୁ ହିଂସାମୁକ୍ତ କରିବାକୁ ଚାହୁଁଛନ୍ତି, ଅନୁପ୍ରବେଶ ରୋକିବାକୁ ଚାହୁଁଛନ୍ତି ଏବଂ ଶରଣାର୍ଥୀଙ୍କୁ ନାଗରିକତା ଦେବାର ଅଛି ତେବେ ନରେନ୍ଦ୍ର ମୋଦୀଙ୍କୁ ପୁଣି ଥରେ ପ୍ରଧାନମନ୍ତ୍ରୀ କରାନ୍ତୁ । ଏହା ସହ ସେ ମୋଦୀଙ୍କ ଗ୍ୟାରେଣ୍ଟି ଦେବାକୁ ବେଙ୍ଗଲ ଆସିଛନ୍ତି ବୋଲି କହିଛନ୍ତି ଅମିତ ଶାହ ।